Skagafjörður

Nú í dag er nóg að gerast í veitingageiranum á Króknum. Róbert Óttarsson er að selja Sauðárkróksbakarí eftir að hafa séð heimamönnum fyrir bakkelsi í fjölda ára. Hann tók við bakaríinu af föður sínum , Óttari Bjarnasyni, fyrsta september 2006, en Sauðárkróksbakarí hefur verið starfandi frá 1880 og er elsta starfandi fyrirtæki í skagafirði.

Náttúrufræðistofnun Íslands hefur metið veiðiþol rjúpnastofnsins haustið 2022 og hafa niðurstöðurnar verið kynntar Umhverfisstofnun með bréfi en ráðlögð rjúpnaveiði í haust er um 26 þúsund fuglar. Segir á vef stofnunarinnar að í aðalatriðum hafi talningar síðastliðið vor sýnt fjölgun rjúpna á nær öllum talningarsvæðum 2021–2022.

Söfnun fyrir fjölskyldu Evu Hrundar Pétursdóttur hefur verið hrundið af stað en á Húni.is kemur fram að í ljósi þeirra hörmulegu atburða sem áttu sér stað á Blönduósi þann 21. ágúst síðastliðinn hafi verið opnaður styrktarreikningur til stuðnings eiginmanni hennar og börnum svo fjölskyldan þurfi ekki að hafa fjárhagsáhyggjur á þessum erfiða tíma.

Ríkidæmi landsbyggðarinnar verður rætt á ráðstefnu Félags kvenna í atvinnulífinu, FKA, á opinni Landsbyggðarráðstefnu FKA sem haldin verður á Akureyri þann 23. september nk. Ráðstefnan ber nafnið Eldhugar en fyrirlesarar verða konur um allt land sem hafa hugrekki og víðsýni að vopni og hafa náð að töfra fram spennandi nýsköpun og tækifæri, eins og segir í tilkynningu félagsins.

Um helgina var 47. sambandsþing Sambands ungra Framsóknarmanna (SUF) haldið í Kópavogi. Margt var um manninn og mikið um að vera samkvæmt tilkynningu sambandsins en slíkir viðburðir eru vettvangur ungs fólk til að koma saman, taka þátt í og kynnast stjórnmálaumræðu, koma sínum sjónarmiðum á framfæri og kalla eftir breytingum.

Um helgina fór fram Meistaramót Íslands 30 ára og eldri á Sauðárkróksvelli. Veitt voru verðlaun fyrir besta árangurinn samkvæmt WMA prósentu og voru það Anna Sofia Rappich (UFA) og Ágúst Bergur Kárason (UFA) sem voru með hæstu prósentuna í kvenna- og karlaflokki.

Heiða Björg Hilmisdóttir, varaformaður Sambands íslenskra sveitarfélaga og borgarfulltrúi Samfylkingarinnar í Reykjavík, verður næsti formaður Sambands íslenskra sveitarfélaga en kosning fór fram dagana 15. – 29. ágúst sl. Auk Heiðu Bjargar bauð Rósa Guðbjartsdóttir, bæjarstjóri í Hafnarfirði, sig fram til að gegna embætti formanns næstu fjögur árin.

Opnunartími sundlauganna í Skagafirði tók breytingum í morgun þegar vetraropnun tók gildi í laugunum á Sauðárkróki og í Varmahlíð en á Hofsósi mun gilda sérstök opnun frá til 25. september.

Flokksráðsfundur Vinstri hreyfingarinnar græns framboðs var haldinn nú um helgina 27. til 28. ágúst, á Ísafirði. Á fundinum voru samþykktar fimm ályktanir er lúta að fjölgun leikskólakennara, öryggi í flugsamgöngum, félagsleg undirboð og launaþjófnað og vindorku. Þá kemur meðal annars fram í ályktun frá stjórn hreyfingarinnar að stutt verði við hugmyndir um hækkun veiðigjalda, endurskoða lög sem lúta að gagnsæi um raunverulega eigendur sjávarútvegsfyrirtækja og að spornað verði gegn samþjöppun í sjávarútvegi.

Matvælastofnun varar enn við hættu á fuglaflensusmiti frá villtum fuglum yfir í alifugla en stofnunin lítur svo á að smit með skæðum fuglaflensuveirum sé viðloðandi í villtum fuglum víða á landinu. Þó hafi færri veikir eða dauðir villtir fuglar verið tilkynntir til Matvælastofnunar í júlí og það sem af er ágúst en mánuðina á undan.