Fréttir

Heilbrigðisstofnun Norðurlands auglýsir eftir yfirlækni og lækni til starfa á starfstöð stofnunarinnar á Blönduósi. Á Húnahorninu segir Helga Margrét Jóhannesdóttir, yfirhjúkrunarfræðingur svæðis og staðarumsjónarmaður HSN á Blönduósi, að verið sé að leita að metnaðarfullum og framsæknum læknum sem vilja taka þátt í að byggja upp öfluga og stöðuga læknamönnun til framtíðar. „Markmið okkar er að tryggja samfellu í þjónustu, bæta aðgengi íbúa að heilbrigðisþjónustu og viðhalda okkar faglega, styðjandi og eftirsóknarverða vinnuumhverfi,“ segir Helga Margrét.

Í 32-liða úrslitum Gatorade bikarsins fá Kormákur/Hvöt lið Víkings Ólafsvíkur í heimsókn. Víkingur Ólafsvík er ríkjandi bikarmeistari en á síðustu leiktíð hét þessi bikarkeppni Fótbolti.net bikarinn. Leikurinn fer fram á Blönduósvelli klukkan 18:00 í kvöld, 27. maí.

Mánudaginn 18. maí héldu nemendur 1. - 3. bekkjar Varmahlíðarskóla af stað í skólaferðalagið. Að þessu sinni voru það 28 nemendur ásamt umsjónarkennurum og tveimur stuðningsfulltrúum sem ferðuðust saman.

Gatorade bikarinn hefst í dag. Tindastólsmenn halda suður og spila þar við lið Hvíta Riddarans klukkan 19:15. Frítt er inn á leikinn og því eru allir stuðningsmenn Tindastóls fyrir sunnan hvattir til þess að skella sér á leik í Malbiksstöðinni að Varmá.

Þar sem hvítasunnuhelgin dróst að venju aðeins inn í vikuna þá fóru Sjónhorn og Feykir ekki suður í prentun fyrr en seinni partinn í gær og ættu því að fara í dreifingu á morgun, fimmtudag. Bæði blöðin eru þó að detta inn á netið og þeir sem eru með rafræna áskrift geta lesið Feyki á netinu og Sjónhornið er að sjálfsögðu öllum opið.

Fyrsta skemmtiferðaskip sumarsins heimsækir Hofsós á morgun, miðvikudaginn 27 maí, en einnig mun skipið stoppa fyrir utan Drangey. Fleyið ber nafnið MS Seaventure en um er að ræða lítið leiðangursskip fyrir siglingar á heimskautasvæðum eins og Suðurskautslandinu, Grænlandi, Íslandi og Svalbarða.

Síðastliðinn föstudag komu fulltrúar Kiwanisklúbbsins Drangeyjar og færðu öllum nemendum 1. bekkjar Höfðaskóla á Skagaströnd forláta reiðhjólahjálma og grilluðu í leiðinni pylsur fyrir nemendurna.

Tindastólsstúlkur héldu á Akranes í gær, mánudaginn 25. maí. Fyrir leik deildu heimakonur ÍA fimmta og sjötta sæti Lengjudeildarinnar með liði Völsungs. Heimakonur skoruðu sitt fyrsta mark þegar fimm mínútur voru eftir af fyrri hálfleik. Í lok leiks var staðan orðin 5-0 og Stólastúlkur héldu heim stigalausar.

Á ársfundi HSN 20. maí sl. voru í fyrsta sinn veittar viðurkenningar til starfsfólks sem hefur skarað fram úr í starfi og lagt sitt af mörkum til að gera HSN að enn betri vinnustað og öflugri þjónustuveitanda. Viðurkenningin ber heitið Fyrirmyndin okkar.

„Ég verð að viðurkenna vanþekkingu mína á Evrópusambandinu sem hér er að verða bara æpandi greinilega. Vegna þess að ég kannast ekki við ummæli Evrópusambandsins eða framkvæmdastjórnarinnar varðandi það að íslenzk stjórnsýsla sé of lítil til þess að geta tekizt á við Evrópusambandsaðild,“ sagði Dagbjört Hákonardóttir, þingmaður Samfylkingarinnar, í umræðum á Alþingi í vikunni um þingsályktunartillögu utanríkisráðherra um fyrirhugað þjóðaratkvæði um sambandið.