Fréttir

Framundan er Unglingalandsmót á Sauðárkróki um verslunarmannahelgina. Landsmótið er frábært tækifæri til að hittast og styðja við íþróttastarf Tindastóls. Ég hvet félagsmenn, foreldra, stuðningsmenn og velunnara til að skrá sig í sjálfboðaliðastarf fyrir sína deild. Hvert framlag skiptir máli og hjálpar okkur að skapa góða upplifun fyrir gesti og þátttakendur.

Dagana 6. til 10. júlí fór fram námskeið í Verknámshúsi FNV sem sneri að eldsmíði og íslenskri menningu. Námskeiðið var auglýst á vegum UNESCO og tvær konur sóttu það, þær komu frá Bandaríkjunum og Finnlandi. Þetta er í fyrsta skipti sem slíkt eldsmíðanámskeið fyrir konur er haldið hjá FNV. Björn Sighvatz, kennari námskeiðsins, sagði í samtali við Feyki að ferlið hafi gengið einstaklega vel og hann vonist til þess að halda slík námskeið aftur.

Enn eitt árið ætla íbúar í Húnabyggð að blása til gleði á Húnavöku. Framundan eru skemmtilegir dagar með fjölbreyttri dagskrá fyrir alla aldurshópa. Hvort sem þú vilt njóta tónlistar, kíkja á viðburði með fjölskyldunni, hitta fólk eða taka þátt í því sem er í boði, þá er eitthvað fyrir alla.

Halldór Gunnar Háldánsson bóndi á Molastöðum í Fljótum heldur úti skemmtilegri facebook síðu sem nefnist: Sveitin okkar Fljótin. Þar birtir Halldór ýmsan fróðleik úr Fljótunum og oft verulega góðar ljósmyndir en Halldór er lunkinn ljósmyndari.Nú á dögunum birti Halldór þessa frásögn um höfðinglega gjöf:

Á vefsíðu Skagafjarðar kom fram að sveitarfélagið Skagafjörður hefur staðfest nýjar reglur um úthlutun sérstakra hvatapeninga sem ætlað er að styðja við þátttöku barna í íþrótta- og tómstundastarfi. Markmið reglnanna er að auka jöfnuð og tryggja að börn frá tekjulágum heimilum hafi jafnan aðgang að skipulögðu frístundastarfi.

Nú blómstra garðar eins og enginn sé morgundagurinn. Í Húnabyggð eru Umhverfisverðlaun veitt sem viðurkenning til einstaklinga fyrir fallega og vel hirta garða og fyrir snyrtilegt umhverfi. Umhvefisnefnd Húnabyggðar óskar eftir ábendingum um hverjir eiga að hljóta viðurkenninguna en veittar eru viðurkenningar fyrir garða eða umhverfi í þéttbýli og í dreifbýli.

Húnvetningurinn Bára Grímsdóttir er tónskáld mánaðarins hjá Tónlistarmiðstöð Íslands. Bára er í dag eitt af fremstu tónskáldum þjóðarinnar og hefur átt stóran þátt í að miðla íslenskri þjóðlagaarfleifð, bæði hér heima og erlendis.

Dagana 11.-18. júní voru 3. flokks Stólastúlkur í fótbolta, staddar í Barcelona þar sem þær kepptu á Barcelona Cup. Liðið keppti fjóra leiki í heildina, sem hefðu átt að vera fimm en eitt lið mætti ekki til leiks. Þær stóðu sig ótrúlega vel og enduðu mótið í öðru sæti. Feykir heyrði í Benjamín Jóhannesi Vilbergssyni og fékk hann til að segja frá ferðinni.

Það er mikið framkvæmt í Húnabyggð þetta sumarið og það fer ekki framhjá nokkrum manni sem á annað borð fylgist með Valdimar Guðmannssyni á Facebook – eða Valla í Húnabyggð. Hann er alltaf tilbúinn að halda nafni Húnabyggðar hátt á lofti og því datt Feyki í hug á fimmtudaginn að það væri reynandi að plata hann til að safna saman nokkrum nokkrum myndum og útbúa framkvæmdafrétt. Það þurfti ekki spyrja hann tvisvar.

Það var bragðdaufur bragðarefur í boði á Blönduósi í dag þegar lið Kormáks/Hvatar tók á móti liði Víkings frá Ólafsvík í gulri viðvörun. Eftir að hafa borið sigurorð af Víkingum tvívegis í sumar þá náðu gestirnir að loka markinu sínu og það gerðu Húnvetningar líka. Það var því markalaust og liðin, sem bæði sigla lygnan sjó um miðja deild, máttu sættu sig við að skiptast á jafnan hlut.