Fréttir

Í sumar hefur verið mikill gangur í byggingu verknámshúss við Blönduskóla en viðbyggingin er ein hæð og kjallari. Á heimasíðu Blönduóssbæjar kemur fram að nýja viðbyggingin tengist við ,,Gamla skóla“ og mun hýsa kennslustofur fyrir list- og verkgreinar á 1. hæð þ.e.a.s Heimilisfræði-, textíl-, smíða- og listnámsstofa en tæknirými og fleira er í kjallara.

Í grein frá Byggðasafni Skagfirðinga sem birtist í Feyki nú í vikunni kemur m.a. fram að heldur hafi verið rólegra á safnasvæðinu nú í sumar en undanfarin ár vegna kórónufaraldursins. Um 12 þúsund gestir hafa heimsótt Glaumbæ og Víðimýrarkirkju það sem af er árinu og er þetta um 68% fækkun miðað við sama tíma í fyrra.

Búið er að ganga frá ráðningu Benedikts Rafnssonar í starf veitustjóra Húnaþings vestra frá og með 1. nóvember nk. Benedikt er með BSc. próf í véla- og orkutæknifræði sem og meistararéttindi í vélvirkjun en frá þessu er greint á vef Húnaþings vestra.

Stólastúlkur fóru af stað í 1. deild kvenna um liðna helgi en nú er komið að strákunum að spretta úr spori. Annað kvöld hefst keppni í Dominos-deild karla og af því tilefni blés KKÍ til blaðamannafundar í Laugardalshöll sl. föstudag.

Á fundi stjórnar Landssambands hestamanna sl. mánudag var ákveðið að Landsmót færi fram á Hólum í Hjaltadal 2026 og verður gengið til samninga við Hestamannafélagið Skagfirðing um mótshaldið á grunni fyrirliggjandi samninga við Landsmót 2018, 2022 og 2024.

„Taktu þátt og hafðu áhrif“. Það getur þú gert með því að taka þátt í íbúakönnun landshlutanna sem er nú í gangi um allt land. Þetta er sagt vegna þess að hún hefur hingað til nýst okkur hjá landshlutasamtökunum í að meta og hafa yfirlit yfir raunverulega stöðu okkar á landsbyggðinni. Það hefur mótað áherslur í starfi okkar og breytt forgangsröð þess. Einnig hefur hún nýst inn í hverskonar stefnumótun sem landshlutasamtökin hafa þurft að fara í og leggur því línurnar inn í framtíðina sem er mikilvægt í málum sem vinna þarf stöðugt að yfir langan tíma. Og að síðustu hafa upplýsingarnar nýst okkur í hagsmunabaráttu fyrir landshlutana. Fólk tekur mark á upplýsingum sem koma frá miklum fjölda fólks þar sem söfnun og úrvinnsla er faglega unnin. Þegar menn setjast niður með gögn sem þessi er hlustað.

Amanda Oleander, listamaður frá Los Angeles, teiknar ótrúlega skemmtilegar myndir sem fanga hversdagsleikann bak við luktar dyr. Hann er oft á tíðum ekki glansandi fagur og virðist hún vita mikið um þessa hluti. Hún er óhrædd við að sýna það í verkum sínum eins og sjá má á Instagram síðunni hennar.

RIFF kvikmyndahátíð í Reykjavík var sett þann 24. september sl. og stendur fram á sunnudag, 4. október, en boðið er upp á úrval alþjóðlegra kvikmynda, viðburða og pallborðsumræðna í Bíó Paradís, Norræna húsinu og á netinu. Auk hefðbundinna bíósýninga í Bíó Paradís er boðið upp á yfir 100 myndir frá öllum heimshornum í gegnum netið. Á móti straumnum, mynd Óskars Páls Sveinssonar um transkonuna Veigu Grétarsdóttur sem siglir á kayak í kringum Ísland, verður frumsýnd nk. laugardag kl. 18.

Ferðamála-, iðnaðar- og nýsköpunarráðherra hefur kynnt frumvarp til laga um opinberan stuðning við nýsköpun í Samráðsgátt stjórnvalda. Í frumvarpinu eru lagðar til talsverðar breytingar á opinberu stuðningsumhverfi nýsköpunar á Íslandi. Í frumvarpinu felast áform um að starfsemi Nýsköpunarmiðstöðvar Íslands verður lögð niður, stofnaðir verða Nýsköpunargarðar með áherslu á stuðning við frumkvöðla og sprotafyrirtæki á sviði hátækni, framlög til nýsköpunar á landsbyggðinni verða aukin og nýr sjóður settur á fót fyrir rannsóknir í byggingariðnaði.

Skipulags-, umhverfis- og umferðarnefnd Blönduósbæjar tók fyrir á dögunum erindi frá Blönduósbæ um byggingar- og framkvæmdarleyfi fyrir göngubrú yfir í Hrútey.