Skagafjörður

Áskorandapenninn Eyþór Fannar Sveinsson

Tónlistarhátíðin Drangey Music Festival verður haldin í kvöld og verður þá mikið um dýrðir á Reykjum á Reykjaströnd. Eins og segir á Facebooksíðu hátíðarinnar verður áherslan á frábæra tónlist og fallega stemmingu í glæsilegri náttúru þar sem Drangey blasir við. Í samtali við Rás 2 í morgun sagði Áskell Heiðar, einn af forsprökkum hátíðarinnar, að útlit væri fyrir góða samkomu og Íslendingar ættu ekki að vera í vandræðum með að klæða af sér kuldann þó hann blési af norðrinu en það ætti nú reyndar að hægja með kvöldinu.

Antonio Kurtis Hester mun leika með Tindastóli næsta vetur í körfuboltanum en samningar hafa verið undirritaðir þar um. Þetta eru góðar fréttir fyrir leik- og stuðningsmenn Stólanna og ekki síst þjálfarans sem hafði Hester sem fyrsta kost sem erlendan leikmann liðsins. Að sögn Stefáns Jónssonar, formanns körfuknattleiksdeildar Tindastóls, tóku samningaumleitanir nokkurn tíma enda mörg lið á eftir kappanum bæði hérlendis sem og erlendis.

Undanfarið hafa Sveitarfélagið Skagafjörður og Skagabyggð átt óformlegar viðræður um sameiningu sveitarfélaganna tveggja. Þetta var rætt á fundi byggðarráðs Sveitarfélagsins Skagafjarðar þann 22. júní sl. og sat Vignir Sveinsson, oddviti Skagabyggðar, fundinn undir þeim dagskrárlið.

Þar sem Lummudagar verða í Skagafirði um helgina er tilvalið að rifja upp nokkrar lummuuppskriftir sem birtust í Feyki fyrir tveimur árum síðan.

Meistaraflokkur Tindastóls í kvennafótboltanum mun etja kappi við Grindavík í átta liða úrslitum Borgunarbikarsins í kvöld. Leikið er í Grindavík og hefst leikurinn kl 19:15. Tindastóll lagði Fylki 2-1 í 16 liða úrslitum fyrr í mánuðinum þar sem Eva Banton og Madison Cannon skoruðu mörk Tindastóls. Allir sem tök hafa á eru hvattir til að mæta og hvetja stúlkurnar til sigurs.

Veginum um Þverárfjall hefur verið lokað tímabundið þar sem unnið er að því að koma tengivagni flutningabíls, sem fór þar á hliðina í gær, aftur á réttan kjöl. Reiknað er með því að aðgerðin geti tekið um tvo tíma en tilkynning um lokunina var sett á vef Vegagerðarinnar kl. 15:46 í dag.

Félagarnir í Team Drangey, eða Hjólreiðafélaginu Drangey, eru nú komnir í mark í hjólreiðakeppninni WOW Cyclothon eftir að hafa hjólað 1358 km kringum landið. Liðið varð það 47. í röðinni hjá 10 manna liðum á tímanum 44:12:28.

Nú fer enn ein helgin í hönd með fríum og ferðalögum og er ekki úr vegi að minna ferðalanga á að gæta varúðar og muna að best er að koma heill heim og að hálftími til eða frá skiptir sjaldnast öllu máli. Sem betur fer hefur lögreglan vökult auga á vegum úti og á Facebooksíðu lögreglunnar á Norðurlandi vestra kemur fram að frá áramótum hafi 1219 ökumenn verið kærðir fyrir hraðakstur í umdæminu sem er mikil aukning frá því á sama tíma í fyrra þegar sambærileg tala var 556 ökumenn.

Nú standa fyrir dyrum mikil götugrill í Skagafirði í tilefni Lummudaga og að sjálfsögðu er grillvertíðin á fullu hjá landsmönnum öllum. Því er ekki úr vegi að birta þessar leiðbeiningar til grillara sem Matvælastofnun sendi frá sér. Þar segir: