Fréttir

Við hátíðlega athöfn á Bessastöðum þann 17. júní sæmdi forseti Íslands, Guðni Th. Jóhannesson, fjórtán Íslendinga heiðursmerki hinnar íslensku fálkaorðu. Meðal þeirra var Skagfirðingurinn Nanna V. Rögnvaldardóttir rithöfundur sem hlaut riddarakross fyrir ritstörf á sviði matarmenningar. Feykir hafði samband við Nönnu og byrjaði á að spyrja hvort þessi heiður hafi komið henni á óvart?

Ég er aðfluttur Skagstrendingur, fæddur og uppalinn vestur í Arnarfirði. Átti þó mikla tengingu við Skagaströnd, þar sem móðir mín var þaðan. Fyrir nokkrum dögum söng kirkjukór Hólaneskirkju við útför mikils heiðursmanns, sem fæddist hér, starfaði og lifði í 98 ár. Eitt af lögunum sem kórinn flutti var lagið, „Hafið eða fjöllin“.

Eggert Þór Birgisson og Birgitta Pálsdóttir á Sauðárkróki sem voru matgæðingar vikunnar í 25. tbl. Feykis árið 2013 buðu upp á fljótlega súpu og ís á eftir. „Uppskriftin er af súpu sem Birgitta fékk hjá góðum vinnufélaga. Súpan er fljótleg og góð. Eftirmaturinn er ís með heitri sósu. Við skorum á Ásdísi Árnadóttur og Arnþór Gústafsson að koma með næstu uppskrift."

Það er óhætt að fullyrða að landinn sé heltekinn af fótboltahita þessa dagana en eins og allir vita er íslenska landsliðið á HM í Rússlandi og spila þar einmitt í dag sinn annan leik. Það verður líka nóg af fótbolta á Króknum um helgina en þá fer Landsbankamótið fram á íþróttasvæðinu á Sauðárkróki og nú fyrr í vikunni var samæfing yngri flokka Tindastóls, Smára og Neista á nýja gervigrasvellinum.

Um helgina fara fram hinir árlegu Lummudagar í Skagafirði en þeir voru fyrst haldnir árið 2009 og er þetta því í tíunda skiptið sem Skagfirðingar skreyta götur og heimreiðar með sínum litum.

Ferðamálafélag Húnaþings vestra hefur gefið út smáforrit sem nefnist „Hunathing“. Smáforritið hefur að geyma allar helstu upplýsingar um Húnaþing vestra og þá þjónustu sem þar er í boði. Tilgangur smáforritsins er að auka jákvæða upplifun ferðamanna á svæðinu sem og að auðvelda þeim sem leiðsegja gestum um svæðið starf sitt.

Sjónvarpsstöðin N4 hefur undanfarið sýnt þætti um liðsmenn íslenska fótboltalandsliðsins frá landsbyggðunum og er Skagfirðingurinn Hólmar Örn Eyjólfsson á meðal þeirra. Í þættinum um Hólmar Örn kemur fram að lengi framan af hafði hann takmarkaðan áhuga á fótbolta en þegar á unglingsárin var komið ákvað hann að gefa sig allan í sportið og fara alla leið.

Sigurður Guðjónsson sýnir á Blönduósi innsetninguna „INNLJÓS“ sem samanstendur af þremur vídeóverkum. Um er að ræða nýja umgjörð verksins en verkin vöktu óskipta athygli gesta í kapellu Sankti Jósefsspítalans í Hafnarfirði síðastliðið haust og færði sýningin Sigurði Íslensku Myndlistarverðlaunin 2018. Sýningin er haldin í samvinnu við ábúendur á Kleifum og eru öll verkin á sýningunni í eigu Listasafns ASÍ. Opnar hún þann 7. júlí kl. 15:00 og eru allir velkomnir.

Hinir margrómuðu VSOT tónleikar verða haldnir i Bifröst í kvöld og samkvæmt síðustu fréttum hefjast þeir klukkan 20. Að sögn Þórólfs Stefánssonar, eins skipuleggjanda tónleikanna, verður þetta hátíð gleðinnar, kærleikans og vináttu og ekki síst hátíð listamanna sem eru búsettir á Krók eða af Króknum.

Ráðherrar, þingmenn og samstarfsaðilar aðildarríkja Fríverslunarsamtaka Evrópu (EFTA) koma saman til árlegs sumarfundar mánudaginn 25. júní nk. Fundurinn fer að þessu sinni fram á Sauðárkróki. Guðlaugur Þór Þórðarson stýrir fundinum en Ísland fer um þessar mundir með formennsku í EFTA.