Fréttir

Gunnar Bragi Sveinsson sjávarútvegs- og landbúnaðarráðherra hefur úthlutað alls 11.257 tonnum í sértækan og almennan byggðakvóta en ráðstöfunin byggir á þingsályktun 38/145, 2015-2016. Sértækur byggðakvóti Byggðastofnunar eykst um 733 tonn frá fyrra fiskveiðiári og er 5.634 tonn fiskveiðiárið 2016/2017. Stefna stjórnvalda undanfarin ár hefur verið að auka vægi sértæks byggðakvóta enda hefur hann almennt reynst vel sem byggðafestuaðgerð.

Tindastóll fékk framlágt lið Snæfells í heimsókn í Síkið í kvöld og unnu stórsigur eins og vænta mátti. Stólarnir náðu strax góðri forystu og það var augljóst frá fyrstu mínútu að gestirnir voru ekki líklegir til að veita mikla mótspyrnu. Staðan í hálfleik var 49-21 og hálfgerð þolraun fyrir áhorfendur að komast í gegnum seinni hálfleikinn sem var óskeppandi með öllu. Lokatölur 100-57.

Frá og með þessari viku mun Sjónhornið, sem hingað til hefur verið ómissandi auglýsingamiðill í Skagafirði, verða einnig borið út á öll heimili í Húnavatnssýslum.

Um þessar mundir fagnar Gísli Þór Ólafsson 10 ára útgáfuafmæli, en hans fyrsta ljóðabók, Harmonikkublús, kom út árið 2006. Í kjölfarið komu út fjórar ljóðabækur og fjórir hljómdiskar. Í bókinni,sem nefnist Safnljóð 2006-2016, er úrval ljóða og texta úr bókunum og af hjómdiskunum. Að sögn Gísla Þórs er stefnt á útgáfu eftir nokkrar vikur.

Í kvöld fer fram leikur Tindastóls og Snæfells í Dominos deild karla í körfu. Leikurinn fer fram í Síkinu á Sauðárkróki og hefst kl. 19:15. Allir eru hvattir til að mæta á staðinn og fjölmenna á bekkina en þeir sem lengra eru geta séð leikinn í beinni útsendingu á TindastóllTV. Útsending hefst kl. 18:50.

Árlegur Elínborgardagur Höfðaskóla á Skagaströnd var haldinn hátíðlegur í gær. Dagurinn er haldinn í tilefni Dags íslenskrar tungu sem er 16. nóvember á fæðingardegi Jónasar Hallgrímssonar og haldinn hefur verið hátíðlegur í skólum landsins frá árinu 1996.

Á miðvikudaginn í næstu viku verður boðið til dagskrár um Bólu-Hjálmar í tilefni af Degi íslenskrar tungu. Það eru Skagfirski kammerkórinn, nemendur 7. bekkjar í Varmahlíðarskóla og Kór eldri borgara sem koma fram á skemmtuninni, sem verður að Löngumýri kl. 20 um kvöldið.

Herdís Ólína Hjörvarsdóttir rannsóknarmaður hjá Iceprotein á Sauðárkróki varð á dögunum Evrópumeistari í Qigong 2016. Qi-gong (borið fram tsí-gong) er kínversk heilsuíþrótt byggð á 5000 ára heimildum og hefðbundnum kínverskum lækningaaðferðum.

Á ársþingi SSNV í lok október kom fram í ræðu framkvæmdastjóra samtakanna að samþykkt hefði verið að framkvæma íbúakönnun á starfssvæði samtakanna. Í könnuninni var spurt um ýmsa búsetuþætti á svæðinu. Einnig var spurt um viðhorf til iðnaðaruppbyggingar við Hafursstaði. Fram kom að verið væri að vinna úr svörum við könnunni og niðurstöður hennar yrðu kynntar fljótlega.

Þeir voru nokkuð óhressir íbúarnir á Sauðárkróki sem fengu óskiljanlega kveðju inn um bréfalúguna hjá sér eitt kvöldið í vikunni. Gefið var til kynna að Píratar stæðu að baki sendingunni.