Fyrstu alíslensku þorralögin aðgengileg á Spotify

Bóndadagurinn er á morgun og gengur þá þorri í garð. Árni Björnsson segir í riti sínu Saga daganna að um fyrsta dag þorra hafi Jón Halldórsson í Hítardal (f. 1665) skrifað til Árna Magnússonar 1728, að sú hefð væri meðal almennings að húsmóðirin færi út kvöldið áður og bjóði þorrann velkominn, og inn í bæ, eins og um tiginn gest væri að ræða. Þau tímamót verða nú að fyrstu alíslensku þorralögin eru aðgengileg á Spotify og geta hljómað allan þorramánuðinn.

„Eins furðulega og það kann að hljóma eru þetta fyrstu alíslensku þorralögin,“ segir Ragnhildur Gísladóttur höfundur þeirra en textar eru eftir Steinunni Þorvaldsdóttur. Halldór G. Pálsson, Fjallabróðir, sá um upptökur en flutning annast hljómsveitin Spraðabassar en hana skipa auk þeirra Ragnhildar og Halldórs, Bryndís Jakobsdóttir, Sverrir Bergmann, Tómas Jónsson og Magnús Magnússon. „Þau lög sem við tengjum yfirleitt við þennan mánuð, sbr. Nú er frost á Fróni, eru öll erlend,“ bætir Ragnhildur við.

Í bókinni Velkominn þorri, sem kom út árið 2010 hjá bókaforlaginu Sölku, tóku þær Ragnhildur og Steinunn saman ýmsan fróðleik um þorrann og þorrahefðirnar og kynntu jafnframt tvö ný lög um þorrann, Velkominn þorri og Þorrinn er kominn.

Í kjölfarið sömdu þær tvö önnur lög, Bóndadagshopp og Þorragleðigleðigaman, sem komu út á disknum Þorralögin árið 2011, ásamt hinum tveimur. Árið 2017 bættust svo við lögin Reynir að gera gott úr því og Þorralitirnir, sem voru kynnt á þorranum það ár í sjónvarpsþætti ríkissjónvarpsins, en hann byggðist á samantekt þeirra Ragnhildar og Steinunnar um þorrann.

Eiga öll lögin sex það sameiginlegt að segja sögur tengdar þorranum og miðast textinn við að halda þessum frásögnum og hefðum lifandi:

Velkominn þorri - Samkvæmt heimildum frá því snemma á 18. öld var til siðs að húsfreyja færi út kvöldið fyrir bóndadag til að bjóða Þorra velkominn með fögrum tilmælum um að vera sér og sínum léttur og skaðlaus.

Bóndadagshoppið fjallar um þann umdeilda sið að húsbóndi færi á fætur að morgni fyrsta dags þorra og hoppaði kringum húsið fáklæddur að neðan.

Þorrinn er kominn byggist á lýsingu manns af föður sínum í gervi Þorra á þorrablóti í byrjun síðustu aldar.

Þorragleðigleðigaman gerist í nútímanum á leið á þorrablót.

Reynir að gera gott úr því lýsir aðstæðum forvera okkar þegar matarföngin voru þorrin og aðstæður erfiðar. Rætur íslenskrar matar- og hátíðahefðar liggja í þessum veruleika.

Þorralitirnir lýsa því hvernig við undirbúum komu Þorra með viðeigandi stemningu þar sem við drögum fram litbrigði og tákn til að minna á okkur á jarðveginn sem við erum sprottin úr.

Hægt er að nálgast lögin HÉR

 

 

Athugasemdir eru á ábyrgð þeirra sem þær skrá.

Feykir áskilur sér þó rétt til að eyða ummælum sem metin verða sem ærumeiðandi eða ósæmileg.

Smelltu hér til að tilkynna óviðeigandi athugasemdir.

Fleiri fréttir