A-Húnavatnssýsla

Sex sjúkraflutningamenn í hlutastarfi hjá Heilbrigðisstofnun Norðurlands á Blönduósi, hafa sagt upp störfum. Ástæðan er óánægja með kaup og kjör, segir á heimasíðu Landssambands slökkviliðs- og sjúkraflutningamanna. „Í bókun tvö í síðustu kjarasamningaviðræðum var sannmælst um að endurskoða störf og starfsumhverfi sjúkraflutningamanna, og átti þeirri vinnu að vera lokið fyrir áramót. Sú vinna hefur tafist í ráðuneytunum og virðist það hafa fyllt mælinn, segir á heimasíðunni.“

Samtök sveitarfélaga á Norðurlandi vestra hafa samið við Katie Browne, MFA Writing & Integrated Media, um að kanna möguleika á og koma með tillögur að framkvæmd listaskóla fyrir ungt fólk á Norðurlandi vestra. Markmiðið verkefnisins er að efla þekkingu og færni í listum og skapandi greinum hjá áhugasömum börnum og unglingum í landshlutanum með því að veita þeim tækifæri til að styrkja kunnáttu sína og hæfileika á þessu sviði.

Áskorandapistill Ágústs Valssonar

„Í sama tölublaði og ég lýsti því yfir að ég væri lélegur kokkur fengum við áskorun frá vinafólki okkar Þóreyju Eddu og Gumma að vera næstu matgæðingar í Feyki. Þessar uppskriftir eru tileinkaðar þeim sem eru í sama formi og ég í eldhúsinu þar sem lykilorðið er „einfalt“,“ segir Rakel Runólfsdóttir en hún og Jóhannes Kári Bragason voru matgæðingar vikunnar í 19. tölublaði Feykis árið 2015.

Fiskbúðin Fisk á disk var opnuð á Blönduósi s.l. þriðjudag. Verslunin er til húsa á Efstubraut 1, við hliðina á Líflandi, í húsi sem Pípulagnaverktakar áttu en á sínum tíma var Rækjuverksmiðjan Særún þar til húsa og seinna Laxasetrið.

Blöndustöð Landsvirkjunar hefur hlotið Blue Planet verðlaunin, sem Alþjóða vatnsaflssamtökin (International Hydropower Association, IHA) veita verkefnum sem skara framúr í sjálfbærri nýtingu vatnsafls í heiminum. Verðlaunin voru veitt á þingi samtakanna, sem haldið var í Addis Ababa í Eþíópíu. Verðlaunin eru veitt á grundvelli hins alþjóðlega matslykils um sjálfbæra nýtingu vatnsafls (e. Hydropower Sustainability Assessment Protocol, HSAP), en úttekt á grundvelli hans var gerð á Blöndustöð árið 2013. Úttektin leiddi í ljós að rekstur Blöndustöðvar er framúrskarandi hvað varðar sjálfbæra nýtingu vatnsafls og að á mörgum sviðum þykja starfsvenjur í Blöndustöð þær bestu sem fyrirfinnast.

Blóðbankabíllinn er nú á ferð um landið og er þessa stundina staddur á planinu við Skagfirðingabúð. Þegar tíðindamaður Feykis.is kíkti við í bílnum um það leyti sem opnað var í morgun var strax komin biðröð við bílinn. Konurnar sem starfa við blóðsöfnunina létu mjög vel af ferðum sínum, þær sögðu Skagafjörð vera með þeim svæðum á landinu sem safnast vanalega best en í gær fengu þær ríflega 50 blóðgjafa á Sauðárkróki en allt í allt komu um 70 manns til þeirra. Ekki fá allir að gefa blóð þar sem ekki mega líða meira en fimm ár frá síðustu blóðgjöf án þess að þurfa að fara í athugun fyrst.

Íbúar á Norðurlandi vestra hafa sloppið bærilega frá því leiðindaáhlaupi sem gengið hefur yfir landið síðasta sólarhringinn miðað við spár. Á Veðurstofu Íslands segir að áfram verði allhvöss eða hvöss norðaustlæg átt á landinu í dag en stormur suðaustan til. Vegna óveðurs er þjóðvegur nr. 1 lokaður frá Freysnesi að Jökulsárlóni.

Boltinn er farinn að rúlla á sparkvöllum landsins og þeir sem ekki eru þegar byrjaðir að keppa á Íslandsmótinu eru á fullu að undirbúa sig í þá keppni. Stúlkurnar í 3. flokki Tindastóls/Hvatar léku æfingaleik við KA í gær á Sauðárkróki.