Íþróttir

Pétur Rúnar Birgisson íþróttamaður Skagafjarðar og Israel Martin besti þjálfarinn að mati dómnefndar voru færðir bikarar og viðurkenningaskjöl á æfingu. Þá fékk meistaraflokkur karla tilnefningu sem lið ársins. Þar sem engin miskunn er gefinn í íþróttunum þegar ná á árangri komust þeir Pétur Rúnar og Israel Martin hvorugur á afhendingu viðurkenninga hjá UMSS í kvöld en athöfnin fór fram í Húsi frítímans á Sauðárkróki. Eftir að formaður körfuboltadeildarinnar hafði tekið við viðurkenningunum var brugðið á það ráð að fara með góssið á æfingu eins og sést á meðfylgjandi myndbandi.

Í kvöld fór fram val á íþróttamanni Skagafjarðar í Húsi frítímans á Sauðárkróki að viðstöddu fjölmenni. Fjöldi ungra íþróttakappa fékk viðurkenningar fyrir góðan árangur í sínum greinum og besti þjálfarinn verðlaunaður sem og besta liðið. Besta liðið að mati valnefndar að þessu sinni var lið meistaraflokks karla í knattspyrnu en það þótti afreka vel í sumar er það færði sig upp um deild og ekki síst fyrir það að liðið sigraði andstæðinga sína 17 leiki í röð á Íslandsmótinu.

Hið árlega Gamlársdagshlaup verður haldið á Sauðárkróki á gamlársdag, 31. desember. Í fyrra var þátttökumet í hlaupinu þegar 280 manns skráðu sig til leiks. Að sögn Árna Stefánssonar forsvarsmanns hlaupsins er ekki útilokað að það met verði slegið í ár.

Á morgun fimmtudag, ætlar Rúnar Már Sigurjónsson landsliðsmaður í fótbolta að mæta í Hús frítímans á Sauðárkróki og spjalla við knattspyrnuiðkendur Tindastóls um heima og geima. Rúnar Már gekk í raðir Grasshopper í Sviss í sumar en lék þar áður með sænska knatt­spyrnuliðinu Sundsvall frá árinu 2013. Á Mbl.is segir að brotthvarf Rúnars Más frá Sundsvall í sumar hafi verið stærsta ástæðan fyrir því að liðinu gekk illa á seinni hluta tímabilsins þar í landi en stjórnendur hafi ekki áttað sig á mikilvægi hans.

23. jólamót Molduxa í körfubolta hófst í morgun. 18 lið eru skráð til keppni og verður leikið viðstöðulaust fram á seinniparts dags þegar úrslit liggja fyrir. Áður en mótið var sett var Samfélagsviðurkenning Molduxa veitt í annað sinn. Að þessu sinni var það Rannveig Lilja Helgadóttir sem hlaut þann heiður en hún hefur verið ötul í íþróttastarfi í Skagafirði og komið víða við. Meðal annars hefur Rannveig gegnt starfi formanns sunddeildar Tindastóls, gjaldkeri skíðadeildar Tindastóls í um tvo áratugi, var meðal annarra stofnandi fimleikadeildar innan Tindastóls, sem reyndar er ekki starfandi lengur.

23. jólamót Molduxa í körfubolta verður haldið á morgun, annan dag jóla, í íþróttahúsinu á Sauðárkróki. Mótið verður sett með veitingu Samfélagsviðurkenningar Molduxa kl. 10:55 og fyrstu leikir flautaðir á stundvíslega kl. 11:00. Keppt verður í einum flokki, og raðast lið saman eftir styrkleika strax að lokinni fyrstu umferð. Alls hafa 17 lið skráð sig til keppni svo það er ljóst að mikið verður að gerast. Meistaraflokkur Tindastóls sér um dómgæslu og yngri flokkar sjá um ritaraborðin.

Í gærkvöldi fór fram val á íþróttamanni Tindastóls fyrir árið 2016. Sex frambærilegir íþróttamenn höfðu verið tilnefndir en sá sem helst þótti skara fram úr á árinu er körfuboltasnillingurinn Pétur Rúnar Birgisson. Á heimasíðu Tindastóls segir að Pétur hafi átt frábært ár sem körfuknattleiksmaður og sé orðinn einn af bestu körfuknattleiksmönnum landsins þrátt fyrir ungan aldur.

Jólamót júdódeildar Tindastóls fór fram í gær í íþróttahúsinu á Sauðárkróki en um innanfélagsmót var að ræða. Allir keppendur fengu gullpening og pítsur að móti loknu og mikil gleði ríkti í herbúðum þeirra.

Þann 22. desember verður tilkynnt um val á íþróttamanni U.M.F.Tindastóls fyrir árið 2016 og fer athöfnin fram í Húsi frítímans á Sauðárkróki. Auk afhendinga viðurkenninga munu deildirnar kynna starf sitt í stuttu máli.

Það var geggjuð stemning í Síkinu í kvöld þegar Haukar úr Hafnarfirði heimsóttu Tindastólsmenn. Þrátt fyrir að vera að gæla við fallbaráttuna er Haukaliðið mjög gott og þeir komu einbeittir til leiks gegn Stólunum. Eftir að Stólarnir höfðu leitt lengstum í síðari hálfleik voru það gestirnir sem voru nálægt því að ræna stigunum en Stólarnir tryggðu sér framlengingu þar sem þeir reyndust sterkari. Lokatölur 87-82.