Fréttir

Nú hafa veiðst 3239 laxar i Miðfjarðará og er hún enn sem fyrr í öðru sæti á listanum yfir aflahæstu árnar. Á sama tíma í fyrra höfðu veiðst 3677 laxar í ánni. Blanda, sem verið hefur í fimmta sæti á listanum, fellur nú niður í það sjötta með 1430 laxa en ekki veiddust nema 13 laxar í ánni í síðustu viku. Er þar fyrst og fremst að kenna yfirfallinu í Blöndulóni. Miklu munar á veiðinni í Blöndu nú og á síðasta ári þegar hún hafði skilað 2330 löxum á sama árstíma.

Leikfélag Akureyrar æfir nú í Samkomuhúsinu sýninguna Kvenfólk eftir Hund í óskilum. Í sýningunni fara þeir félagar í Hjörleifur Hjartarsson og Eiríkur Stephensen á hundavaði yfir kvennasöguna undir leikstjórn Ágústu Skúladóttur. Sýningin verður frumsýnd þann 29. september og sýnd í október og nóvember í Samkomuhúsinu.

Grunnskólanemendur á Norðurlandi vestra fengu góða heimsókn í gær og fyrradag þegar hljómsveitin Milkywhale hélt tónleika á sex stöðum á svæðinu. Tónleikarnir eru á vegum barnamenningarverkefnisins List fyrir alla sem er á vegum mennta- og menningarmálaráðuneytisins og er því ætlað að velja og miðla listviðburðum til barna og ungmenna um land allt og jafna þannig aðgengi barna á grunnskólaaldri að fjölbreyttum og vönduðum listviðburðum, óháð búsetu og efnahag. Höfuðáhersla er lögð á list fyrir börn og list með börnum og stefnt að því að á tíu ára grunnskólagöngu veiti verkefnið börnum góða yfirsýn yfir vettvang lista. Hægt er að kynna sér verkefnið betur á heimasíðunni List fyrir alla.

Sundlaugin á Hvammstanga hefur verið vel sótt í sumar, jafnt af ferðamönnum og heimamönnum. 12.500 gestir sóttu afþreyingu af einhverju tagi hjá íþróttamiðstöðinni yfir sumarmánuðina að því er segir á vef Húnaþings vestra. Eru það fleiri gestir en á sama tíma í fyrra þegar talan var 11.510 fyrir sömu mánuði. Sundgestum hefur fjölgað mest og hafa starfsmenn íþróttamiðstöðvar fengið mikið hrós frá innlendum gestum fyrir hófsamt verð á sundmiða en á Hvammstanga kostar stakur miði í sund aðeins 550 krónur. Starfsmenn íþróttamiðstöðvarinnar hafa orðið þess varir að ferðamenn sem eru á staðnum í nokkra daga leyfi sér að koma aftur og aftur í sund vegna viðráðanlegs kostnaðar.

Á fundi landbúnaðarnefndar Sveitarfélagsins Skagafjarðar sem haldinn var í gær, miðvikudaginn 6. september, var fundarefnið staða sauðfjárbænda. Hvetur nefndin til að hagsmunaaðlilar taki á hinni grafalvarlegu stöðu sem uppi sé í sauðfjárrækt á Íslandi þegar allt að þriðjungslækkun á afurðaverði blasi við sauðfjárbændum.

Nafn: Björn Ingi Óskarsson. Árgangur: 82. Hvað er í deiglunni: Enski er byrjaður og það er okkar ár. Síðan bara að vinna úr hugmyndunum sem ég og Viktoría erum búin að fá í sænska fæðingarorlofinu okkar. Hvað varstu að hlusta á þegar þú fékkst bílprófið? Án þín með Sverri og Binna. Hvaða íþróttamanni hefurðu mestar mætur á? Eru íþróttamenn ekki pínu ofmetið fyrirbæri. Yfirleitt einstaklingar sem þiggja laun sem eru í engum tengslum við raunveruleikann eða framlag þeirra til samfélagsins, hlaupandi eftir bolta í algjöru tilgangsleysi?. Djók, sá sem var bestur í síðasta Liverpool sigri er yfirleitt í mesta uppáhaldi þangað til næsti sigur kemur. Já og Guðbrandur Guðbrandsson.

Á laugardaginn kemur, þann 9. september, stendur Lögfræðingafélag Íslands fyrir vettvangsferð á slóðir síðustu aftökunnar á Íslandi. Á annað hundrað manns eru væntanlegir til Hvammstanga þar sem ný réttarhöld í málinu, sem átti sér stað fyrir tæpum 200 árum, verða settt á svið.

Þau leiðu mistök urðu í auglýsingu frá Sálarrannsóknarfélagi Skagafjarðar að nafn miðilsins sem þar var tilgreint er ekki rétt. Hið rétta er að Valgarður Einarsson miðill verður við störf á Sauðárkróki dagana 13.-17. september en ekki Þórhallur Guðmundsson eins og sagt var í auglýsingunni.

Ferðafélag Íslands mun standa fyrir lýðheilsugöngum um allt land, alla miðvikudaga í september að því er segir í fréttatilkynningu frá félaginu. Göngurnar eru hluti af afmælisdagskrá FÍ en félagið fagnar 90 ára afmæli á árinu. Göngurnar hefjast kl. 18:00 alla miðvikudaga, vítt og breitt um landið, og verður fyrsta gangan í dag, 6. september. Um er að ræða fjölskylduvænar göngur sem taka u.þ.b. 60-90 mínútur og er tilgangurinn með verkefninu að hvetja fólk á öllum aldri til útivistar og hreyfingar í góðum félagsskap og efla þar með heilsu sína og lífsgæði.