A-Húnavatnssýsla

Blóðbankinn verður með blóðsöfnun á Sauðárkróki og á Blönduósi í næstu viku. Mikill skortur hefur verið á blóði hjá Blóðbankanum og á Facebooksíðu bankans í gær kemur fram að skortur er á blóði í öllum blóðflokkum, þó sérstaklega O mínus. Því er mikilvægt að sem flestir gefi blóð.

Ferðafélag Íslands stóð fyrir lýðheilsugöngum á miðvikudögum í september sem mæltust vel fyrir. Tilgangur gönguferðanna var sá að hvetja fólk til útivistar og hreyfingar í góðum félagsskap og efla þar með heilsu sína og lífsgæði. Farið var í skipulagðar gönguferðir í báðum Húnavatnssýslunum og á fréttavefnum Húni.is kemur fram að ágæt þátttaka hefur verið í göngunum í Austur-Húnavatnssýslu og þakkar ferðamálastjóri göngustjórum kærlega fyrir samvinnuna og öllum þátttakendum fyrir áhugann á verkefninu.

Í dag, fimmtudaginn 27. september, verður opið hús í Nes listamiðstöð á Skagaströnd. Þar munu þeir listamenn sem dvalið hafa í listamiðstöðinni í september sýna vinnu sína. Opið verður frá klukkan 16:30 til 19:00.

Nýlega heimsótti Vífill Karlsson, hagfræðingur, sveitarstjórnarmenn á Norðurlandi vestra og kynnti fyrir þeim niðurstöður íbúakönnunar sem Samtök sveitarfélaga á Vesturlandi stóðu að með Vífil í fararbroddi. Þrjár kynningar voru haldnar, ein á Hvammstanga þar sem fjallað var um niðurstöður könnunarinnar í Vestur-Húnavatnssýslu, á Blönduósi fyrir Austur-Húnavatnssýslu og sú þriðja á Sauðárkróki þar sem niðurstöður fyrir Skagafjörð voru kynntar. Sagt er frá þessu á vef Samtaka sveitarfélaga á Norðurlandi vestra.

Lögreglan á Norðurlandi vestra segir frá því á Facebooksíðu sinni í dag að í gær hafi 28 ökumenn verið kærðir fyrir of hraðan akstur í umdæmi embættisins. Var sá sem hraðast ók mældur á 168 km hraða sem er 78 km fyrir ofan leyfilegan hámarkshraða. Upphæð sektar fyrir þennan hraða eru 240 þúsund krónur auk sviptingar ökuréttinda í 3 mánuði.

Í dag eru tíu á síðan Feykir.is fór formlega í loftið í fyrsta sinn. Margt manna mætti í kynningarhóf föstudaginn 26. september 2008 sem haldið var á Hótel Mælifelli en um kvöldið var síðan formlega opnuð á Laufskálaréttarskemmtun í reiðhöllinni á Sauðárkróki.

Síðastliðinn sunnudag opnaði á Egilsstöðum sýningin Kona á skjön sem segir frá rithöfundarferli Guðrúnar frá Lundi sem fullyrða má að sé sannkallað ævintýri í íslenskri bókmenntasögu. Sýningin hefur farið víða en áður hefur hún verið sett upp á Sauðárkróki, Borgarbókasafni í Grófinni, Bókasafni Akraness og Amtsbókasafni á Akureyri.

Næstkomandi laugardag ætlar Rannsóknarsetur Háskóla Íslands á Norðurlandi vestra að bjóða gestum og gangandi upp á kaffi og meðlæti í húsakynnum setursins að Einbúastíg 2 á Skagaströnd. Forstöðumaður setursins, dr. Vilhelm Vilhelmsson, mun taka á móti gestum og kynna það sem er á döfinni hjá setrinu.

Biskup Íslands, frú Agnes M. Sigurðardóttir, mun vísitera í Skagastrandarprestakalli á morgun, þriðjudag 25. september, og á miðvikudag, 26. september. Biskup heimsækir allar kirkjur prestakallsins, í sveitakirkjunum verður haldin helgistund með hugleiðingu sem biskup flytur og í Hólaneskirkju mun biskup flytja prédikun við messu á þriðjudagskvöld.

Á næstu dögum verður bólusett gegn inflúensu á heilsugæslustöðvum Heilbrigðisstofnunar Norðurlands. Í auglýsingum frá Heilbrigðisstofnuninni segir að allir einstaklingar eldri en 60 ára ættu að láta bólusetja sig svo og öll börn og fullorðnir með langvinna hjarta-, lungna-, nýrna- og lifrarsjúkdóma, sykursýki, illkynja sjúkdóma og aðra ónæmisbælandi sjúkdóma. Einnig er æskilegt að heilbrigðisstarfsmenn sem annast einstaklinga í framantöldum áhættuhópum fái bólusetningu svo og þungaðar konur. Ennfremur eru lungnabólusetningar ráðlagðar einstaklingum eldri en 60 ára. Bóluefnið er áhættuhópum að kostnaðarlausu en greiða þarf komugjald.