Fréttir

Unglingalandsmótið var sett af glæsileik í gærkvöldi og er stemningin í bænum í hámarki. Rúmlega 1.000 keppendur eru mættir til leiks og er áætlað að um 5.000 til 6.000 manns séu nú saman komnir í Skagafirði. Setningarathöfnin heppnaðist vel. Hefð er fyrir því að keppendur gangi hring á frjálsíþróttabrautinni undir merkjum sinna íþróttahéraða. Þau Ernir Daði Arnbergz og Emilíana Lillý Guðbrandsdóttir stýrðu athöfninni.

Það er jafn víst og það koma jól að það kemur Ábæjarmessa einu sinni á ári. Og það er einmitt að gerast um næstu helgi. Þessi árlega messa á sér fastan vinahóp sem mætir á hverju ári og alltaf bætast nýjir vinir í hópinn.

Nóg verður um að vera á Norðurlandi vestra næstu vikurnar og ættu allir að geta fundið eitthvað við sitt hæfi. Núna er Unglingalandsmót UMFÍ á Sauðárkróki og Norðanpaunk á Laugarbakka um helgina, en vikuna eftir taka við Króksmótið, Molduxi Trail og Hinsegin dagar í Skagafirði.

Á heimasíðu SSNV kemur fram að nú styttist í að umsóknarfrestur vegna Skúnaskralls – barnamenningarhátíðar Norðurlands vestra renni út, en tekið verður við umsóknum til og með 10. ágúst.

Ísjaki sást í miðjum Skagafirði í morgun og sást hann vel úr Fljótunum. Jakinn virðist vera á ferð til suðvesturs og er því að fjarlægjast land í augnablikinu en líklegt er að hann bráðni á næstu dögum. 

Í dag mun dagskrá Unglingalandsmótsins vera alveg frá kl. 08:00 til kl. 23:00 og nóg verður um að vera á Króknum. Á keppnisdagskránni er badminton, grashandbolti, fótbolti, pílukast, stafsetning og glíma. Í boði fyrir alla fjölskylduna er t.d. fyrirlestur Margrétar Viðarsdóttur næringarfræðings, fjöruhlaup þar sem boðið verður upp á 5 km og 7 km, Latibær mætir á svæðið, fjölskyldufjör í íþróttahúsinu og síðan mun DJ Ragga Hólm enda kvöldið í partítjaldinu. Fólk er hvatt til þess að kíkja á dagskrána, en fyrst fékk Feykir Blönduósinginn Birgi Stein til þess að segja frá því hverju hann er spenntastur fyrir á mótinu. Birgir er á ellefta ári, sem þýðir að hann er að keppa á sínu fyrsta Unglingalandsmóti.

Athygli bæjarbúa og gesta er vakin á því að búið er að setja upp tímabundnar þrengingar á Skagfirðingabraut á Sauðárkróki. Aðgerðirnar eru liður í því að draga úr aksturshraða og tryggja öryggi á svæðinu.

Þá er komið að stórmótinu sem Unglingalandsmótið er, tjaldsvæðið á Nöfunum er að fyllast og setmningin er mikil. Í dag er keppt í alls kyns greinum eins og golfi, krakkahreysti og júdó. Mótið mun þó fara á fullt á morgun þar sem dagskráin verður stút full frá átta um morguninn til ellefu um kvöldið. Kvölddagskráin í partítjaldinu er heldur betur spennandi einnig en hægt er að taka þátt í danskeppni þar sem gleðin ræður ríkjum. Baldvin Orri Dagsson frá Víðiholti í Skagafirði ætlar að keppa í þremur greinum með liðinu Mjólkurbottarnir. Baldvin sem er alveg að verða tólf ára er að taka þátt á fyrsta Unglingalandsmótinu sínu.

Á heimasíðu Húnaþings vestra kom fra að í lok árs 2024 tók Leigufélagið Bríet yfir fjórar íbúðir í eigu Húnaþings vestra á Gilsbakka á Laugarbakka. Hluti af samkomulaginu um yfirtöku eignanna var að Bríet réðist í endurbætur á húsunum og gerði upp íbúðirnar sem voru komnar á nokkuð viðhald. Leigufélagið hefur nú lokið við endurbætur á fyrstu íbúðinni og standa yfir sprunguviðgerðir að utan. Sömuleiðis er gert ráð fyrir að húsin verði máluð með haustinu.

Í 15. umferð 2. deildar karla mættust Kári og Kormákur/Hvöt í Akraneshöllinni þann 29. júlí. Leiknum lauk með 1-1 jafntefli, sem var sjötta jafntefli Kormáks/Hvatar á tímabilinu. Eftir leikinn situr liðið í sjötta sæti deildarinnar með 21 stig – fimm sigra, sex jafntefli og fjögur töp.