A-Húnavatnssýsla

Út er komið Jólablað Feykis, stútfullt af skemmtilegu efni. Það verður borið inn á öll heimili á Norðurlandi vestra í vikunni og að sjálfsögðu til áskrifenda utan þess svæðis. Blaðið verður einnig aðgengilegt á Netinu.

Jólabasar kvenfélagsins Heklu verður haldinn í Skagabúð sunnudaginn 3. desember frá kl: 14-17. Þar verður ýmislegt til sölu, s.s jólakort og pappír, gott úrval af heimaunni vöru og handverki.

Þann 1. desember mun Pósturinn gera nokkrar breytingar á póstnúmerum landsins. Fela þær í sér að sérstakt póstnúmer verður tekið upp á svæðum í dreifbýli sem áður féllu undir sama póstnúmer og næsti þéttbýliskjarni. Hægt verður að þekkja flest nýju póstnúmerin á því að síðasta talan í þeim hækkar um einn.

Næstkomandi fimmtudag, 30. nóvember kl. 20:00, verður haldinn svæðisfundur vegna ferðamannavegarins Norðurstandarleiðar - Arctic Coast Way á veitingastaðnum Borginni á Hótel Blöndu.

Vegurinn um Vatnsskarð var lokaður sl. sunnudag þegar unnið var að því að losa vörubíl sem endaði utan vegar þremur dögum fyrr en þá geisaði mikið óveður á Norðurlandi. Verkið var seinlegt að sögn Jóhannesar Þórðarsonar, tók u.þ.b. 5-6 klukkutíma.

Á morgun, þriðjudaginn 28. nóvember klukkan 20:00, verða haldnir styrktartónleikar í Blönduósskirkju þar sem tilefnið er að safna fé fyrir orgelsjóð kirkjunnar. Þá mun Eyþór Franzson Wechner, organisti kirkjunnar leika verk eftir Johann Sebastian Bach.

Opna húsið í Bílskúrsgalleríinu við Kvennakólann á Blönduósi sem frestað var á fimmtudaginn verður haldið á morgun, þriðjudag 28. nóvember. Þá ætla listamenn nóvembermánaðar hjá Textílsetrinu að sýna vinnu sína. Í tilkynningu frá Textílsetrinu segir að ásamt ullarsokkunum, sem eru auðvitað nauðsynlegastir alls á þessum árstíma, verði hellingur af öðru dásamlegu sem listamennirnir hafa unnið undanfarið til sýnis.

Húni.is segir frá því í dag að samstarfsnefnd um sameiningu sveitarfélaga í Austur-Húnavatnssýslu hafi komið saman einu sinni frá því að sveitarfélögin fjögur, Blönduós, Skagaströnd, Húnavatnshreppur og Skagabyggð, samþykktu að hefja sameiningaviðræður.

Í dag, laugardaginn 25. nóvember, verður opið hús í listamiðstöðinni Nesi á Skagaströnd þar sem listamenn nóvembermánaðar munu sýna verk sín. Opið verður frá klukkan 16 til 18 en milli klukkan 16:30 og 17:15 fer fram samspil leiklistar og persneskrar fiðlu, kvikmyndasýning, upplestur úr skáldsögu og kynning á rannsókn á bæjarskipulagi Skagastrandar. Klukkan 17:30 verður tónlist, ljóð og sjónlistasýning í kaffistofunni Einbúastíg 2.

Appelsínugul viðvörun er fyrir Strandir og Norðurland vestra, Norðurland eystra, Austurland að Glettingi, Austfirði og Suðausturland. Norðan hvassviðri er á norðurlandi allt að 18-23 m/s og snjókoma, talsverð á Tröllaskaga. Skafrenningur og skyggni mjög lítið og ekkert ferðaveður.