V-Húnavatnssýsla

Fjögur sveitarfélög á Norðurlandi vestra hafa samþykkt viljayfirlýsingu um rekstur Náttúrustofu Norðurlands vestra, en starfsemi hennar hefur legið niðri undanfarin misseri. Samþykktir Húnaþings vestra og Skagastrandar voru gerðar með því skilyrði að hluti starfseminnar yrði í þeim sveitarfélögum.

Á sveitarstjórnarfundi Húnaþings vestra samþykkti á sveitarstjórn að gerast aðili að samkomulagi sveitarfélaganna í Austur-Húnavatnssýslu og Klappa Development ehf. Jafnframt var á fundinum lögð fram bókun um atvinnuuppbyggingu á Norðurlandi vestra.

Um áramót gengu í gildi einar umfangsmestu breytingar í sögu lögreglunnar þegar fullur aðskilnaður varð á milli sýslumanna og lögreglunnar. Lögreglan á Blönduósi og Sauðárkróki voru sameinaðar í Lögregluna á Norðurlandi vestra með aðalaðsetur á Sauðárkróki. Páll Björnsson var skipaður í embætti lögreglustjóra en hann á langan starfsferil að baki sem sýslumaður á Höfn í Hornafirði.

Markaðsstofa Norðurlands er nú orðinn tengiliður ferðaþjónustunnar á Norðurlandi við Vegagerðina. Samkvæmt fréttatilkynningu frá Markaðsstofunni gefur þetta samkomulag, sem gert var við Vegagerðina, ferðaþjónustunni tækifæri á að koma á framfæri sínum áherslum varðandi þjónustu, viðhald og uppbyggingu vegakerfisins.

Framundan er enn einn réttarhelgin, þar sem réttað verður í nokkrum fjár- og stóðréttum á Norðurlandi vestra. Stóðréttir í Skrapatungurétt verða á sunnudaginn, 20. september, og fjárréttir í Hvalsárrétt í Hrútafirði á laugadaginn kemur, 19. september.

Ferðaþjónustufyrirtækið Gray Line hefur ákveðið að hefja beinar áætlunarferðir milli Akureyrar og Keflavíkurflugvallar næsta vor. Í apríl og maí verður ekið þrisvar í viku en daglega yfir sumarið fram í miðjan september.

Hreyfivika UMFÍ fer fram dagana 21.-27.september næstkomandi. Hreyfivikan er hluti af stóru lýðheilsuverkefni sem fram fer um gjörvalla Evrópu á sama tíma. Markmiðið er að fá hundrað milljónir fleiri Evrópubúa til að hreyfa sig reglulega fyrir árið 2020.

Á fésbókarsíðu Byggðasafns Húnvetninga og Strandamanna á Reykjum í Hrútafirði er vakin athygli á því að í sumar var sett upp sýning í anddyri safnsins í samvinnu við Baskavinafélagið á Íslandi. Sýningin fjallar um Spánverjavígin sem framin voru á Vestfjörðum fyrir 400 árum. „Baskarnir stunduðu hvalveiðar og sagan tengist Ströndunum sem eru á okkar safnasvæði,“ segir á fésbókarsíðu safnsins.

Blíðskaparveður var síðastliðinn laugardag þegar réttað var víða um landshlutann. Meðfylgjandi myndir tók Anna Scheving í Víðidalstungurétt og Hamarsrétt á Vatnsnesi í Húnaþingi vestra, eins og myndirnar bera með sér var bjart yfir mönnum og skepnum þennan fallega dag.

Tónleikar á vegum Soroptimistaklúbbsins við Húnaflóa verða haldnir fimmtudagskvöldið 17. september í Hvammstangakirkju og föstudagskvöldið 18. september í Blönduóskirkju. Tónleikarnir hefjast kl. 20:00.