Fréttir

Mælavæðing vegna hitaveitu í þéttbýliskjörnum er vel á veg komin. Á fundi veitunefndar sveitarfélagsins í síðustu viku var farið yfir stöðu mála og þar kom fram að búið er að setja upp í allt um 650 mæla.

Það sem af er vetri hefur tíðarfarið verið mjög gott til skíðaiðkunar í Tindastóli. Viggó Jónsson staðarhaldari segir að veðurfarslega hafi veturinn verið með eindæmum hagfelldur - ekki mikið um umhleypingar, nóg af snjó í fjallinu og mjög gott færi.

Fyrirhugað er að halda reiðhallarsýningu Þyts, Hestar fyrir alla, föstudaginn 18. mars næstkomandi. Sýningin verður haldin í samstarfi æskulýðsnefndar Þytsog annarra félagsmanna og vonast nefndin auðvitað eftir góðum undirtektum félagsmanna. „Til að halda sýningu verðum við að hafa atriði og þess vegna leitum við til ykkar félagsmenn góðir, sem og annarra áhugasamra,“ segir á vef Hestamannafélagsins Þyts.

Í tilkynningu frá Félagi ferðaþjónustunnar í Skagafirði er minnt á súpufund sem félagið stendur fyrir í hádeginu næstkomandi miðvikudag og hefst hann klukkan 12. Á fundinum verður fjallað um markaðssetningu ferðaþjónustufyrirtækja og mikilvægi þess að standa vel að þeim málum.

Miklar framkvæmdir hafa staðið yfir við Kvennaskólann á Blönduósi undanfarnar vikur þar sem unnið er að endurnýjun á húsum við Árbraut 33 og 35. Húsin verða svo notuð til að hýsa listamenn á vegum Textil listamiðstöðvarinnar í Kvennaskólanum þegar framkvæmdum er lokið.

Annað kvöld Húnvetnsku liðakeppninnar var haldið í reiðhöllinni á Hvammstanga sl. föstudagskvöld. Á vef hestamannafélagsins Þyts segir að um skemmtilegt kvöld hafi verið að ræða, margir frábærir hestar og knapar sýndu listir sínar. Það var Fjólubláa liðið sigraði kvöldið og náði sér í 65,2 stig.

Fulltrúar Bændasamtaka Íslands og sjávarútvegs- og landbúnaðarráðherra og fjármála- og efnahagsráðherra fyrir hönd ríkissjóðs skrifuðu undir nýja búvörusamninga sl. föstudag. Um er að ræða rammasamning um almenn starfsskilyrði landbúnaðarins og samninga um starfskilyrði garðyrkju, nautgriparæktar og sauðfjárræktar á árunum 2017 til 2026.

Sýningin „Mitt er þitt og þitt er mitt – konur á fyrri tíð“ opnaði á Byggðasafni Húnvetninga og Strandamanna sunnudaginn 14. febrúar. Á sýningunni er fjallað um líf kvenna á Íslandi á fyrri tíð. „Áhugaverð sýning sem dregur frásagnir af konum á safnasvæðinu fram í dagsljósið,“ segir um sýninguna á vef Norðanáttar.

Fyrsti fundur ársins hjá svokölluðum Prjónagröffurnum á Blönduósi verður í dag, mánudaginn 22. febrúar, í Félagsheimilinu á Blönduósi. Fundurinn hefst kl. 20:00. „Spjöllum saman um spennandi tíma framundan - handverksmarkað, prjónahátíð og að sjálfsögðu prjónagraffið okkar,“ segir í tilkynningu á húna.is.

Sveitarfélagið Skagafjörður hefur auglýst eftir kaupendum að „gamla barnaskólahúsinu“ við Freyjugötu á Sauðárkróki. Skilyrði er að kauptilboði fylgi greinargerð um fyrirhugaða framtíðarnotkun kaupanda ásamt tímasettri framkvæmda- og fjárhagsáætlun. „Sveitarfélagið mun setja sem skilyrði í kaupsamningi að vinnu við frágang húss að utan s.s. við þak, veggjaklæðningu, glugga, gler, útihurðir og lóð verði lokið innan tveggja ára frá undirritun kaupsamnings,“ segir í auglýsingu á vef sveitarfélagsins.