Skagafjörður

Kiwanisklúbbar Óðinssvæðis settu á laggirnar verkefnið GÓÐGERÐA FEBRÚAR á sínu svæði, sem er ansi víðfeðmt, allt Norðurland og partur af Austurlandi, frá Sauðárkrók til Vopnafjarðar og eru 8 starfandi Kiwanisklúbbar á þessu svæði.

Hreindýrakvóti ársins 2019 verður sá sami og á fyrra ári þar sem heimilt verður að veiða allt að 1451 dýr á árinu, 1043 kýr og 408 tarfa. Veiðin skiptist milli níu veiðisvæða og eru mörk þeirra og fjöldi dýra á hverju svæði tilgreind nánar á heimasíðu umhverfis- og auðlindaráðuneytis.

Ágætur félagi okkar og varamaður áheyrnarfulltrúa Byggðalistans í umhverfis- og samgöngunefnd skrifar grein í Feyki í síðustu viku þar sem hann setur út á að lækkun fráveitugjalda í Skagafirði um sl. áramót leiði ekki til lækkunar fasteignagjalda almennt í Skagafirði. Þessu er því til að svara að fráveitugjald er reiknað út sem ákveðið hlutfall af fasteignamati húsa, mannvirkja, lóða og landa, samkvæmt lögum um skráningu og mat fasteigna. Gildir þetta þar sem fráveita er til staðar, þ.e. í þéttbýli í Skagafirði og er því gjaldi ætlað að standa straum af kostnaði fráveitunnar.

Háskólinn á Hólum á samstarf við ýmsa erlenda háskóla og rannsóknastofnanir og liggja leiðir starfsmanna skólans víða. Á vef skólans segir nýlega frá heimsókn deildarstjóra Ferðamáladeildar til Bø í Noregi og einnig af ferð tveggja kennara við Fiskeldis- og fiskalíffræðideild skólans til Nígeríu.

Snemma í gærmorgun var ekið á þrjú hross skammt frá bænum Krossi í Óslandshlíð í Skagafirði með þeim afleiðingum að þau drápust. Verulegt tjón varð á bílnum og að sögn lögreglunnar á Norðurlandi vestra var ekki talið að ökumaður hafi hlotið alvarleg meiðsli.

Bændur í Miðsitju, í samvinnu við Hrossaræktunardeild Grána, efna til folaldasýningar 16. febrúar nk. og hefst hún stundvíslega kl. 12:00 í reiðhöllinni að Miðsitju, Akrahreppi. Viðurkenndir gæðingadómarar dæma um gæði folalda og verður keppt í tveimur flokkum: merfolöld og hestfolöld. Verðlaunað verður fyrir þrjú efstu sæti í hvorum flokki en jafnframt verður afhentur bikar fyrir glæsilegasta folald sýningarinnar.

Söngkeppni NFNV verður haldin á morgun, föstudaginn 15. febrúar í sal Fjölbrautaskólans en keppnin er árlegur viðburður og síðustu ár haldin á vorönn. „Keppnin gefur nemendum skólans tækifæri á að sýna hvað í þeim býr hvað varðar tónlist og söng“ segir Dagmar Ólína, skemmtanastjóri NFNV.

Guðjón S. Brjánsson, þingmaður Samfylkingarinnar í Norðvesturkjördæmi og 1. varaforseti Alþingis, ásamt Guðmundi Andra Thorssyni, þingmanni suðvesturkjördæmis og varaformanni þingflokks Samfylkingarinnar, tóku á móti gestum á opnum fundi um samfélagsmál á Kaffi Krók á Sauðárkróki í gær. Auglýst hafði verið að Helga Vala Helgadóttir yrði einnig á fundinum en hún þurfti að sitja annan fund í Reykjavík á sama tíma.

Norðurstrandarleið eða Arctic Coast Way verður opnuð í sumar en verkefnið fékk nýlega úthlutað hæsta styrk ársins úr Uppbyggingarsjóði Norðurlands eystra eða fimm milljónir króna. Unnið hefur verið að undirbúningi verkefnisins undanfarin ár en hér er um að ræða 800 km leið meðfram strandlengju Norðurlands.

SSNV er þátttakandi í Norðurslóðaverkefni sem kallast Digi2Market, sem útfærst gæti á íslensku sem stafræn leið til markaðar. Verkefninu er ætlað að taka á ýmsum áskorunum sem fyrirtæki á jaðarsvæðum kunna jafnan að glíma við, svo sem smæð markaðar, fjarlægð frá markaði og einangrun. Markmið verkefnisins er m.a. að þróa nýjungar í stafrænum markaðs- og söluhugbúnaði fyrir lítil og meðalstór fyrirtæki, aðstoða þau við að nýta sér stafræna möguleika og þróa viðskiptamódel sem stuðlar að umhverfisvænum rekstri. Þá er enn fremur stefnt að því að þátttaka í verkefninu stuðli að alþjóðlegum vexti fyrirtækja.