V-Húnavatnssýsla

Á Facebooksíðu Lögreglunnar á Norðurlandi vestra segir að það sem af er ári hafi mikil áhersla verið lögð á eftirlit með umferð í umdæminu. Frá áramótum hafa rúmlega 1000 ökumenn verið sektaðir fyrir of hraðan akstur sem er aukning um 650 mál en alls voru 350 ökumenn kærðir í umdæminu á sama tímabili í fyrra. Á sama tímabili hefur umferðaróhöppum fækkað um 18% í umdæminu sem skýrist að einhverju leyti af aukinni löggæslu í embættinu.

Síðasta keppnishelgi Íslandsmótsins í Blaki fór fram um síðustu helgi. Krækjur frá Sauðárkróki spiluðu sína síðustu fimm leiki í 3. deild á Neskaupstað og náðu að knýja fram fjóra sigra en einn leikur tapaðist. Birnur Bombur frá Hvammstanga léku á Ísafirði og Birnur A í Kópavogi.

Í dag tilkynntu Guðmundur Ingi Guðbrandsson, umhverfis- og auðlindaráðherra, og Þórdís Kolbrún Reykfjörð Gylfadóttir, ferðamála- iðnaðar- og nýsköpunarráðherra, um úthlutun styrkja til uppbyggingar innviða og annarra verkefna á fjölsóttum stöðum í náttúru Íslands og öðrum ferðamannastöðum.

Lið Grunnskóla Húnaþings vestra, tryggði sér í gær þátttökurétt í úrslitum í Skólahreysti sem fram fer 2. maí. Skólinn er skráður í Vesturlandsriðilinn og stóð hann uppi sem sigurvegari í keppninni í gær sem fram fór í TM höllinni í Garðabæ. Fjórir aðrir skólar hafa komist áfram en það eru Holtaskóli, Súðavíkurskóli, Laugalækjarskóli og Varmárskóli. Miðvikudaginn 4. apríl munu svo skólar af Norðurlandi etja kappi í Íþróttahöllinni á Akureyri og er búist við um 16 skólum.

Alþjóðlegi Downs-dagurinn er í dag en það var árið 2011 sem Sameinuðu þjóðirnar lýstu því formlega yfir að 21. mars væri alþjóðadagur Downs-heilkennis með það að markmiði að auka vitund og minnka aðgreiningu. Dagsetningin er táknræn þar sem hún vísar til þess að Downs-heilkenni er orsakað af aukaeintaki í 21. litningi, þ.e. þrjú eintök af litningi 21 - 21.03.

Búið er að birta þau verkefni sem fengu styrk úr húsfriðunarsjóði í ár en mörg þeirra eru af Norðurlandi vestra. Fjöldi umsókna var 252, en veittir voru alls 215 styrkir. Úthlutað var 340.720.000 kr., en sótt var um styrki að upphæð tæplega 775 millj. króna. Hér fyrir neðan má sjá þau verkefni sem fengu styrk af Norðurlandi vestra.

Á morgun, miðvikudaginn 21. mars, fer fram keppni í fimmgangi í Meistaradeild KS í hestaíþróttum. Keppnin fer fram í Léttishöllinni á Akureyri og hefst klukkan 19:00. Lið Hrímnis hefur forystu í liðakeppninni en það hefur sigrað í tveimur fyrstu keppnum vetrarins.

Textílsetur Íslands efnir til hönnunarsamkeppni þar sem hanna skal peysu með þemanu 100 ára fullveldi Íslands í tilefni þess að á þessu ári er öld liðin frá því að Ísland varð fullvalda ríki. Samkeppnin er haldin í tengslum við Prjónagleði 2018 sem verður á Blönduósi dagana 8.-10. júní í sumar.

„Það er nú ekki komin hefð í matargerð hjá okkur hjónaleysunum (nema þá kannski grilluð samloka með osti) enda einungis þrír mánuðir síðan við fórum að búa sjálf. Við erum því ekki enn búin að finna okkar sameiginlega uppáhaldsmat en við ætlum að gefa lesendum færi á að eiga jafn girnilega páska og við ætlum að eiga. Hvern þessara rétta hefur betri helmingurinn einungis gert einu sinni á ævinni, með margra ára milli bili, en með miklum ágætum þó,“ sagði Heiða Haralds. í 10. tbl Feykis 2016 en hún og Böðvar Friðriksson voru þá matgæðingar vikunnar og buðu upp á uppskriftir að herlegum veisluréttum fyrir páskamatseðilinn en nú styttist í að fólk fari að huga að honum.

Á fundi sveitarstjórnar Húnaþings vestra þann 8. mars sl. var tekið fyrir og samþykkt erindi frá Veiðifélagi Arnarvatnsheiðar og Tvídægru þar sem óskað var leyfis til að reisa skála við Arnarvatn. Um er að ræða 80m2 hús með aðstöðu fyrir starfsmenn í öðrum endanum og sal ásamt eldunaraðstöðu, salernisaðstöðu og sturtum í hinum. Einnig gæti verið að möguleiki yrði á gistingu á svefnlofti ofan við aðstöðu starfsmanna.