Fréttir

Í febrúar kom út skýrsla um frumhönnun endurreisnar þjóðmenningarstaðarins Hóla í Hjaltadal. Höfundur skýrslunnar er Arna Björg Bjarnadóttir en skýrslan er unnin fyrir Hólastað með stuðningi frá Framkvæmdasjóði ferðamannastaða. Feykir tók tal af þeim Hólmfríði Sveinsdóttur, rektor Háskólans á Hólum, sr. Gísla Gunnarssyni vígslubiskupi Hólastiftis, Magnúsi Barðdal verkefnastjóra hjá SSNV og Örnu Björgu Bjarnadóttur verkefnastjóra verkefnisins Hólar í Hjaltadal – Endurreisn þjóðmenningarstaðar í tilefni af útgáfu skýrslunnar og var birt í tlb 9.

Í byrjun janúar tók Þórunn Ýr Elíasdóttir við starfi kaupfélagsstjóra Kaupfélags Vestur-Húnvetninga en forveri hennar var Björn Líndal Traustason. Þórunn Ýr kemur frá Reykjavík, var ættleidd frá Kóreu, og ólst upp í Breiðholtinu. Eiginmaður hennar heitir Guðni Már Egilsson og eiga þau sex börn, þrjú tengdabörn og átta barnabörn. Þegar Þórunn Ýr kláraði framhaldsskóla lagði hún stund á nám við Háskólann í Reykjavík þar sem hún útskrifaðist með diplómu í fjármálum og rekstri.

Karlalið Tindastóls í fótboltanum spilaði síðasta leik sinn í Lengjubikarnum í gær en þá fengu þeir lið Kríu í heimsókn á græna flauelsdúkinn á Króknum. Leikurinn átti að fara fra, um liðna helgi en var þá frestað vegna snjóa og veðurs. Úr varð spennuleikur en bæði lið höfðu unnið alla sína leiki í riðli 4 í C-deild Lengjubikarsins. Það fór á endanum svo að Kría hafði betur, gerðir þrjú mörk en lið Tindastóls tvö.

Sigurlaug Guðmundsdóttir, oftast kölluð Silla kemur frá Keflavík, þar er hún fædd og uppalin. Eins og margir aðrir byrjaði Silla sína vinnu í fiski og starfaði líka lengi í mötuneyti hjá Varnarliðinu á Keflavíkurflugvelli. Síðan í mötuneyti á Reyðarfirði, Þeistareykjum og á Húsavík. Silla flutti á Hofsós 2017 og býr með manni sínum, Kristjáni Jónssyni frá Óslandi. Á Hofsósi finnst þeim yndislegt að vera. Silla starfar í sundlauginni á Hofsósi og hefur einnig tekið að sér afleysingar í mötuneyti í Grunnskóla austan Vatna og Leikskólanum Tröllaborg.

Steindór Árnason trillukall er fæddur á Króknum og átti heima á Reykjum á Reykjaströnd fyrstu æviárin. Steindór býr núna í gamla læknishúsinu í Skógargötunni á Króknum ásamt henni Jónu sinni. Steindór var til í að rifja upp fermingardaginn.

Amber Monroe, fædd og uppalin í Bandaríkjunum, kom fyrst til Íslands árið 2017 og varð ástfangin af landinu. Þetta var einhvers konar „a-ha móment þar sem ég vissi að ég hefði fundið staðinn sem ég vildi vera á. Fólkið hérna er svo indælt og náttúran svo sérstök."

Í Raftahlíðinni á Króknum býr Hafdís Hrönn Bjarkadóttir níu ára stelpuskott, ásamt móður sinni, Stefaníu Ósk, föður, Bjarka Þór, og yngri systur, Ásdísi Pálu. Hafdís Hrönn er svo heppin að eiga litla hvíta Miniture schnauzer eða dvergschnauzer tík sem heitir Hneta.

Það skiptast á skin og skúrir í körfuboltanum. Síðasta vor flugu Stólar og stuðningsmenn með himinskautum. Nú á liðið einn og einn góðan leik og þrátt fyrir að Stólarnir hafi aldrei haft jafn öflugan leikmannahóp á sínum snærum er átakanlegt að horfa á liðið kasta frá sér sigri sí ofan í æ. Í dag endurtók sagan sig á Egilsstöðum þar sem lið Hattar snéri leiknum við í fjórða leikhluta og skaust upp fyrir lið Tindastóls í deildinni og tryggði sér um leið sæti í úrslitakeppninni. Lokatölur 87-82 og nú er staðan sú að ef Höttur vinnur sinn leik í lokaumferðinni og Stjarnan og Tindastóll sína, þá eru meistararnir komnir í sumarfrí, en tapi Höttur þá fer Stjarnan í frí. Það verða því nagaðar neglur næstu daga í Skagafirði og víðar.

Matgæðingar vikunnar i tbl. 18 í fyrra voru Eiður Baldursson og Þórey Gunnarsdóttir í Fellstúninu á Króknum. Eiður og Þórey eiga og reka Grettistak veitingar en Þórey er einnig grunnskólakennari og vinnur við það. Þau eiga saman fjögur börn, Söndru Sif, Sólveigu Birtu, Arnar Smára og Árdísi Líf. Eiður var ekki lengi að taka ákvörðun um hvað ætti að bjóða upp á í þessum matarþætti og fáum við hér uppskriftir að grafinni gæs og hægeldaðri bleikju. 

Þórður Karl Gunnarsson fæddist á Siglufirði á því herrans ári 1985 en flutti svo á Krókinn árið 1990. Þórður, sem býr í Eyrartúninu á Sauðárkróki, er giftur Arneyju Sindradóttur og eiga þau saman þrjú börn, þau Gunnar Atla, Ólaf Bjarna og Eldeyju Sif. Foreldrar Þórðar eru Auður Haraldsdóttir og Gunnar Björn Rögnvaldsson. Þórður vinnur á Stoð verkfræðistofu ehf.