V-Húnavatnssýsla

Gera þarf við lagnir að borholu á Reykjatanga, við Reykjaskóla, og því verður vatn tekið af hitaveitunni í Hrútafirði í um þrjár klukkustundir eftir hádegi í dag 22. nóvember. Heitavatnslaust verður einnig um helgina.

Félag sauðfjárbænda í Rangárvallasýslu hefur sent áskorun til atvinnuvega- og nýsköpunarráðuneytisins, Landssamtaka sauðfjárbænda, Bændasamtaka Íslands og Matís ohf. þar sem hvatt er til þess að niðurstöður örslátrunarverkefnis Matís, sem framkvæmt var í Birkihlíð í Skagafirði í fyrrahaust, verði birtar. Í Bændablaðinu kemur einnig fram að í fyrrgreindu bréfi væri áskorun um breytingar fyrir heimaslátrun til sölu verði rýmkaðar og einfaldaðar.

Fulltrúar úr stýrihópi Stjórnarráðsins um byggðamál funduðu sl. þriðjudag á Hvammstanga með stjórn og framkvæmdastjóra Samtaka sveitarfélaga á Norðurlandi vestra. Hópurinn er nú á fundaferð um landið til að ræða við stjórnir landshlutasamtaka um sóknaráætlanir og framgang þeirra í héraði. og var fundurinn liður í henni.

Tveir rjúpnaveiðimenn á Norðurlandi vestra þurftu að sjá á bak veiði sinni og skotvopnum er þeir komu af veiðum um síðastliðna helgi þar sem þeir höfðu ekki gild veiðikort til að framvísa til lögreglu. Lögreglan á Norðurlandi vestra heldur uppi öflugu eftirliti með rjúpnaveiðum og ræddi um síðustu helgi við marga veiðimenn og athugaði með réttindi þeirra, skotvopn o.fl. að því er segir á Facebooksíðu Lögreglunnar á Norðurlandi vestra.

Leppalúði er á leiðinni á Norðurlandið og ætlar að troða upp á Hvammstanga og Skagaströnd næstu daga. Það er Kómedíuleikhúsið sem sýnir jólaleikritið um þennan nafntogaða eiginmann Grýlu og segir í kynningu á verkinu að nú loksins fái karlinn að stíga fram í sviðsljósið eftir að hafa staðið í skugganum af konu sinni í árhundruð. Velt er upp spurningum eins og hver Leppalúði sé eiginlega, hvort hann tali mannamál og síðast en ekki síst – hvort hann sé í alvörunni til.

Kynningarmyndband um efni nýrrar Sóknaráætlunar Norðurlands vestra 2020-2024 hefur nú verið gefið út og er aðgengilegt á YouTube. Sóknaráætlunin var samþykkt á haustþingi Samtaka sveitarfélaga á Norðurlandi vestra þann 19. október sl. og skrifað var undir nýja samninga um sóknaráætlanir landshlutanna við samgöngu- og sveitarstjórnarráðuneytið og mennta- og menningarmálaráðuneytið.

Á fundi sveitarstjórnar Húnaþings vestra sem haldinn var þann 14. nóvember sl. var fjallað um fyrirhugaða stofnun þjóðgarðs á miðhálendinu og tekur sveitarstjórn undir bókun byggðaráðs frá 21. október þess efnis að land innan marka Húnaþings vestra verði ekki hluti af fyrirhuguðum þjóðgarði. Á það bæði við um land í beinni eigu sveitarfélagsins og þjóðlendur í afréttareign innan marka Húnaþings vestra.

Samtök sveitarfélaga á Norðurlandi vestra, SSNV, leita eftir einstaklingi til að sinna starfi verkefnisstjóra iðnaðar. Hér er um nýtt og spennandi verkefni að ræða sem hefur það að markmiði að laða fjárfestingar í landshlutann til að fjölga þar störfum, að því er segir í auglýsingu um starfið. Ráða á í starfið til tveggja ára með möguleika á framlengingu. Umsóknarfrestur um starfið er til 2. desember nk.

Leikflokkur Húnaþings vestra setur upp Skógarlíf á aðventunni en þá mun frumskógurinn vakna til lífsins og hægt að fylgjast með magnaðri þroskasögu og ævintýrum Móglí, sem elst upp meðal dýra í skóginum. Skógarlíf er glæný leikgerð eftir Gretu Clough sem unnið hefur til alþjóðlegra verðlauna bæði sem leikskáld og sviðslistamaður. Leikgerðin er byggð á the Jungle Book eftir Rudyard Kipling. En auk þess að skrifa handritið leikstýrir Greta einnig verkinu.

Ásmundur Einar Daðason, félags- og barnamálaráðherra, og Bergsteinn Jónsson, framkvæmdastjóri UNICEF á Íslandi, undirrituðu tímamótasamstarfssamning fyrir réttindi barna á Íslandi. Undirritunin fór fram í anddyri Salarins í Kópavogi í morgun.