Ljósmyndavefur

Sæluvika Skagfirðinga var sett í blíðaskaparveðri í gær en athöfnin fór fram í Safnahúsinu á Sauðárkróki. Þá var opnuð glæsileg myndlistarsýning Hallrúnar Ásgrímsdóttur, tilkynnt úrslit í Vísnakeppni Safnahúss Skagfirðinga og opinberað hver hlyti fyrstu Samfélagsverðlaun Sveitarfélagsins Skagafjarðar, sem afhent verða í Sæluviku ár hvert framvegis. Nemendur úr Tónlistarskóla Skagafjarðar léku nokkur lög á milli ávarpa.

Það var margt um manninn í Hátæknimenntasetri Fjölbrautaskóla Norðurlands vestra síðastliðinn miðvikudag til að fylgjast með vígslu nýrrar Eldsmiðju í skólanum. Enda hefur hennar verið beðið með mikilli eftirvæntingu í 16 ár, að sögn Björns Sighvatz, kennari í málmiðngreinum við skólann. Þá hafa jafnvel nokkrir beðið þess að komast á námskeið í eldsmíði í tíu ár.

Íbúar Blönduósbæjar áttu góðu gengi að fagna í landsleiknum Allir lesa og höfnuðu í sjötta sæti þegar horft var á lestur eftir búsetu, samkvæmt fréttatilkynningu. Meðallestur þátttakenda í sveitarfélaginu voru rúmir 17 klukkutímar á fjögurra vikna tímabili.

Það hefur verið stillt veðrið á Sauðárkróki síðasta sólarhringinn en í gærkvöldi fór að snjóa og hafa Króksarar varla haft undan að hreinsa snjóinn af bílum sínum það sem af er degi. Um er að ræða hálfgerðan klessusnjó enda hiti verið yfir frostmarki eða um frostmark. Útlit er fyrir að það snjói áfram um helgina en Veðurstofan gerir ráð fyrir að með kvöldinu snúist vindurinn og blási úr norðri um helgina og það jafnvel nokkuð duglega.

Þann 3. febrúar var sjósettur fyrsti báturinn sem smíðaður er hjá fyrirtækinu Mótun á Sauðárkróki. Um er að ræða trefjaplastbát af tegundinni Gáski 1180. Ber hann nafnið Agla ÁR 79 og er í eigu fyrirtækisins AAH ehf. sem hefur aðsetur í Reykjavík.

Að venju var líf og fjör á Bókasafni Húnaþings vestra á Hvammstanga á öskudaginn. Að sögn Guðmundar Jónssonar, starfsmanns þar, flykktust börnin þangað til að syngja og þáðu sælgæti fyrir.

Það er ekki á hverjum degi sem Feykir fær heimsóknir frá syngjandi kátum vampírum og nornum, Bat- og köngulóarmönnum, prinsessum og og hvað þá Almari í kassanum. Ef einhverjir voru ekki klárir á því hvaða dagur var þá varð snemma ljóst að það var runninn upp enn einn yndislegur öskudagur, fullur af gleði og söng.

Dagur leikskólans er haldinn hátíðlegur þann 6. febrúar ár hvert. Þar sem dagurinn ber upp á laugardegi þetta árið þjófstörtuðu börn á eldra stigi leikskólans Ársala á Sauðárkróki hátíðarhöldum sl. miðvikudag með því að syngja fyrir búðargesti Skagfirðingabúðar. Tilgangurinn með deginum er að auka jákvæða umræðu um leikskólann, vekja umræðu um hlutverk leikskóla og starf leikskólakennara og kynna starfsemina út á við.

Himininn á Norðurlandi vestra var einstaklega fagur í síðastliðinni viku. Hver dagur á eftir öðrum hófst með appelsínugulum og bleikum bjarma sem litaði allt umhverfið og enduðu dagarnir með sömu litadýrðinni.

Árshátíð eldri nemenda í Varmahlíðarskóla fór fram fyrir fullu húsi í Miðgarði föstudaginn 15. janúar. Nemendur í 7. - 10. bekk skólans settu söngleikinn „6-tán á (von) LAUSU“ á svið eftir Gísli Rúnar Jónsson. „Sýningin tókst afskaplega vel,“ sagði Helga Rós Sigfúsdóttir, sem leikstýrði krökkunum, í samtali við Feyki.