Fréttir

Stundum er betra að fresta hlutunum til morguns. Vegna kulda og bleytu frestum við vorhreinsun í kirkjugarðinum til morguns, föstudagsins 19. maí, milli klukkan fimm og sjö síðdegis. Samkvæmt veðurspánni á þá að vera komið hæglætis veður og hitastigið komið í tveggja stafa tölu.

Á fundi byggðaráðs Blönduósbæjar, sem haldinn var í gær, var samþykkt ályktun vegna þess óvissuástands sem skapast hefur í sjúkraflutningum í Austur-Húnavatnssýslu. Sex sjúkraflutningamenn í hlutastarfi hjá Heilbrigðisstofnun Norðurlands á Blönduósi, hafa sagt upp störfum vegna óánægju með kaup og kjör. Segja þeir að ósamræmi sé á milli launa hlutastarfandi sjúkraflutningsmanna innan starfssvæðis HSN.

Sveitarfélagið Skagafjörður bendir á það á vef sínum að varptími fugla er hafinn og eru hunda- og kattaeigendur beðnir að taka tillit til þess. Þeim tilmælum er beint til kattaeigenda að halda köttum sínum innandyra á nóttunni og hengja bjöllur á hálsólar þeirra. Minnt er á að kettir eru dugleg veiðidýr sem geta haft mikil áhrif á stofn þeirra fugla sem verpa í nágrenni við mannabústaði ár hvert. Eru því kattaeigendur vinsamlega beðnir að fylgjast með köttum sínum yfir varptímann og þar til ungar verða fleygir. Einnig eru hundaeigendur beðnir um að sleppa ekki hundum sínum lausum á varpsvæðum.

Í gær afhenti Oddfellowstúkan Sif á Sauðárkróki Heilbrigðisstofnun Norðurlands á Sauðárkróki LifePak 15 hjartastuðtæki frá Pysio Control. Hér er um fullkomið hjartastuðtæki að ræða með möguleika á hraðari greiningu og meðferð sjúklinga. Að sögn Herdísar Klausen yfirhjúkrunarfræðings, gefur tækið einnig möguleika til meiri inngripa en áður var hægt, betra er að fylgjast með skyndilega veikum einstaklingum og auðveldara er að fylgjast með árangri hjartahnoðs í endurlífgun

Það var frekar vetrarlegt um að litast í utanverðum Skagafirði þegar menn fóru á fætur í morgun. Í Fljótum var alhvítt þegar Halldór skólabílstjóri á Molastöðum lagði í hann og segist hann á Facebooksíðu sinni vera þakklátur fyrir að vera enn á nagladekkjunum.

Lögfræðingafélag Íslands ætlar í haust að efna til ferðar á slóðir síðustu aftökunnar á Íslandi og „endurupptaka“ mál þeirra Agnesar Magnúsdóttur vinnukonu á Illugastöðum og Friðriks Sigurðssonar frá Katadal. Þau voru dæmd til dauða og tekin af lífi við Þrístapa í Vatnsdalshólum þann 12. janúar 1830 fyrir að myrða þá Natan Ketilsson bónda á Illugastöðum og Pétur Jónsson vinnumann.

Búið er að velja þá 12 leikmenn sem munu skipa landslið karla og kvenna í körfubolta á Smáþjóðaleikunum, GSSE 2017, sem fara fram í San Marínó dagana 30. maí til 3. júní. Pétur Rúnar Birgisson leikmaður Tindastóls einn þeirra.

Annað kvöld, fimmtudag 18. maí kl. 20:00, verður aukasýning á söngleiknum Allt er nú til sem leiklistardeild Höfðaskóla á Skagaströnd frumsýndi í byrjun mánaðarins. Þegar hefur verið sýnt þrisvar sinnum fyrir þéttsetnu húsi og mjög góðar viðtökur ánægðra leikhúsgesta. Sýnt er í Félagsheimilinu Fellsborg.

Ég hef prófað margar uppskriftir af pönnukökum en þessi virðist eiga vinninginn hjá mér, lang bestar! Þetta er uppskrift sem ég sá á www.eldhussogur.is og eru einmitt, eins og hún segir sjálf á vefnum, eins og þessar sem maður fékk hjá ömmu í gamla daga:)

Ársreikningur Sveitarfélagsins Skagafjarðar fyrir árið 2016 var lagður fram til seinni umræðu á fundi sveitarstjórnar sl. mánudag. Rekstrartekjur námu á árinu 4.917 millj. króna af samstæðunni í heild. Þar af voru rekstrartekjur A-hluta 4.239 millj. króna. Rekstrargjöld samstæðunnar að frátöldum afskriftum og fjármagnsliðum voru 4.314 millj. króna, þar af A-hluti 3.913 millj. króna.