Skagafjörður

Lið Tindastóls spilaði síðasta leik sinn í 4. deildinni þetta sumarið s. fimmtudag en þá heimsóttu strákarnir lið KÁ á Ásvelli í Hafnarfirði. Ljóst var fyrir leikinn að Stólarnir myndu enda keppni í fjórða sæti hvernig svo sem leikir síðustu umferðar færu. Heimamenn komust yfir strax í byrjun og enduðu á að vinna leikinn 4-2.

Sameiningarhugmyndir framhaldsskólanna MA og VMA sem mennta- og barnamálaráðherra, Ásmundur Einar Daðason, áformar eru fráleitar að okkar mati, þó er hvorug okkar stúdent frá öðrum hvorum skólanum. Fyrir utan hróplegar þversagnir í skýrslu PwC, sem mörg hafa fjallað um og litlu er við að bæta, er skoðun okkar faglegs eðlis og byggir á þörfum fjölbreytts nemendahóps og ólíkra ungmenna á landsbyggðinni... - segir m.a. í innsendri grein Álfhildar Leifsdóttur og Hólmfríðar Árnadóttur.

Feykir sagði frá því skömmu fyrir helgi að enn hefði ekki fundist eldislax í Staðará og Húseyjarkvísl í Skagafirði en vitað var til þess að einn eldislax hefði fundist í Hjaltadalsá. Nú er komin önnur vika og samkvæmt upplýsingum Valgarðs Ragnarssonar, sem er æðstráðandi í Kvíslinni, þá hafa þrír eldislaxar nú fundist í Húseyjarkvislinni.

Tindastóll sótti lið Selfoss heim í annarri umferð úrslitakeppni neðri hluta Bestu deildarinnar í dag. Á sama tíma áttust við lið ÍBV og Keflavíkur í Eyjum en fyrir umferðina stóð lið ÍBV best að vígi, þá kom lið Tindastóls og loks lið Keflavíkur. Selfossliðið var hins vegar þegar fallið en gaf ekkert eftir gegn Stólastúlkum sem reyndust þó sterkari á endanum og unnu leikinn 1-2.

Hönnunarferli vegna aðgengis fyrir ferðamenn í Staðarbjargavík á Hofsósi stendur nú fyrir dyrum en í síðustu úthlutun Framkvæmdasjóðs ferðamannastaða hlaut Skagafjörður styrk fyrir hönnun á bættu aðgengi á svæðinu. Sveitarfélagið boðar því til fundar í félagsheimilinu Höfðaborg á Hofsósi þriðjudaginn 12. september og hefst fundurinn kl 17:00.

Í frétt á Húnahorninu segir að rekja megi eldislaxa sem veiðst hafa m.a. í Miðfjarðará, Víðidalsá og Vatnsdalsá til sex hænga sem notaðir voru til framleiðslu á seiðum sem sett voru út á eldissvæðis Arctic Sea Farm við Kvígindisdal í Patreksfirði haustið 2021. Tveir af þessum sex hængum voru einnig notaðir til framleiðslu á seiðum sem sett voru út á eldissvæði Arnarlax við Tjaldanes í Arnarfirði haustið 2021.

„Mér fannst ganga vel, ég var að skora vel og leið vel með hvernig ég var að spila,“ segir Arnar Geir Hjartarson, pílukastari frá Pílukastfélagi Skagafjarðar, þegar Feykir spyr hvernig honum hafi fundist ganga hjá sér í riðlakeppni Meistaradeildarinnar í pílu en hann var mættur í Bullseye sl. miðvikudagskvöld. „Ég var nokkuð stöðugur í gegnum alla leikina og náði að spila betur þegar á reyndi á móti sterkari andstæðing. Útskotin gengu ekki alveg nógu vel í byrjun, smá stress og spenna, en svo fann ég taktinn þegar leið á kvöldið,“ sagði kappinn.

Fyrst pílumótið eftir sumarfrí fór fram í gærkvöldi hjá Pílukastfélagi Skagafjarðar. Spilaður var svokallaður tvímenningur en tíu lið mættu til leiks. Fram kemur í færslu á Facebook-síður félagins að kvöldið hafi verið virkilega skemmtilegt og mikil stemning. Það voru þeir Atli Víðir og Ingvi Þór Óskarsson sem fóru með sigur af hólmi en þeir lögðu feðgana Einar Gíslason og Hlyn Frey Einarsson í úrslitaleik

Magnús Freyr Sigurkarlsson jarðfræðingur hefur verið ráðinn í tímabundna stöðu sérfræðings á sviði loftslagsmála á þróunarsviði Byggðastofnunar en alls sóttu 17 um stöðuna. Magnús Freyr er með BSc og MSc gráðu í jarðfræði frá Háskóla Íslands þar sem megin viðfangsefnin voru mælingar og kortlagningar á framhlaupsjöklum. Magnús starfaði áður sem náttúruvársérfræðingur hjá Veðurstofu Ísland og sem sérfræðingur Umhverfisstofnunar með yfirumsjón yfir náttúruverndarsvæðum á Suðurlandi.

Í tilkynningu á Facebooksíðu Körfuknattleiksdeildar Tindastóls segir að framlengdir hafa verið samningar við þá Svavar Atla Birgisson, aðstoðarþjálfara meistaraflokks karla, og Ísak Óla Traustason, styrktarþjálfara meistaraflokks karla. Daníel Þorsteinsson er aftur á móti nýr í brúnni en hann hefur verið ráðinn styrktarþjálfari meistaraflokks kvenna og Körfuboltaakademínu FNV.