Skagafjörður

Helga Gunnarsdóttir, kennari á Skagaströnd, svaraði spurningum í Bók-haldinu í páskablaði Feykis árið 2017. Helga bjó í Kaupmannahöfn fyrstu sjö árin en síðan á Hvanneyri og Selfossi þar til hún flutti að Akri í Austur-Húnavatnssýslu þar sem foreldrar hennar búa nú. Helga hefur gaman af ýmiss konar bókum, ekki síst ævintýrabókum, og tekur oft miklu ástfóstri við persónur þeirra.

Föstudagsmorguninn 16. mars mætti stór hópur jeppamanna í Skagafjörðinn á landsmót 4x4 klúbbsins á Íslandi. Farnir voru bíltúrar á fjöll bæði föstudag og laugardag og á laugardagskvöld var svo boðið upp á sameiginlegan kvöldmat í Miðgarði. Skagafjarðardeild 4x4 klúbbsins stóð að undirbúningi heimsóknarinnar og skipulagði bíltúrana. Undirrituðum var boðið með í föstudagstúrinn sem hófst við Hótel Varmahlíð en þar gisti stór hópur gestanna. Ferðasöguna er hægt að nálgast í 12. tbl. Feykis ásamt myndir en einnig var vídeóvélin á lofti og hér fyrir neðan er hægt að sjá afraksturinn.

Verið velkomin ! Á sýningaropnun á verkum Einars Fals Ingólfssonar í Gallerí Gangi, Kárastíg 9, Hofsósi laugardaginn 31. mars nk. kl. 14. Sýning Einars Fals Ingólfssonar „(Fullt hús) / Tómt hús“ verður opnuð á Ganginum, heimagalleríi Helga Þorgils Friðjónssonar, að Kárastíg 9 á Hofsósi, laugardaginn 31. mars kl. 14-17.

Það varð loks ljóst í gærkvöldi hverjir yrðu andstæðingar Tindastóls í undanúrslitum Dominos-deildarinnar þegar deildarmeistarar Hauka mörðu spræka Keflvíkinga í oddaleik í Hafnarfirði. Þar sem þau fjögur lið sem enduðu í efstu fjórum sætunum í deildinni eru öll komin áfram þá mæta Haukar liðinu í fjórða sæti, KR, og ÍR, sem vermdi annað sætið, fær lið Tindastóls í heimsókn.

Í kvöld munu þeir frændur og brottfluttu Króksarar, Ellert Heiðar Jóhannsson og Kristján Gíslason, syngja fyrir gesti Sauðárkrókskirkju. Það er Sauðárkrókssöfnuður sem býður á þessa skírdagstónleika sem ætlaðir eru allri fjölskyldunni. Í hléi verður atburða skírdagskvölds minnst og gengið að borði Drottins, þar sem brauð úr Sauðárkróksbakaríi verður brotið og bergt á vínberjum. Aðgangur er ókeypis og allir velkomnir meðan húsrúm leyfir.

Þingmaðurinn - Ásmundur Einar Daðason Framsóknarflokki Ásmundur Einar Daðason kom á ný inn í þingflokk Framsóknarflokksins í síðustu kosningum eftir árs fjarveru og er nú oddviti flokksins og 2. þingmaður Norðvesturkjördæmis. Ásamt þingstörfum gegnir hann starfi ráðherra félags- og jafnréttismála í velferðarráðuneytinu. Ásmundur býr, ásamt konu sinni, Sunnu Birnu Helgadóttur í Borgarnesi og saman eiga þau þrjár dætur. Ásmundur Einar er þingmaðurinn í Feyki þessa vikuna.

Lóan er komin að kveða burt snjóinn, segir í tilkynningu frá Fuglavernd. Helsti vorboði Íslendinga kom á tilsettum tíma nú rétt fyrir páska en fyrstu lóurnar sáust í Flóanum í dag. Aðeins tvisvar sinnum hafa lóurnar komið seinna en 28. mars, 1999 og 2001, en meðalkomudagur þeirra 1998-2017 hefur verið 23. mars.

Nú fer hver að verða síðastur að skila inn upplýsingum um viðburði í Sæluvikudagskrá 2018 en hún verður að þessu sinni haldin dagana 29. apríl til 5. maí. Sem fyrr boðið upp á fjölbreytta menningardagskrá víðs vegar um Skagafjörð. Þeir sem eiga eftir að tilkynna viðburðinn sinn eru hvattir til að senda upplýsingar á bryndisl@skagafjordur.is eða hafa samband við Bryndísi Lilju í síma 455-6000.

Ársafkoma jökla á Tröllaskaga var neikvæð jökulárið 2016–2017 og er ástæðan einkum hlýtt sumar og haust árið 2017 og lítil vetrarákoma á jöklana. Um nokkurra ára skeið hefur Náttúrufræðistofnun Íslands fylgst með og mælt afkomu skálar- og hvilftarjökla í Svarfaðardal á Tröllaskaga, með dyggri aðstoð heimamanna.

Í Sjónhorni stendur að messað verði í Hvammskirkju í Hvamms- og Ketusókn í Skagafirði á páskadag. Það mun ekki vera rétt. Rétt er að messað verður í Ketukirkju annan páskadag, 2. apríl, klukkan 14. Prestur er sr. Hjálmar Jónsson en hann þjónar einnig í Sauðárkrókskirkju.