Fréttir

Á fundi byggðaráðs Húnaþings vestra á mánudaginn var tekið fyrir bréf frá Innanríkisráðuneytinu þar sem erindi frá því í júní í sumar, varðandi Vatnsnesveg, var svarað. Fram kemur að nýverið hafi verið samþykkt á Alþingi samgönguáætlun áranna 2015 – 2018 þar sem gert er ráð fyrir að byggð verði ný brú á Tjarnará og að framkvæmdir hefjist á árin u 2018. Áformað er að veita 200 milljónir til þeirrar framkvæmdar.

Í sumar var auglýst í Bændablaðinu eftir umsóknum um stuðning til söfnunar ullar og barst ein umsókn frá ÍSTEX hf. sem er reiðubúið til þess að uppfylla öll skilyrði verklagsreglna um ráðstöfun fjár vegna ullarnýtingar. Fyrirkomulag um greiðslur til bænda er þannig háttað að fjármunum til ullarnýtingar er ráðstafað að a.m.k. 85% til bænda og fjárhæðinni deilt niður hlutfallslega eftir gæðum á hvert kíló hreinnar ullar

Miðvikudaginn 19. október kom fjögurra manna hópur á Héraðsskjalasafn Austur-Húnavatnssýslu á Blónduósi til að bera kennsl á myndir en fyrir þeirri uppákomu stóð Guðmundur Paul Jónsson en hann hefur umsjón með myndasafninu. Er þetta liður í átaki sem fellst í því að fanga minningar fólks áður en það er orðið um seinan.

Gunnar Bragi Sveinsson oddviti Framsóknarflokksins í Norðvestur kjördæmi segir það engin áhrif hafa á sín störf þó nafn hans hafi oftast verið strikað út af lista flokksins í nýliðnum alþingiskosningum. Hann segist munu áfram rækja þau störf af heilindum, ábyrgð og eins og samviska hans segir til um.

Í dag, fimmtudag og á morgun, föstudag verða haldnir opnir dagar í Háskólanum á Akureyri. Þar gefst framhaldsskólanemum og öðrum gestum tækifæri á að kynna sér námið við skólann og spjalla við kennara og nemendur um námið. Einnig verður farið í gönguferðir um húsið.

Þjóðleikhúsið er á ferð um landið þessa dagana með barnasýningu sem nefnist Lofthræddi örninn Örvar. Í morgun fóru börn í skólahóp leikskólanna og 1. bekk grunnskólanna í Menningarhúsið Miðgarð og horfðu á sýninguna.

Skráð atvinnuleysi í september sl. var innan við 1% á Norðurlandi vestra. Meðalfjöldi á atvinnuleysisskrá í landshlutanum var 30. Atvinnuleysi var umtalsvert hærra hjá konum eða 1,2% á móti 0,5% hjá körlum. Mest var atvinnuleysið í Sveitarfélaginu Skagafirði, sem er jafnframt langfjölmennasta sveitarfélagið. Í Akrahreppi og Skagabyggð var ekkert skráð atvinnuleysi.

Gunnar Bragi Sveinsson var sá frambjóðandi í Norðvesturkjördæmi sem oftast var strikaður út af nöfnum þeirra sem buðu sig fram í kjördæminu til setu á Alþingi sl laugardag. Þetta kemur fram í skýrslu yfirkjörstjórnar til landskjörstjórnar og Hagstofu Íslands og Mbl.is greinir frá.

Þriðjudaginn 1. nóvember 2016 komu félagar í Veðurklúbbnum á Dalbæ saman til fundar. Hófst hann kl. 14:00 og voru fundarmenn alls 14 talsins. Áður en fundi lauk tæpum hálftíma síðar vae farið yfir sannleiksgildi veðurspár fyrir októbermánuð og voru félagar að vonum ánægðir með hversu vel hefði til tekist.

Eins og flestir ættu að kannast við hækkaði Kjararáð þingfararkaup alþingismanna um tæp 45 prósent nú um mánaðarmót eða alls um 338.254 krónum á mánuði. Hækka laun þeirra þá úr 762.940 krónur á mánuði í 1.101.194 krónur. ASÍ krefst þess að ákvörðun kjararáðs verði dregin til baka því annars verður óstöðugleiki og upplausn á vinnumarkaði í boði Alþingis.