Íþróttir

Það var boðið upp á allt (nema góða skotnýtingu) þegar gömlu erkifjendurnir, KR og Tindastóll, mættust á Meistaravöllum í Subway-deildinni í gærkvöldi. Stuðningsmenn Tindastóls fjölmenntu að sjálfsögðu og studdu sína menn af fítonskrafti og ekki veitti af því leikurinn var æsispennandi, liðin skiptust þrettán sinnum á um að hafa forystuna og það þurfti að framlengja. Sekúndubroti munaði að Vesturbæingar hefðu náð að sigra leikinn en sigurinn féll Stólamegin eftir magnaðan þrist frá Arnari þegar fimm sekúndur voru eftir. Lokatölur 82-83 fyrir Tindastól.

Stólastúlkur spiluðu annan leik sinn í 1. deild kvenna í gær þegar sterkt lið ÍR mætti í Síkið. Lið Tindastóls gerði vel í fyrsta leikhluta en villuvandræði lykilleikmanns snemma leiks dró svolítið úr heimastúlkum og Breiðhyltingar gengu á lagið og tryggðu sér sigurinn með góðum leik í þriðja leikhluta. Lokatölur 52-75.

„Ég reikna með að við spilum vörn í vetur og sendum boltann á milli,“ svaraði Baldur Þór spurningu Stöð2Sport fyrir fyrsta leik Tindastóls í Subway-deildinni þennan veturinn. Með þessu svari hefur hann örugglega glatt alla stuðningsmenn Stólanna sem flestir voru ókátir með spilamennsku liðsins á síðasta tímabili. Andstæðingar Tindastóls í fyrsta leik voru Valsmenn og þó leikur Tindastóls hafi ekki verið fullkominn þá var spiluð hörkuvörn, boltinn var hreyfður vel og leikgleði og vilji leikmanna var smitandi. Niðurstaðan var góður 76-62 sigur og fín byrjun á mótinu.

Á þriðjudaginn var haldinn kynningarfundur fyrir komandi leiktíð í úrvalsdeildum karla og kvenna í körfubolta þar sem spár þjálfara, fyrirliða og formanna liða í úrvals- og 1. deildum karla og kvenna voru m.a. kynntar, ásamt spá fjölmiðla fyrir úrvalsdeildir karla og kvenna. Karlaliði Tindastóls er spáð 3. sæti af þjálfurum, fyrirliðum og formönnum en 5. sæti af fjölmiðlum en kvennaliðið því áttunda. Í upphafi fundar var skrifað undir samning við nýjan samstarfsaðila úrvalsdeilda og heitir nú Subway-deildin og tekur við af Dominos.

Kvennalið Tindastóls hóf leik í 1. deild kvenna í körfubolta nú undir kvöld. Stelpurnar heimsóttu þá sameinað lið Hamars og Þórs Þ. og var spilað í Hveragerði. Lið Tindastóls fór vel af stað en heimastúlkur svöruðu fyrir sig í öðrum leikhluta og voru tveimur stigum yfir í hálfleik. Í þriðja leikhluta gekk allt upp hjá liði Tindastóls sem náði góðu forskoti og sigraði leikinn örugglega 76-89.

Skagfirðingurinn Vanda Sigurgeirsdóttir var kosin nýr formaður KSÍ á aukaþingi sambandsins sem fór fram á Hilton Reykjavík Nordica í dag. Á heimasíðu Knattspyrnusambands Íslands segir að Vanda sé fyrsta konan sem er kosin formaður KSÍ og verður hún fyrst kvenna til þess að taka við embætti formanns í aðildarsambandi UEFA. Hún verður tíundi formaður KSÍ og tekur við af Guðna Bergssyni sem sagði nýverið af sér en ljóst er að verkefnin fram undan fyrir formann KSÍ eru mörg hver afar brýn og erfið.

Dregið var í 32-liða og 16-liða úrslit í VÍS bikarkeppni KKÍ í dag í húsakynnum VÍS í 108 Reykjavík og voru bæði karla- og kvennalið Tindastóls að sjálfsögðu í pottinum góða. Ekki bauð fyrrnefndur pottur Stólum upp á heimaleiki því stelpurnar mæta liði Breiðabliks í Kópavogi en strákarnir fara í Fjósið í Borgarnesi þar sem gulir og glaðir Skallagrímsmenn bíða spenntir.

Í dag fara fram æfingar í Boganum á Akureyri þar sem ungir og efnilegir knattspyrnukrakkar af öllu Norðurlandi taka þátt í og fá tækifæri til að láta ljós sitt skína. Eru þær liður í Hæfileikamótun sem N1 og KSÍ. Sextán fara frá Tindastóli.

Laugardaginn 16. október ætlar Körfuknattleikssamband Íslands að vera með körfuboltadag í íþróttamiðstöðinni á Blönduósi. Þar verða haldnar æfingar og farið í leiki með því markmiði að kynna körfuboltann fyrir krökkum á Blönduósi og nærsveitum.

Vanda Sigurgeirsdóttir var sú eina sem bauð sig fram til formanns KSÍ en kosningar fara fram á aukaþingi þann 2. október nk. Hún er því sjálfkjörin til embættisins líkt og stjórn og varastjórn sem einnig eru sjálfkjörin þar sem jafn margir buðu fram krafta sína og þurfti að manna. Formaður og stjórn sitja því til bráðabirgða og starfa fram að næsta knattspyrnuþingi sem haldið verður í febrúar árið 2022.