Skagafjörður

Einhverjir hafa sennilega hugsað sér gott til glóðarinnar á köldu og blauti sumri og ætlað að skella sér í Króksbíó til að sjá sjóðheita nýja ABBA-mynd eða Antman eða einhverja aðra magnaða ræmu og maula popp. Einhver máttarvöld virðast þó hafa gripið inn í og stoppað þessa drauma í fæðingu því fyrir nokkru bilaði sýningarvélin í Króksbíói og útlit fyrir að einhver bið verði á bótum.

23 áhafnir eru skráðar til leiks í Ljómaralli sem fram fer í Skagafirði laugardaginn 28. júlí nk. Keppnin er þriðja keppni sumarsins í Íslandsmeistaramótinu í ralli og óhætt er að segja að staðan sé spennandi og barist verði um hvert stig til síðasta metra í keppninni.

Starfsmenn íþróttahússins á Sauðárkróki höfðu samband við Feyki.is og vildu koma því á framfæri að þar hefur safnast upp mikið safn óskilamuna sem sakna eigenda sinna. Á Facebooksíðu stuðningsmanna knattspyrnudeildar Tindastóls má sjá myndir af safninu og geta eigendur litið við og vitjað eigna sinna.

Ferðafélag Skagfirðinga stendur fyrir gönguferð á fjallið Kaldbak á laugardaginn kemur, 28. júlí, ef veður leyfir. Fjallið Kaldbakur er í landi Sólheima í Sæmundarhlíð og er hæsta fjallið á því svæði. Gangan er frekar erfið og fjallið grýtt. Því eru góðir gönguskór nauðsynlegir.

Davíð Snorri Jónasson, þjálfari U16 landsliðs karla, hefur valið Jón Gísla Eyland Gíslason leikmann Tindastóls í hóp Íslands fyrir Norðurlandamótið í knattspyrnu. Leikmannahópinn skipa átján leik menn frá tólf félagsliðum.

Það var mest allt á brattann hjá Israel Martin og lærisveinum hans í U20 ára liði Íslands sem hefur undanfarna daga tekið þátt í A-deild Evrópumótsins sem spiluð var í Þýskalandi. Allir leikir liðsins í riðlakeppninni og síðan þrír til viðbótar í keppni um sæti töpuðust, en síðasti leikurinn, gegn Rúmeníu þar sem spilað var um 15. sætið, vannst örugglega.

Eins og margir vita er búseta mín að Víðigrund 14 og hef ég úr íbúð minni útsýni aðeins í vestur og við mér blasa tveir vellir, nýi gerfi-grasvöllurinn okkar og fyrir sunnan hann er grasvöllur. Vellir þessir eru vel girtir af og er það gott, vegna bolta sem sparkað er í allar áttir. Á þessari víggirðingu eru tvö hlið og þau bæði læst. Nokkuð langt er því að næstu inn- og útgöngum á vellina, er það nokkuð bagalegt þegar bolti fer út fyrir víggirðinguna og þegar börn koma að völlunum, töluverð leið er að næsta hliði.

Það fór svo í sumar að Króksarinn Rúnar Már Sigurjónsson, atvinnumaður í knattspyrnu, var ekki valinn í íslenska landsliðið sem tók þátt í HM sem fram fór í Rússlandi. Í fyrravetur var hann lánaður frá Grasshoppers í Sviss til St. Gallen en hagur hans virðist þó hafa vænkast að nýju því nú er kappinn orðinn fyrirliði hjá Grasshoppers samkvæmt frétt á Fótbolti.net.

Samkvæmt fimm ára framkvæmdaáætlun Skagafjarðarveitna, sem samþykkt var í maí 2014, átti að ráðast í hitaveitu í Óslandshlíð og Viðvíkursveit á árunum 2018 og 2019. Þeim hefur hins vegar verið frestað ásamt fyrirhuguðum framkvæmdum í Hjaltadal en farið var yfir ástæður þess á fyrsta fundi nýrrar veitunefndar Svf. Skagafjarðar þann 5. júlí sl. og kynntar mögulegar útfærslur á hitaveitu um svæðið.

Á fundi skipulags- og byggingarnefndar hjá Sveitarfélaginu Skagafirði sem haldinn var í gær kom fram að hjá skipulags- og byggingarfulltrúa liggi fyrir umsóknir um lóðir fyrir einbýlishús í Túnahverfinu á Sauðárkróki. Öllum byggingarhæfum lóðum í hverfinu hafi verið úthlutað og beinir því nefndin því til Byggðarráðs að hefja framkvæmdir við gerð nýrrar götu, Melatúns.