V-Húnavatnssýsla

Ásta Sveinsdóttir á Fosshóli í Húnaþingi vestra var matgæðingur vikunnar í 17. tbl. Feykis 2016. Hún bauð upp á rækju-, avókadó- og mangósalat, fjögurra korna brauð sem má baka hvort sem er í brauðvél eða á hefðbundinn hátt og eftirrétt með hindberjasósu.

Tekið var á móti 1.679 gestum fyrstu þrjá mánuði ársins í Upplýsingamiðstöð ferðamanna í Húnaþingi vestra sem rekin er á Selasetri Íslands að því er kemur fram á heimasíðu Selasetursins. Á sama tímabili á síðasta ári voru gestir Upplýsingamiðstöðvarinnar 1.958 og er hér um að ræða 14% fækkun milli ára. Einnig fækkaði þeim sem keyptu sig inn á Selasafnið á fyrsta ársfjórðungi um 10% frá því í fyrra.

Framboðslisti Nýs afls í Húnaþingi vestra, N-listinn, var lagður fram í gær. Listinn hefur meirihluta í núverandi sveitarstjórn, fjóra af sjö fulltrúum. Oddviti listans er Magnús Magnússon, sóknarprestur og hrossabóndi, annað sætið skipar Sigríður Ólafsdóttir, sauðfjárbóndi og ráðunautur og í þriðja sæti er Magnús Eðvaldsson, íþróttakennari. Núverandi oddviti sveitarstjórnar, Unnur Valborg Hilmarsdóttir skipar 14. sæti eða heiðurssætið.

Karlakórinn Lóuþrælar úr Húnaþingi vestra leggur land undir fót um helgina og ætlar að halda tónleika í Seltjarnarneskirkju, á laugardaginn kemur, þann 21. apríl klukkan 16:00. Söngstjóri kórsins er Ólafur Rúnarsson og undirleik annast Elinborg Sigurgeirsdóttir. Einsöngvarar með kórnum eru þeir Friðrik M. Sigurðsson, Guðmundur Þorbergsson og og Skúli Einarsson.

Sumardagurinn fyrsti er í dag. Hann er einnig kallaður Yngismeyjardagur og er fyrsti dagur Hörpu, sem er fyrstur af sex sumarmánuðum í gamla norræna tímatalinu. Sumardagurinn fyrsti er í almanakinu talinn annar fimmtudagur eftir Leonisdag sem er 11. apríl hvert ár, eða með öðrum orðum fyrsti fimmtudagur eftir þann 18. Hann er því aldrei fyrr en 19. apríl og ekki síðar en þann 25. Á þessum tíma er hlýnun á vori komin vel í gang, meðalhiti 25. apríl er 0,3 stigum hærri en 19. apríl.

Á morgun, sumardaginn fyrsta, verður að vanda mikið um dýrðir á Hvammstanga þar sem boðað er til hátíðahalda sem hefjast við félagsheimilið klukkan 14:00. Löng hefð er fyrir hátíð í tilefni sumarkomunnar á Hvammstanga og mun þetta vera í 62. skiptið sem hátíðarhöldin eru með sama sniði og nú er en til þeirra var í fyrsta skipti stofnað af þáverandi Fegrunarfélagi sem stóð fyrir gróðursetningu og byggði upp garðinn við sjúkrahúsið á Hvammstanga.

Nú stendur yfir umræða um fjármálaáætlun ríkisstjórnarinnar. Þar er gert ráð fyrir sérstöku átaki í samgönguframkvæmdum á árunum 2019-2021, samtals um 16,5 milljarða króna. Áhersla verður á greiðar og öruggar samgöngur allt árið í þeim verkefnum sem unnin verða. Strax á fyrsta ári áætlunarinnar er aukningin til málefnasviðsins 4,3 milljarðar króna frá fjárlögum 2018. Ætlunin er að klára Dýrafjarðargöng og tvöfalda Kjalarnesveg. Unnið er að samgönguáætlun sem á að leggja fyrir í haust.

Stærðfræðikeppni Fjölbrautaskóla Norðurlands vestra, Menntaskólans á Tröllaskaga og 9. bekkjar fór fram í Fjölbrautaskóla Norðurlands vestra á Sauðárkróki sl. föstudag. Þetta er 21. árið sem keppnin er haldin en hún er samstarfsverkefni FNV, MTR , grunnskóla, stofnana og fyrirtækja á Norðurlandi vestra auk þess sem fyrirtæki utan kjördæmisins koma að verkefninu. Kennarar í stærðfræði við FNV báru hitann og þungann af samningu og yfirferð keppnisgagna en grunnskólarnir sáu um fyrirlögn dæmanna í undankeppninni sem fór fram í mars og tóku nemendur frá Norðurlandi vestra, Fjallabyggð og Dalvíkurskóla þátt í henni.

„Það verður að teljast heiður að vera boðið að vera með með þrátt fyrir að hafa ekki fasta búsetu í Skagafirði, svo að ekki varð skorast undan þegar Vala og Helgi báðu okkur að taka við og gefa lesendum einhverjar uppáhalds uppskriftir,“ sögðu matgæðingarnir í 16 tölublaði Feykis árið 2016, þau Árdís Kjartansdóttir og Hjörleifur Jóhannesson í Stekkjarbóli í Skagafirði.

Lögreglan á Norðurlandi vestra bendir á það á Facebooksíðu sinni að um næstu mánaðamót tekur gildi ný reglugerð um sektir og önnur viðurlög vegna brota á umferðarlögum og reglum settum samkvæmt þeim. Samkvæmt reglugerðinni munu sektir á mörgum brotum hækka verulega, til að mynda mun sekt við að tala í farsíma undir stýri áttfaldast, fara úr 5.000 krónum í 40.000 krónur. Hér má sjá nokkur dæmi um sektir eftir nýju reglugerðinni.