Fréttir

Lionsklúbbur Skagafjarðar afhenti í gær sundlauginni í Varmahlíð hjartastuðtæki sem ekki var til á staðnum. Tækin hafa margsannað gildi sitt og því fannst Lionsmönnum ótækt að ekki væri til tæki í sundlauginni. Sigurður Guðjónsson, formaður klúbbsins, sagðist ánægður með að klúbburinn gæti hjálpað til með þetta. Ekki var safnað sérstaklega fyrir tækinu þar sem klúbburinn hefur tekjustofna sem renna í svona málefni og byggist á vinnuframlagi klúbbfélaga. Tækið kostar um 250 þúsund.

Leikskólinn Birkilundur í Varmahlíð fékk góða heimsókn í síðustu viku þegar konur úr Kvenfélagi Seyluhrepps komu þangað færandi hendi. Á aðalfundi félagsins var ákveðið að úthluta 100.000 króna styrk til bókakaupa fyrir leikskólann úr minningarsjóði Sigurlaugar Sigurðardóttur frá Fjalli. Í foreldrakaffi þann 10. apríl afhentu fulltrúar kvenfélagsins börnum og starfsfólki á hverri deild bækur sem keyptar voru fyrir styrkinn.

Nýtt famboð býður fram í Húnavatnshreppi í komandi sveitarstjórnarkosningum undir bókstafnum N. Ragnhildur Haraldsdóttir, Stóradal skipar fyrsta sæti listans, Sverrir Þór Sverrisson, Auðkúlu 3 er í öðru sæti og í þriðja sæti er Þóra Margrét Lúthersdóttir, Forsæludal. Björn Björnsson á Ytri-Löngumýri skipar 14. sætið, heiðurssæti listans.

Nú stendur yfir umræða um fjármálaáætlun ríkisstjórnarinnar. Þar er gert ráð fyrir sérstöku átaki í samgönguframkvæmdum á árunum 2019-2021, samtals um 16,5 milljarða króna. Áhersla verður á greiðar og öruggar samgöngur allt árið í þeim verkefnum sem unnin verða. Strax á fyrsta ári áætlunarinnar er aukningin til málefnasviðsins 4,3 milljarðar króna frá fjárlögum 2018. Ætlunin er að klára Dýrafjarðargöng og tvöfalda Kjalarnesveg. Unnið er að samgönguáætlun sem á að leggja fyrir í haust.

Íslandsmót yngri flokka í Júdó var haldið í Reykjavík sl. laugardag. Tindastóll átti þrjá fulltrúa sem komu heim með eitt brons og eitt silfur. Mótið var haldið í aðstöðu Ármanns í Laugardal og voru 111 keppendur skráðir til leiks frá níu júdófélögum, tveimur af Norðurlandi, þremur af Suðurnesjum, einu af Suðurlandi og þremur af höfuðborgarsvæðinu.

Kiwanisklúbburinn Drangey í Skagafirði verður 40 ára nú í maí og af því tilefni gaf klúbburinn glæsileg sjónvörp til Heilbrigðisstofnunarinnar á Sauðárkróki, fimm tæki á stofur á sjúkradeild og stórt tæki á Deild 2 . Öll tækin leysa af hólmi minni tæki sem fyrir voru og í því felst munurinn að áhorfendur njóta betur.

A-listi, Listi framtíðar í Húnavatnshreppi hefur verið ákveðinn fyrir sveitarstjórnarkosningarnar 26. maí næstkomandi. Jón Gíslason skipar fyrsta sæti listans, í öðru sæti er Berglind Hlín Baldursdóttir og Jóhanna Magnúsdóttir í því þriðja.

Stærðfræðikeppni Fjölbrautaskóla Norðurlands vestra, Menntaskólans á Tröllaskaga og 9. bekkjar fór fram í Fjölbrautaskóla Norðurlands vestra á Sauðárkróki sl. föstudag. Þetta er 21. árið sem keppnin er haldin en hún er samstarfsverkefni FNV, MTR , grunnskóla, stofnana og fyrirtækja á Norðurlandi vestra auk þess sem fyrirtæki utan kjördæmisins koma að verkefninu. Kennarar í stærðfræði við FNV báru hitann og þungann af samningu og yfirferð keppnisgagna en grunnskólarnir sáu um fyrirlögn dæmanna í undankeppninni sem fór fram í mars og tóku nemendur frá Norðurlandi vestra, Fjallabyggð og Dalvíkurskóla þátt í henni.

Sjálfstæðisflokkurinn í Skagafirði hefur opinberað framboðslista sinn til sveitastjórnakosninga þann 26. maí nk. Breytingar eru hjá efstu mönnum þar sem oddviti hans, Sigríður Svavarsdóttir, hættir og Gísli Sigurðsson, framkvæmdastjóri Tengils, sest í forustusætið. Regína Valdimarsdóttir, lögfræðingur hjá Íbúðalánasjóði tekur sæti Gunnsteins Björnssonar sem færist í þriðja sætið. Elín Árdís Björnsdóttir, hjúkrunarfræðingur, skipar fjórða sætið.

Aðalfundur Kaupfélags Skagfirðinga fór fram í Selinu í Kjötafurðastöð KS sl. laugardag að viðstöddu fjölmenni. Árið 2017 er stærsta einstaka fjárfestingaár í allri sögu félagsins sem námu allt að 14 milljarða króna. Í árslok voru dótturfélögin 14 talsins en nokkur þeirra mynda sjálf samstæðu með dótturfélögum sínum. Hagnaður félagsins var rúmir 2,3 milljarðar.