Skagafjörður

„Sonur okkar og bróðir tók hræðilegar ákvarðanir sem urðu til þess að hann lét lífið, kunningjakona okkar einnig og eiginmaður hennar liggur þungt haldinn á sjúkrahúsi. Við syrgjum bróður og son,“ segir í yfirlýsingu sem foreldrar og systkini Brynjars hafa sent fjölmiðlum. Biðja þau þess að Kári nái heilsu og fjölskyldunni, vinum og öðrum sem eiga um sárt að binda sendar innilegar samúðarkveðjur.

Börn hjónanna sem urðu fyrir skotárás á Blönduósi á sunnudaginn hafa sent frá sér yfirlýsingu þar sem þau biðja fjölmiðla um að virða friðhelgi einkalífs þeirra. Saka þau fjölmiðla um að flytja rangar og villandi fréttir af atvikum og ganga nærri friðhelgi einkalífs þeirra með myndbirtingum og síendurteknum hringingum í þau, nánustu vini og ættingja.

Um helgina var Íslandsmótið í hrútadómum haldið á Sauðfjársetrinu í Sævangi á Ströndum. Nýr meistari var krýndur, en Strandamenn náðu ekki að landa sigri að þessu sinni. Sigurvegari í vana flokknum og þar með Íslandsmeistari í hrútaþukli varð Gunnar Steingrímsson Stóra-Holti í Fljótum. Í öðru sæti varð Marinó Helgi Sigurðsson á Hólmavík og er hann yngsti keppandi til að komast á pall í vana flokknum frá upphafi. Í þriðja sæti varð Þórður Halldórsson Breiðabólstað á Fellsströnd í Dölum. Alls kepptu 35 í vana flokknum. Eyjólfur Yngvi Bjarnason ráðunautur var yfirdómari að þessu sinni og fær bestu þakkir fyrir vel unnin störf.

Rúv.is hefur eftir Magnúsi Magnússyni, sóknarpresti í Húnavatnsprestakalli sem stýrði upplýsingafundi lögreglunnar fyrir íbúa á Blönduósi í gærkvöldi, að fjölmennt hafi verið í félagsheimilinu á Blönduósi, nánast fullsetið og mikil eining og samhugur. Fánar voru víða dregnir í hálfa stöng í bænum í gær og augljóslega mikil sorg í samfélaginu.

Steinunn Þórisdóttir hefur verið ráðin í nýja stöðu aðstoðarleikskólastjóra leikskólans Ársala á Sauðárkróki. Á heimasíðu Skagafjarðar kemur fram að vegna stækkunar leikskólans og fjölgunar barna hafi verið ákveðið að auglýsa eftir öðrum aðstoðarleikskólastjóra og bætist Steinunn því við stjórnunarteymi leikskólans, en Sólveig Arna Ingólfsdóttir er leikskólastjóri og Elín Berglind Guðmundsdóttir er nýlega tekin við sem aðstoðarleikskólastjóri.

Af 58 verkefnum er fengu styrki úr Matvælasjóði eru fjögur þeirra af Norðurlandi vestra og hlutu rúmar 15 milljón krónur af þeim 584,6 sem Svandís Svavarsdóttir matvælaráðherra úthlutaði fyrir helgi. Alls bárust sjóðnum 211 umsóknir í fjóra styrkjaflokka en sótt var um rúmlega 2 m.kr.

Harmleikurinn á Blönduósi í morgun lætur engan ósnortinn og ljóst að hugur landsmanna er með íbúum svæðisins. Guðmundur Haukur Jakobsson, forseti sveitarstjórnar Húnabyggðar, ávarpaði fjölmiðla nú síðdegis á Blönduósi og las upp yfirlýsingu frá sveitarstjórn og sveitarstjóra. Bað hann þjóðina að standa með íbúum svæðisins á þessum erfiðu tímum.

Það var heljarins húllumhæ í Miðgarði um síðustu helgi en þá héldu sex æskuvinir upp á 180 ára afmæli sitt – samanlagt. Þeir urðu allir þrítugir á síðasta ári en þá mátti auðvitað ekki halda neinar stórveislur. Nú voru kapparnir klárir í slaginn og var öllum boðið í menningarhúsið góða en þar var boðið upp á skemmtun og sveitaball að hætti hússins. Feykir lagði nokkrar spurningar fyrir eitt afmælisbarnið, Birgi Þór Guðmundsson frá Stóru-Seylu, og fékk myndir til birtingar frá Jóndísi Ingu Hinriksdóttur sem sá um að fanga viðburðinn og gesti á myndir.

Ævisaga asks – A journey of a driftwood (ferðalag rekaviðar) er nafnið á litabók sem Byggðasafn Húnvetninga og Strandamann gaf út nú í sumar. Þar er velt fyrir sér hvaða sögu gamall askur hefði að segja ef hann gæti tjáð sig; smíðaður úr rekaviðardrumbi sem gæti rakið sögu sína heim til Síberíu þar sem ferðalag hans hófst. Það er Gunnar Rögnvaldsson á Löngumýri sem skrifar texta bókarinnar en Sigríður Ævarsdóttir gerði myndirnar sem prýða hana.

Tveir eru látnir og einn særður eftir skotárás í heimahúsi á Blönduósi sem átti sér stað klukkan hálf sex í morgun. Hinn særði var fluttur suður með sjúkraflugi. Í frétt mbl.is af málinu er haft eftir Guðmundi Hauki Jakobssyni, forseta sveitarstjórnar í Húnabyggð, að harmleikur hafi átt sér stað og verið sé að vinna í því að kalla saman áfallateymi til að halda utan um samfélagið.