Fréttir

Blóðbankabíllinn verður á Sauðárkróki við Skagfirðingabúð í dag frá kl. 12:00-17:00 og á morgun fimmtudaginn 08.sept. frá kl. 09:00-11:30. Þá fer hann á Blönduós og verður við N1 frá kl. 14:00-17:00. Til að mæta þörfum samfélagsins þarf Blóðbankinn um 16.000 blóðgjafa á ári eða 70 blóðgjafa á dag svo það er um að gera að mæta og gefa blóð.

Nafn: María Gréta Ólafsdóttir. Árgangur: 1956. Hvað er í deiglunni: Það helsta er að við stefnum á að flytja á Krókinn aftur eftir 16 ár í Hjaltadal og þurfum því að selja húsið okkar í sveitinni, með nokkurri eftirsjá reyndar. Hver var mikilvægasta persóna síðustu 100 ára að þínu mati? Rosa Parks, þeir sem ekki þekkja þetta nafn ættu að kynna sér það, þetta var ein merkilegasta kona allra tíma.

Stelpurnar í meistarflokki Tindastóls taka á móti Keflavík í úrslitakeppni 1. deildar á Sauðárkróksvellli í dag. Um seinni viðureign liðanna er að ræða og hrein úrslit verða að nást. Fyrri leikur liðanna fór fram sl. sunnudag í Keflavík og þar höfðu heimastúlkur betur í spennandi leik 3-2 svo 1-0 sigur dugar fyrir okkar stelpur með fleiri mörk skoruð á útivelli.

Lokamót Norðurlandsmótaraðar barna og unglinga fór fram á Jaðarsvelli á Akureyri sunnudaginn 4. september s.l. Að venju átti Golfklúbbur Sauðárkróks marga þáttakendur í öllum flokkum sem keppt var í. Þá voru einnig krýndir Norðurlandsmeistarar í öllum flokkum og þar átti Golfklúbbur Sauðárkróks tvo sigurvegara.

Endurtektarkosning fyrir röðun á framboðslista Pírata í Norðvesturkjördæmi stendur yfir og lýkur kosningu á hádegi á morgun, 7. september. Ellefu frambjóðendur gefa áfram kost á sér en bæði Þórður Guðsteinn Pétursson, sem kosinn var efstur á lista í prófkjörinu, og Halldóra Sigrún Ásgeirsdóttir, kapteinn Pírata á Vestfjörðum, hafa ákveðið að gefa ekki kost á sér í endurkosningunni.

Sveitarfélagið Skagafjörður tekur ekki þátt í Útsvari, Spurningakeppni sveitarfélaga, í Ríkissjónvarpinu í vetur. Á vef Sveitarfélagsins Skagafjarðar kemur fram að líkt og síðustu ár keppa 24 sveitarfélög í Útsvari, þau átta lið sem komust í fjórðungsúrslit síðasta vetur eru sjálfskrafa með þennan veturinn. Hin sextán eru dregin út eftir stærð sveitarfélaganna og var Sveitarfélagið Skagafjörður ekki dregið út að þessu sinni.

Nú er sá tími kominn að smalað er út um allar koppagrundir og sauðfé sótt á fjöll og sláturtíð í vændum. Því kom það smölunum, Sveini á Lýtingsstöðum og Björk á Korná í opna skjöldu er þau sáu kind vera að bera í gær.

Blönduskóli hefur óskað eftir því við Blönduósbæ að fá leyfi til að koma sér upp útikennslusvæði í rjóðri norðarlega í Fagrahvammi. Stendur m.a. til að koma upp bekkjum úr trjábolum og aðstöðu undir eldstæði, en svæðið mun auk annars nýtast til heimilisfræðikennslu.

Kjötafurðastöð Kaupfélags Skagfirðinga og Sláturhús KVH hafa nú birt verðskrá fyrir sláturtíð 2016 en hún mun taka gildi þann 12. september. Á heimasíðu Kaupfélags Skagfirðinga segir að mikið hafi borist af sláturfjárloforðum til sláturhúsa KS og KVH og er þegar búið að skipuleggja slátrun vel fram í október. Sama verðskrá gildir frá byrjun og út sláturtíð þar sem ekki greiðist álag á einstakar vikur.

Það er ánægjulegt að sjá hve margir vilja leggja málstað Vinstri grænna lið í komandi kosningum. Mest um vert er að okkur takist að koma frá þeim stjórnmálaöflum sem hafa haft sérhagsmunagæslu og dekur við auðvaldið að leiðarljósi frá því að ríkisstjórn Sjálfstæðis og Framsóknarflokks komst til valda. Verkefnin framundan eru fjölmörg og við verðum að snúa við þeirri óheillaþróun sem blasir við í neikvæðri byggðaþróun og stórauknum ójöfnuði í landinu.