Skagafjörður

Um mánaðamótin júlí ágúst var endurnýjuðum strompi komið fyrir við verksmiðju Steinullar á Eyrinni á Sauðárkróki. Strompurinn er nú tveimur metrum hærri en áður, nær því 42 metra hæð sem er dágott. Það var Slippurinn á Akureyri sem annaðist smíðina á nýja toppstykkinu og kom honum síðan fyrir með hjálp stóreflis kranabíls sem þeir hafa á sínum snærum. Kraninn þurfti að lyfta nýja strompinum á sinn stað og þurfti því að komast töluvert hærra en í 42 metra hæð.

Í tilkynningu á Facebooksíðu Körfuknattleiksdeildar Tindastóls segir að Ragnar Ágústson hefur framlengt samning sinn við Tindastól til tveggja ára.

„Blóðgjör er lífgjöf,“ er eitt af slagorðum Blóðbankans, sem minnir okkur svo sannarlega á mikilvægi þess að gefa blóð. Allir þeir sem geta gefið blóð eru hvattir til þess að mæta í Blóðbankabílinn sem staddur verður á Sauðárkróki við Skagfirðingabúið, þriðjudaginn 19. september, frá klukkan 11:00-17:00.

Fulltrúar frá Icelandic Roots samtökunum voru á ferð um Norðurland vestra í síðustu viku og afhentu minnisplatta bæði á Borðeyri og á Sauðárkróki til minningar um forfeður sína sem fóru vestur um haf í kringum aldamótin 1900. Sjálfboðaliðar Icelandic Roots, sem koma frá Norður-Ameríku, ferðast nú um Ísland til að fagna tíu ára afmæli samtakanna. Þeir heimsækja mikilvæga sögustaði, hitta félaga sem búsettir eru á Íslandi og setja upp minnisvarða um vesturfarana.

Stefán Pedersen ljósmyndari og listamaður lést á Heilbrigðisstofnun Norðurlands á Sauðárkróki laugardaginn 9. september. Eftir hann liggur fjöldi frábærra ljósmynda sem skrásetja lista- og mannlífið á Sauðárkróki og í Skagafirði í rúma hálfa öld. Ekki síst voru myndir hans fyrir Leikfélag Sauðárkróks hrein listaverk.

Yngvi Jósef Yngvason hefur verið ráðinn í starf varaslökkviliðsstjóra hjá Brunavörnum Skagafjarðar og mun hann hefja störf í desember. Yngvi tekur við stöðunni af Sigurði Bjarna Rafnssyni sem mun láta af störfum í október.

Dagana 15.-16. september fer Álborg SK 88 körfuboltamótið fram í Borgarnesi í fyrsta skipti. „Stefnan er að með tímanum verði þetta helsta og virtasta æfiingamót íslensks körfubolta,“ segir Dagur Þór Baldvinsson, formaður kkd. Tindastóls og hafnarstjóri Skagafjarðarhafna. Fjögur lið mæta til leiks í ár; Íslandsmeistarar Tindastóls, Stjarnan, KR og Höttur. Dráttur í undanúrslit fór fram við hátíðilega athöfn við Sauðárkrókshöfn.

Það er allt fullt af fiski á Króknum þessa vikuna en allir þrír togarar FISK Seafood hafa landað ágætum afla. Frystitogarinn Arnar HU1 kom til hafnar á Sauðárkróki á mánudag eftir 30 daga túr með 810 tonn upp úr sjó. Sama dag landaði Drangey SK2 156 tonnum þar sem uppistaðan var þorskur og loks landaði Málmey SK1 145 tonnum þar sem uppistaðan var þorskur, ýsa og karfi.

Áhættan við kornrækt getur verið þó nokkur og ekki bara sökum misjafnra veðurskila á Fróninu, heldur blasir það nú við bændum að kornið er orðið að hlaðborði villibráðarinnar.

Á fundi í sveitarstjórn Húnabyggðar sem fram fór í gær, lýsti sveitarstjórn Húnabyggðar yfir þungum áhyggjum af þeirri staðreynd að nú séu að veiðast eldislaxar í mörgum ám í sveitarfélaginu og á Norðurlandi vestra. „Alls hafa veiðst um 50 eldislaxar í ám á Norðurlandi vestra á síðustu tveimur vikum og í fæstum ám er einhver möguleiki til staðar að fylgjast með mögulegri gengd eldislaxa,“ segir í fundargerð sveitarstjórnar en þar er þess krafist að sett verði í lög að eldislax sé ekki frjór og að tryggt sé að laxar geti ekki sloppið.