Skagafjörður

Síðastliðinn sunnudag opnaði á Egilsstöðum sýningin Kona á skjön sem segir frá rithöfundarferli Guðrúnar frá Lundi sem fullyrða má að sé sannkallað ævintýri í íslenskri bókmenntasögu. Sýningin hefur farið víða en áður hefur hún verið sett upp á Sauðárkróki, Borgarbókasafni í Grófinni, Bókasafni Akraness og Amtsbókasafni á Akureyri.

Einn maður var handtekinn af lögreglunni á Norðurlandi vestra grunaður um íkveikju að eyðibýlinu Illugastöðum í Laxárdal í Skagafirði í gær. Eftir að lögreglan fékk tilkynningu um eld í húsinu, vaknaði strax grunur um að eitthvað óhreint væri í pokahorninu og var hinn grunaði gripinn á leið af vettvangi. Var maðurinn handtekinn og færður til yfirheyrslu áður en honum var gefið frelsi á ný. Að sögn lögreglu er málið í rannsókn.

Bændamarkaður á Hofsósi verður haldinn um Laufskálaréttarhelgina, nánar tiltekið næstkomandi sunnudag, þann 30. september klukkan 12-15 í gamla pakkhúsinu á Hofsósi. Markaðurinn, sem var haldinn í nokkur skipti í sumar, mæltist mjög vel fyrir og óhætt er að segja að plássið á Hofsósi hafi iðað af lífi þessa daga.

Næstkomandi laugardag ætlar Rannsóknarsetur Háskóla Íslands á Norðurlandi vestra að bjóða gestum og gangandi upp á kaffi og meðlæti í húsakynnum setursins að Einbúastíg 2 á Skagaströnd. Forstöðumaður setursins, dr. Vilhelm Vilhelmsson, mun taka á móti gestum og kynna það sem er á döfinni hjá setrinu.

Klukkan 17:22 í dag var slökkvilið Brunavarna Skagafjarðar kallað út að eyðibýlinu Illugastöðum í Laxárdal í Skagafirði en þar logaði eldur í gömlu íbúðarhúsi. Húsið er steinsteypt, byggt 1928 en síðast notað sem sumarbústaður.

Á Feyki.is í gær var sagt frá því að höfrung hefði rekið á land í fjöruna við Sauðárkrók. Þar fór miðillinn með rangt mál því hvalategundin heitir andarnefja sem er af ætt svínhvela og telst því ekki til höfrunga.

Á næsta ári verður samið um lífskjör Íslendinga í fjölda kjarasamninga. Eyjólfur Árni Rafnsson formaður SA, Halldór Benjamín Þorbergsson framkvæmdastjóri SA og Ásdís Kristjánsdóttir forstöðumaður efnahagssviðs SA rýna í stöðu og horfur á vinnumarkaði og ræða svigrúm til launahækkana næstu árin á opnum fundum hringinn í kringum landið.

Í tilefni Laufskálaréttarhelgar verður opið hús á Hafsteinsstöðum föstudaginn 28. september milli kl 3 og 6. Á staðnum verða folaldshryssur, tryppi á ýmsum aldri ásamt hrossum í tamningu og þjálfun. Sýnd verða nokkur hross í reið milli kl 5 og 6.

Á næstu dögum verður bólusett gegn inflúensu á heilsugæslustöðvum Heilbrigðisstofnunar Norðurlands. Í auglýsingum frá Heilbrigðisstofnuninni segir að allir einstaklingar eldri en 60 ára ættu að láta bólusetja sig svo og öll börn og fullorðnir með langvinna hjarta-, lungna-, nýrna- og lifrarsjúkdóma, sykursýki, illkynja sjúkdóma og aðra ónæmisbælandi sjúkdóma. Einnig er æskilegt að heilbrigðisstarfsmenn sem annast einstaklinga í framantöldum áhættuhópum fái bólusetningu svo og þungaðar konur. Ennfremur eru lungnabólusetningar ráðlagðar einstaklingum eldri en 60 ára. Bóluefnið er áhættuhópum að kostnaðarlausu en greiða þarf komugjald.

Mikið hefur verið um hvala- og hvalrekafréttir á árinu svo ætla má að fjölgun sé hjá þeim spendýrum við Íslandsstrendur. Við fjölfarna gönguleið í fjörunni við Sauðárkrók liggur nú hræ af höfrungi sem rekið hefur á land í norðanáttinni á dögunum. Líklega er hér um stökkul að ræða sem er meðalstór tannhvalur og er ein af tveimur tegundum í ættkvíslinni Tursiops. Þeir eru hluti af ættinni Delphinidae og eru meðal algengustu höfrunga á hafsvæðinu við sunnanvert Ísland.