Fréttir

Byggðarráð Húnaþings vestra ræddi þá erfiðu stöðu sem sauðfjárbændur standa nú frammi fyrir á fundi sínum í dag. Ljóst er að tekjutap bænda verður gríðarlegt komi sú lækkun á afurðaverði sem tilkynnt hefur verið til framkvæmda og hefur það áhrif á samfélagið allt en ekki aðeins sauðfjárbændur. Miðað við boðaða verðlækkun mun heildarverðmæti dilkakjöts í sveitarfélaginu lækka úr 426 milljónum haustið 2016 niður í 281 milljón á þessu hausti og er það lækkun um 145 milljónir króna. Svohljóðandi bókun var lögð fram á fundinum:

Sveitarstjórn Húnavatnshrepps hefur sent frá sér ályktun þar sem hún lýsir yfir þungum áhyggjum af fyrirætlunum um stórfellt eldi frjórra norskra laxa við strendur landsins þar sem ljóst sé að slíkt eldi geti haft margvísleg neikvæð áhrif á villta stofna silunga og laxa. Erfðablöndun sé þó þeirra alvarlegust.

Þróunarsvið Byggðastofnunar, í samvinnu við Hagfræðistofnun Háskóla Íslands, hefur gefið úr skýrsluna Hagvöxtur landshluta 2008-2015 og er þetta í áttunda skipti sem slík skýrsla er unnin. Nokkrar af helstu niðurstöðum skýrslunnar eru að hagvöxtur á tímabilinu mældist 3% á höfuðborgarsvæðinu en 6% utan þess. Framleiðsla jókst mest á Suðurnesjum, Norðurlandi eystra og Suðurlandi. Lítill vöxtur var á Austurlandi og Norðurlandi vestra og að á Vestfjörðum dróst framleiðsla saman.

Þegar Drangey SK 2 var formlega gefið nafn í gær á höfninni á Sauðárkróki vildi ekki betur til en svo að kampavínsflaskan sem sveiflað var í hlið skipsins brotnaði ekki fyrr en í annarri tilraun. Merkilegt hvað seigt er í þessum flöskum nú til dags.

Íþróttagarpurinn - Júlía Kristín Pálsdóttir

Fjöldi fólks var viðstatt hátíðlega vígslu og skírn Drangeyjar SK 2, nýjasta togara flotans fyrr í dag. Áður en Stefán Vagn Stefánsson, formaður byggðaráðs Svf. Skagafjarðar, lét kampavínsflöskuna skella á skipsskrokki, höfðu Þórólfur Gíslason, kaupfélagsstjóri; Jón E. Friðriksson, framkvæmdastjóri FISK Seafood; Þorgerður Katrín Gunnarsdóttir, landbúnaðar- og sjávarútvegsráðherra og Ásta Pálmadóttir haldið tölu í tilefni dagsins. Eftir að skipið hafði fengið nafn með formlegum hætti, blessaði séra Sigríður Gunnarsdóttir hið nýja og glæsilega skip og óskaði því velfarnaðar í framtíðinni.

Drangey, hið nýja skip FSK Seafood er á leið til hafnar á Sauðárkróki en þar verður haldin formleg móttaka í dag. Siglir skipið í fylgd Málmeyjar inn fjörðinn.

Þórhallur Guðmundsson er löngu orðinn landskunnur fyrir miðilsstörf sín enda iðinn við að halda fundi víða um land sem og að hafa verið með þætti bæði í útvarpi og sjónvarpi fyrr á árum. Hann hefur haldið fundi reglulega á Sauðárkróki og myndað sterk tengsl við Skagfjörð og íbúa hans. Stutt er síðan Þórhallur hélt fundi á Sauðárkróki og freistaðist undirritaður til þess að taka hann tali og forvitnast um miðilshæfileikana, líf eftir dauðann og jafnvel tilgang lífsins.

Matgæðingar Feykis í 32. tölublaði ársins 2015 voru þau Áslaug Ottósdóttir og Sigurður Sverrir Ólafur Hallgrímsson frá Skagaströnd. Þau sendu inn girnilegar uppskriftir; humarsúpu að hætti Áslaugar í forrétt, beikon- og piparostafylltan hamborgara í aðalrétt, ásamt uppskrift af heimagerðu hamborgarabrauði, og loks Oreo ostaköku í eftirrétt.

Það var mikið um að vera Lögreglunni á Norðurlandi vestra síðastliðna viku samkvæmt fésbókarsíðu embættisins en þar hafa umferðarmál komið mikið við sögu. Alls voru 152 ökumenn kærðir fyrir of hraðan akstur og var sá hraðasti mældur á 162 km/klst á milli Sauðárkróks og Varmahlíðar þar sem hámarkshraði er 90.