Fréttir

Allir tímar í inflúensubólusetningu eru uppbókaðir hjá Heilbrigðisstofnun Norðurlands á Sauðárkróki og Akureyri. Á heimasíðu stofnunarinnar kemur fram að þetta árið sé margfalt meiri eftirspurn en fyrri ár. „Þrátt fyrir að pantaðir hafi verið mikið fleiri skammtar en undanfarin ár þá er ljóst að það dugar ekki til og ekki mun meira berast til landsins að svo stöddu,“ segir á Hsn.is.

Á undanförnum árum hefur Sveitarfélagið Skagafjörður þrýst mjög á þingmenn og Vegagerðina um hröðun undirbúnings og framkvæmda við jarðgöng á milli Fljóta og Siglufjarðar og segir í bókun sveitarstjórnar að nú sem aldrei fyrr sé lífsnauðsynlegt að göngin komist til framkvæmda því jarðsig, skriðuföll og grjóthrun hefur verið með mesta móti á undanförnum misserum eins og þeir þekkja sem aka daglega um veginn. Tíðar jarðskjálftahrinur úti fyrir Tröllaskaga séu ekki heldur til að bæta ástandið.

Mogginn segir frá því að raf­bíla­fram­leiðand­inn Tesla muni í næstu viku opna nýja of­ur­hleðslu­stöð fyr­ir viðskipta­vini sína við Staðarskála í Hrútaf­irði. Alls verða átta hlöður á stöðinni en afl þeirra er 250 kW en það er fimm­falt það sem fyrstu hraðhleðslu­stöðvarn­ar sem sett­ar voru upp hér á landi gátu annað.

Riða á bæjunum Grænumýri í Blönduhlíð, Syðri-Hofdölum í Viðvíkursveit, og Hofi í Hjaltadal hefur verið staðfest. Sauðféð sem riðan greindist í kom frá Stóru-Ökrum þar sem riða var staðfest í síðustu viku.

Einn einstaklingur var skráður í einangrun á Norðurlandi vestra í dag eftir að hafa greinst með kórónuveiruna og í kjölfarið þurftu nokkrir að fara í sóttkví. Alls eru tólf manns í sóttkví í landshlutanum, flestir í dreifbýli Skagafjarðar eða tíu alls, en tveir eru í Austur-Húnavatnssýslu.

Kristján Þór Júlíusson, sjávarútvegs- og landbúnaðarráðherra, gerði á fundi ríkisstjórnarinnar í morgun grein fyrir stöðunni sem komin er upp í Skagafirði vegna staðfestrar riðuveiki í Tröllaskagahólfi en hinn 22. október sl. greindist riðuveiki á bænum Stóru- Ökrum 1. Matvælastofnun hefur undanfarna daga kortlagt frekari útbreiðslu veikinnar og niðurstöðu er að vænta seinna í dag hvort skera þurfi niður hátt í tvö þúsund fjár á Grænumýri, Syðri-Hofdölum og Hofi í Skagafirði vegna veikinnar.

Nú fer hver að verða síðastur að senda inn umsókn um stöðu framkvæmdarstjóra Selaseturs Íslands á Hvammstanga en umsóknir þurfa að berast fyrir 1. nóvember sem er næsti sunnudagur. Með þarf að fylgja afrit af prófskírteinum, ferilskrá og nöfn tveggja meðmælenda. Um er að ræða fullt starf í eitt ár með möguleika á framlengingu.

Matgæðingar í tbl. 29 árið 2018 voru þau Ármann Óli Birgisson og Matthildur Birgisdóttir sem eru fædd og uppalin hvort í sinni sýslunni, Austur-Húnavatnssýslu og Skagafirði. Þau búa á Blönduósi ásamt tveimur dætrum sínum og sögðu að markmið fyrir það sumar hafir verið að njóta og skapa fjölskylduminningar.

Maðurinn sem lést í vinnuslysi í malarnámu í Lambafelli aðfararnótt fimmtudagsins síðasta hét Jósef Guðbjartur Kristjánsson, fæddur þann 28. nóvember 1967. Jósef hélt heimili sitt ásamt eftirlifandi unnustu sinni, Hafdísi Jóhannsdóttur, að Bifröst í Borgarfirði. Hann lætur eftir sig níu börn á aldrinum frá 8 ára til 31 árs, barnabörn og forelda búsetta í Skagafirði.

Það hefur verið fremur óvenjulegt um að líta í Glaumbæ undanfarna mánuði, þar sem alla jafna má sjá margt um ferða-manninn og oftar en ekki fjöldinn af rútum á hlaðinu, en nú hefur verið heldur rólegra á safnsvæðinu vegna kórónuveirufaraldursins. Um tólf þúsund gestir hafa heimsótt Byggðasafn Skagfirðinga í Glaumbæ og Víðimýrarkirkju það sem af er þessu ári og er þetta um 68% fækkun miðað við sama tíma í fyrra. Réði þar fækkun erlendra ferðamanna mestu um. Það var okkur þó gleðiefni að Íslendingar voru duglegir að heimsækja safnið í sumar en í fyrra voru Íslendingar um 7% gesta safnsins en í ár um 27%. Tíminn mun svo leiða það í ljós hver staðan verður í árslok.