Fréttir

Eva Pandora Baldursdóttir frá Sauðárkróki leiðir lista Pírata í Norðvesturkjördæmi í komandi aþingkosningum. Þetta er niðurstaða úr endurteknum kosningum á röðun á listans en áður hafði listinn verið kærður til úrskurðarnefndar flokksins og honum hafnað í staðfestingarkosningu Pírata á landsvísu. Alls greiddu 277 atkvæði í kosningunum og valið stóð á milli 11 frambjóðenda.

Í nýjum Feyki sem kom út í dag kennir ýmissa grasa. Í aðalviðtali er Einar Kristinn Guðfinnsson, forseti Aþingis sem brátt lætur af störfum eftir áratuga farsælt starf. Hann segir m.a. frá því þegar hann laumaðist á kaffistofu fiskvinnsluverkstjórans og hringdi í ritstjóra Vísis og bað um vinnu sem blaðamaður. Þá ræðir hann um pólitíkina og þær breytingar sem hafa átt sér stað á þeim vettvangi og svo það sem honum er mikið hugleikið, tengsl hans við Skagafjörð.

Á ferðum mínum undanfarna daga hefur fólk hvarvetna kvartað yfir lélegri póstþjónustu. Bréf, blöð og bögglar koma seint á leiðarenda og fólk í fjarlægari byggðum á í miklum erfiðleikum að koma póst sendingum frá sér með eðlilegum hætti. Ítrekað hefur verið ályktað um þessi mál og ég tekið þau upp á sveitarstjórnar - og á landshlutavettvangi. Við þekkjum vel baráttu íbúa hér í Skagafirði og í öðrum landshlutum fyrir pósthúsinu sínu. Stefna stjórnvalda í póstmálum hefur hinsvegar verið sú að skera þjónustuna niður, fækka pósthúsum og dreifidögum. Þá hefur verið verulega vegið að héraðsfréttablöðum sem þjónusta landsbyggðina. Fyrir dreifingu á blöðum eins og Feyki og Skessuhorninu þarf að borga með öllum afsláttum um 117 kr. á hvert blað á meðan aðeins þarf að greiða um 12 kr. fyrir fríblöð sem send eru á hvert heimili.

Á morgun, fimmtudaginn 8. september er Bókasafnsdagurinn en hann er haldinn til að vekja athygli á mikilvægi bókasafna í samfélaginu og einnig fyrir starfsfólk safna til þess að gera sér dagamun. Í tilkynningu frá Héraðsbókasafni Skagfirðinga segir að eitt og annað verði gert sér til dundurs flestum til ánægju

Blóðbankabíllinn verður á Sauðárkróki við Skagfirðingabúð í dag frá kl. 12:00-17:00 og á morgun fimmtudaginn 08.sept. frá kl. 09:00-11:30. Þá fer hann á Blönduós og verður við N1 frá kl. 14:00-17:00. Til að mæta þörfum samfélagsins þarf Blóðbankinn um 16.000 blóðgjafa á ári eða 70 blóðgjafa á dag svo það er um að gera að mæta og gefa blóð.

Nafn: María Gréta Ólafsdóttir. Árgangur: 1956. Hvað er í deiglunni: Það helsta er að við stefnum á að flytja á Krókinn aftur eftir 16 ár í Hjaltadal og þurfum því að selja húsið okkar í sveitinni, með nokkurri eftirsjá reyndar. Hver var mikilvægasta persóna síðustu 100 ára að þínu mati? Rosa Parks, þeir sem ekki þekkja þetta nafn ættu að kynna sér það, þetta var ein merkilegasta kona allra tíma.

Stelpurnar í meistarflokki Tindastóls taka á móti Keflavík í úrslitakeppni 1. deildar á Sauðárkróksvellli í dag. Um seinni viðureign liðanna er að ræða og hrein úrslit verða að nást. Fyrri leikur liðanna fór fram sl. sunnudag í Keflavík og þar höfðu heimastúlkur betur í spennandi leik 3-2 svo 1-0 sigur dugar fyrir okkar stelpur með fleiri mörk skoruð á útivelli.

Lokamót Norðurlandsmótaraðar barna og unglinga fór fram á Jaðarsvelli á Akureyri sunnudaginn 4. september s.l. Að venju átti Golfklúbbur Sauðárkróks marga þáttakendur í öllum flokkum sem keppt var í. Þá voru einnig krýndir Norðurlandsmeistarar í öllum flokkum og þar átti Golfklúbbur Sauðárkróks tvo sigurvegara.

Endurtektarkosning fyrir röðun á framboðslista Pírata í Norðvesturkjördæmi stendur yfir og lýkur kosningu á hádegi á morgun, 7. september. Ellefu frambjóðendur gefa áfram kost á sér en bæði Þórður Guðsteinn Pétursson, sem kosinn var efstur á lista í prófkjörinu, og Halldóra Sigrún Ásgeirsdóttir, kapteinn Pírata á Vestfjörðum, hafa ákveðið að gefa ekki kost á sér í endurkosningunni.

Sveitarfélagið Skagafjörður tekur ekki þátt í Útsvari, Spurningakeppni sveitarfélaga, í Ríkissjónvarpinu í vetur. Á vef Sveitarfélagsins Skagafjarðar kemur fram að líkt og síðustu ár keppa 24 sveitarfélög í Útsvari, þau átta lið sem komust í fjórðungsúrslit síðasta vetur eru sjálfskrafa með þennan veturinn. Hin sextán eru dregin út eftir stærð sveitarfélaganna og var Sveitarfélagið Skagafjörður ekki dregið út að þessu sinni.