Fréttir

Rúv.is segir frá því að frímúrarastúkan í Skagafirði væri laus undan þeirri kvöð að deila eignarhaldi á húsi á Sauðárkróki með Kaupfélagi Skagfirðinga og fleirum. Frímúrararnir hafa fengið það staðfest með dómi að Sýslumaðurinn á Norðurlandi vestra hafi gert mistök fyrir tæpum sex árum þegar hann staðfesti samning um eignaskipti á húsinu.

Í sölum Salthússins á Skagaströnd, hinu nýja gistiheimili að Einbúastíg 3, hafa nú verið skipulagðar myndlistarsýningar á þessu ári og hefur sýningarrýmið fengið nafnið Salthús gallerí. Fyrsta sýning ársins verður opnuð í dag, fimmtudaginn 15. febrúar kl. 17.-19 og er það Mia Hochrein myndlistarkona, sem ríður á vaðið og sýnir þar myndaröðina „Lost Place,“ sem tekin var í Salthúsinu sumarið 2016.

Á Facebooksíðu Lögreglunnar á Norðurlandi vestra kemur fram að fálkinn sem handsamaður var af bændum á Hnjúki í Vatnsdal hafi verið með skotsár. Kom það í ljós eftir skoðun dýralæknis. Á síðunni segir að ekki eigi að þurfa að benda á það að fálkar eru að sjálfsögðu alfriðaðir.

Það hefur líklega ekki farið fram hjá mörgum að það er öskudagur í dag og eins og vandi er til fara ýmsar kynjaverur á kreik á slíkum degi. Blaðamaður Feykis var á ferð á Hofsósi í morgun og hitti fyrir þó nokkuð af uppáklæddu fólki og furðuverum.

Á Facebook má sjá færslu Grétars Ásgeirsonar, starfsmanns Vegagerðarinnar, sem er hugsi yfir þeim sem virða ekki lokanir vega þegar veður og færð bjóða ekki upp á annað. Hann segir að í gærmorgun klukkan 7:15 hafi hann verið kallaður út til að aðstoða við lokun Öxnadalsheiðar vegna brjálaðs veðurs einn daginn enn. Það hafi gengið vel en þegar mokstursbílar fóru af stað eftir hádegið voru bílar fastir sem töfðu opnun Öxnadalsheiðar.

Talsvert stuð var í morgun þegar skagfirsk börn heimsóttu Nýprent og Feyki, líkt og sennilega flest fyrirtæki og verslanir á Króknum, og sungu fyrir sælgæti. Það viðraði vel á krakkana á Króknum þó reyndar virtust flest vera með bílstjóra sér til halds og trausts – enda meira en að segja það fyrir litla kroppa að standa undir öllum þessum öskudagsgjöfum.

Íþróttahátíð Árskóla var haldin í gær með pompi og prakt. Að venju mættu krakkarnir í sína heimastofu samkvæmt stundaskrá og græjuðu sig fyrir daginn. Hefði er fyrir því að hver bekkur hafi sitt sérkenni sem búið er að ákveða með fyrirvara.

Á fundi sveitarstjórnar Blönduósbæjar í gær var lagður fram starfslokasamningur við Arnar Þór Sævarsson, bæjarstjóra. Starfslok Arnars Þórs verða frá og með 1. apríl 2018 en þá mun hann hefja störf sem aðstoðarmaður Ásmundar Einars Daðasonar, félags- og jafnréttismálaráðherra. Sveitarstjórn samþykkti samninginn með atkvæðum meirihlutans en minnihlutinn sat hjá.

Sigurður Rúnar Magnússon á Hnjúki í Vatnsdal, handsamaði fálka sem eitthvað var skaddaður lét þá Róbert Daníel Jónsson og Höskuld Birki Erlingsson lögreglumann á Blönduósi vita. Þeir fóru á staðinn og kíktu á fuglinn og úr varð að þeir tóku fálkann með sér á Blönduós höfðu samband við Náttúrufræðistofnun og sendu hann síðar í Húsdýragarðinn.

Föstudaginn 16. febrúar mun Hanna Björg Vilhjálmsdóttir, kynjafræðikennari og fyrirlesari, vera með fræðslu um jafnréttiismál í Félagsheimilinu Hvammstanga. Fræðslan er að frumkvæði jafnréttisnefndar Húnaþings vestra og verður í tvennu lagi: