Fréttir

Blikar buðu Brilla og félögum í Tindastóli upp í dans í Smáranum í gærkvöldi í frekar sérstökum körfuboltaleik. Samkvæmt Pétri Ingvarssyni þjálfara Breiðabliks ætlar hann að láta lið sitt spila svæðisvörn í vetur og það gerðu þeir svo sannarlega. Hún var reyndar ekki góð og gaf Tindastólsmönnum opin færi nánast allan leikinn. Þetta virtist Brynjari Þór Björnssyni þykja hin besta skemmtun því hann tók sig til og setti splunkunýtt Íslandsmet í 3ja stiga skotum – setti niður 16 þrista og virtist njóta sín nokkuð vel. Lokatölur voru 82-117 fyrir Tindastól sem situr sem fyrr á toppi Dominos-deildarinnar með jafn mörg stig og Njarðvík.

Byggðaráð Blönduósbæjar tók fyrir, á fundi sínum í síðustu viku, erindi frá velferðarráðuneytinu varðandi móttöku á flóttafólki. Í erindinu er Blönduósbæ boðið að taka á móti sýrlenskum flóttamönnum og ennfremur tíundaður sá kostnaður sem ríkissjóður greiðir fyrir fyrsta árið eftir komu flóttafólks til landsins.

Hefur þú velt því fyrir þér hvernig fólk brást við þegar veikindi og slys bar að höndum fyrr á öldum? Læknisfræði hefur fleygt fram síðustu áratugi og nú finnst okkur sjálfsagt að hafa aðgang að lækni í nágrenninu þegar eitthvað bjátar á, en fram á síðari hluta 19. aldar voru aðeins sjö læknisembætti á Íslandi, auk landlæknis.[1]

Jólin koma með þér er fyrsta lagið sem þau Sigga Beinteins og Páll Óskar flytja saman. Lagið er eftir Ásgeir Val Einarsson en hann samdi einnig textann ásamt Páli Óskari. Um upptökustjórn sá Skagfirðingurinn Óskar Páll Sveinsson en lagið var gefið út á smáskífu 24. nóvember 2011 af Sigríði Beinteinsdóttur. Vídeóið hér að neðan er frá jólatónleikum Siggu Beinteins, Á hátíðlegum nótum árið 2012.

Sunna Björk Atladóttir, leikmaður Tindastóls til fjölda ára og lögmaður hjá Pacta lögmönnum á Sauðárkróki, heldur með Manchester United í Enska boltanum. Hún segir að sex ára gömul hafi pabbi hennar farið með hana á fótboltaæfingu án þess að hún hefði nokkuð um það að segja. „Jólin, það sama ár, fengum við systkinin jólagjöf frá enska jólasveininum sem innihélt Manchester United treyju nr. 7, Beckham, handa mér en bróðir minn fékk treyju nr. 20, Solskjær. Þá var ekki aftur snúið,“ segir Sunna sem svarar hér spurningum í Liðinu mínu á Feyki og kemur þar með leiknum af stað á ný.

Árið 1975 kom út jólaplata með stórsöngvurunum Guðmundi Jónssyni og Guðrúnu Á. Símonardóttur sem sungu jólalög úr ýmsum áttum. Öll eru lögin á plötunni erlend en við texta m.a. Ólafs Gauks og Jóhönnu G. Erlingsdóttur. Hér heyrum við flutning Guðmundar á Snæfinni snjókarli en lagið var samið af þeim Walter „Jack“ Rollins og Steve Nelson og fyrst flutt af Gene Autry og Cass County Boys árið 1950.

Hvenær er rétti tíminn til þess að hefja háskólanám? Seinustu vikur hefur háskólinn verið mjög ofarlega í huga mér, og hvort það hafi verið góð hugmynd að hefja háskólanámið á þeim tíma sem að ég gerði. Var ég tilbúin í það að takast á við þá vinnu og það álag sem fylgir háskólanum? Til að byrja með var ég það og hafði fullan metnað og fulla einbeitingu til þess að vinna í þessu.

Það eru þau Elín Árdís Björnsdóttir og Unnar Bjarki Egilsson á Sauðárkróki sem gáfu lesendum uppskriftir í 47. tbl. ársins 2016. Í forrétt var grafin ýsa og í aðalrétt sætkartöflukjúlli með feta og furuhnetum. „Einnig nota ég mikið sömu uppskrift en skipti út kjúklingnum fyrir þorsk eða þorskhnakka, það kemur líka vel út,“ sagði Elín Árdís. Í eftirrétt buðu þau svo upp á glænýja uppskrift af ístertu með salthnetumarengsbotni sem birtist í Nóa Síríus kökubæklingnum þetta ár.

Hér er alveg glænýtt lag frá Geirmundi Valtýssyni sem heitir Hvað er það við jólin? Textann gerði Guðrún Sighvatsdóttir en flytjandi er Sigurlaug Vordís Eysteinsdóttir. Útsetning, hljóðfæraleikur, upptökur og hljóðblöndun var í höndum Sigfúsar Arnars Benediktssonar í Stúdíó Benmen Sauðárkróki.

Unnið verður fram eftir degi að hreinsun á hitaveituholu og niðursetningu nýrrar dælu við Hverhóla í Skagafirði og mega notendur hitaveitu í Lýtingsstaðarhreppi búast við truflunum á heitavatnsrennsli á meðan framkvæmdum stendur. Á heimasíðu Skagafjarðaveitna kemur fram að síðastliðna helgi hófst borun hitaveituholu í landi Hverhóla í Lýtingsstaðahreppi hinum forna en tilgangur holunnar er að auka rekstraröryggi hitaveitunnar.