Fréttir

Á fundi sveitarstjórnar Húnaþings vestra sl. þriðjudag var samþykkt að ráða Lúðvík Friðrik Ægisson, vélstjóra og BSc í véla- og orkutæknifræði, í starf sviðsstjóra veitu-, framkvæmda- og umhverfissviðs hjá sveitarfélaginu. Lúðvík er einn ellefu umsækjenda um starfið en einn dró umsókn sína til baka.

Aðalstjórn Ungmennasambands Skagafjarðar ákvað á fundi sínum 21. febrúar 2018 að lýsa yfir vilja félagsins, sem eins elsta íþrótta- og ungmennasambands landsins, til að eiga samstarf við ÍSÍ, UMFÍ og ráðuneyti íþróttamála um að tryggja sem best ofbeldislausa íþróttaiðkun fyrir alla. Í ályktuninni segir að aðalstjórn UMSS fagni þeirri umræðu og viðbrögðum sem #MeToo umræðan hefur leitt af sér og dáist af hugrekki þeirra einstaklinga sem stigið hafa fram fyrir skjöldu til að opinbera svo alvarleg vandamál. Að sama skapi vottar stjórnin öllum þolendum ofbeldis samúð sína.

Aðalfundur Fjárræktarfélags Sveinsstaðahrepps var haldinn á Blönduósi þann 19. febrúar síðastliðinn. Á fundinum var samþykkt ályktun þar sem aðalfundurinn mótmælir harðlega því verði sem SAH-afurðir greiddu fyrir sauðfjárafurðir síðastliðið haust og skorar á fyrirtækið að greiða sambærilegt verð og aðrar afurðastöðvar gera.

Þrekmótaröðin 2018 fór fram um síðustu helgi í íþróttahúsinu í Digranesi í Kópavogi. Tveir keppendur úr Skagafirði náðu góðum árangri, þau Guðrún Helga Tryggvadóttir Þreksporti og Ægir Björn Gunnsteinsson Crossfit 550.

Listamiðstöðin Nes á Skagaströnd verður með opið hús í dag, föstudag 23. febrúar. Þar munu þeir átta listamenn sem hafa dvalið í miðstöðinni þennan mánuðinn sýna verk sín sem eru af ýmsum toga, s.s. málverk, útsaumur, teikningar og ljósmyndir.

Pétur Rúnar Birgisson, leikmaður Tindastóls, er í liði Íslands sem mætir Finnum í dag í fyrri leik íslenska karlalandsliðsins í undankeppni HM 2019 í körfubolta. Leikurinn hefst kl. 19:45 í Laugardalshöllinni og verður hann sýndur beint á RÚV2. Á vef KKÍ segir að von sé á góðri stemmningu á leiknum og miklum stuðningi við íslenska liðið sem er eins gott því 50 finnskir áhorfendur eru komnir til landsins til að styðja við bakið á sínu liði í Höllinni.

Vegagerðin vill vekja athygli vegfarenda á því að slitlag er víða illa farið eftir veturinn og þá umhleypinga sem verið hafa undanfarið. Þegar snjóa leysir koma þessar skemmdir í ljós og vinnur Vegagerðin að því að bæta þær eins fljótt og kostur er en vegna þess hve þær eru umfangsmiklar er ekki unnt að lagfæra allt samstundis. Vegfarendur eru því beðnir að aka með gát og vera viðbúnir hugsanlegum skemmdum í slitlagi, hvort heldur sem er í malbiki eða klæðningu.

Á heimasíðu BioPol á Skagaströnd segir frá því að undanfarið hafi nemendur Höfðaskóla komið í heimsóknir í tengslum við náttúrufræðikennslu skólans. Undanfarið hafa krakkarnir verið að fræðast um þörunga, jafnt stóra sem smáa, en BioPol er einmitt að fást við nokkrar rannsóknir á því sviði. Krakkarnir skoðuðu ýmsa smáþörunga á rannsóknarstofunni og fengu fræðslu um fæðuvefi og flokkunarfræði.

Uppbygging ehf., félag í eigu Engilberts Runólfssonar byggingaverktaka, hefur óskað eftir viðræðum við sveitarstjórn Blönduósbæjar um sameiginlega uppbyggingu á fjölbýlishúsi að Hnjúkabyggð 29 á Blönduósi. Á Húna.is. kemur fram að óskað sé eftir því að gert verði samkomulag við félagið um langtímaleigu eða kaup sveitarfélagsins á allt að 8-10 íbúðum í hinu nýja fjölbýlishúsi. Byggðaráð Blönduósbæjar hefur hafna erindinu.

Leikfélag Sauðárkróks hefur boðað til fundar vegna sæluvikuleikrits í kvöld, fimmtudagskvöldið 22. febrúar klukkan 20:00 í húsnæði Puffins and fiends á Aðalgötu 26. Allir sem áhuga hafa á að taka þátt í uppsetningu leikrits eru boðnir velkomnir. Það er í mörg horn að líta við uppsetningu leikrita og eru því allar hendur þegnar til að smíða, mála, vinna við hljóð og ljós, finna og föndra leikmuni og búninga, sauma, hvísla, selja miða og margt fleira.