V-Húnavatnssýsla

Þar sem lýst hefur verið yfir neyðarstigi Almannavarna vegna Covid-19 veirunnar hefur Heilbrigðisstofnun Vesturlands á Hvammstanga ákveðið að fylgja fordæmi margra annarra stofnana og sett á heimsóknarbann á deildir sjúkrahússins, nema í sérstökum undantekningartilfellum.

Ungmennasamband Vestur-Húnavatnssýslu stendur fyrir fyrirlestri næstkomandi laugardag í Íþróttamiðstöðinni á Hvammstanga þar sem Baldur Þór Ragnarsson, þjálfari meistaraflokks karla í körfubolta og styrktarþjálfi, mun ræða liðsmenningu og markmiðastjórnun í tengslum við störf sín.

Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, og Guðmundur Ingi Guðbrandsson, umhverfis- og auðlindaráðherra, gerðu í dag grein fyrir úthlutun fjármuna til uppbyggingar innviða, náttúruverndar og annarra verkefna á ferðamannastöðum árið 2020.

Matgæðingar vikunnar í níunda tölublaði árið 2018 voru mæðgurnar Helga Rósa Pálsdóttir og Arndís Lilja Geirsdóttir. Þær fluttu í Skagafjörðinn frá Neskaupstað eftir að Helga Rósa fór í Hólaskóla. „Það var ekki aftur snúið heim eftir það,“ sagði hún. „Ég vinn í Verslunin Eyri , Arndís Lilja er í Árskóla. Hún er í Knapamerki 1 og stundar fótbolta en annars lifum við mæðgur og hrærumst í hestum.“

Miðvikudaginn 18. mars næstkomandi mun Endurmenntun Landbúnaðarháskóla Íslands, í samstarfi við Sauðfjárræktarfélag Vatnsnesinga, halda námskeiðið Fóðrun og fóðurþarfir sauðfjár í Hamarsbúð á Vatnsnesi. Námskeiðið hefst klukkan 11:00 og stendur til klukkan 17:00.

Fyrsta skóflustungan að viðbyggingu Grunnskóla Húnaþings vestra, sem einnig mun hýsa Tónlistarskóla Húnaþings vestra, var tekin í dag. Viðbyggingin, sem tengist eldra húsnæði skólans á norðurhlið, er á einni hæð en stallast í þrjá palla sem hækka með landinu. Kjallari er undir húsinu að hluta. Í byggingunni er rými fyrir frístund, stjórnun, eldhús, mat-/samkomusal, tónlistarskóla, bókasafn, starfsmannaaðstöðu og þrjár kennslustofur fyrir unglingastig. Í kjallara er verkstæði, geymsla og tæknirými. Viðbyggingin er um 1200 fermetrar og er það vinnan við fyrsta áfanga af átta sem nú er að hefjast.

Mat­væla­stofn­un hefur sent frá sér tilkynningu varðandi kórónuveiruna og matvæli í framhaldi þess að til hennar berast ýms­ar fyr­ir­spurn­ir þar að lútandi. Jafn­framt bendir Matvælastofnun á al­menn­ar upp­lýs­ing­ar um veiruna á vef land­lækn­is. Fylgst er með þekk­ing­arþróun á þessu sviði og verða upp­lýs­ing­ar hér upp­færðar eins og við á. Hér að neðan fylgja helstu spurningar og svör um þetta efni:

Magnús Jónsson hefur verið ráðinn í nýtt starf verkefnastjóra hjá SSNV. Mun hann hafa það hlutverk að vinna að því að laða fjárfestingar inn í landshlutann með það fyrir augum að fjölga atvinnutækfærum og auka fjölbreytni þeirra. Starfið er sérstakt áhersluverkefni Sóknaráætlunar landshlutans og er liður í samningi milli SSNV og atvinnuvega- og nýsköpunarráðuneytisins sem undirritaður var í september 2019. Frá þessu segir á vef SSNV.

Kristján Þór Júlíusson, ráðherra landbúnaðarmála, veitti Garðyrkjustöðinni Espiflöt í Biskupstungum og Garði í Eyjafirði landbúnaðarverðlaunin 2020 á nýyfirstöðnu Búnaðarþingi. Á vef atvinnuvega- og nýsköpunarráðuneytisins kemur fram að hugmyndin að baki verðlaununum sé að veita bændum og býlum sem á einn eða annan máta vekja athygli og eru til fyrirmyndar í íslenskum landbúnaði, viðurkenningar og hvatningarverðlaun. Ráðherra landbúnaðarmála hefur veitt verðlaunin frá árinu 1997.

Fundir um málefni hrossaræktarinnar hófust upp úr miðjum febrúar þar sem Sveinn Steinarsson formaður Félags hrossabænda og Þorvaldur Kristjánsson hrossaræktarráðunautur hafa verið á ferðinni um landið og kynnt það sem efst er á baugi í hestaheiminum. Fundir á Norðurlandi vestra verða verða í Skagafirði á morgun og í Húnaþingi vestra næsta þriðjudag.