Skagafjörður

Rannsóknarsetur Háskóla Íslands á Norðurlandi vestra, sem hefur aðsetur sitt á Skagaströnd, hlaut á dögunum níu milljóna króna styrk vegna verkefnisins Gagnagrunnur sáttanefndabóka. Verkefnið er eitt fjögurra sem hlutu styrk til fjarvinnslustöðva sem veittur er á grundvelli stefnumótandi byggðaáætlunar fyrir árin 2018-2024.

Á fundi atvinnu-, menningar- og kynningarnefndar í vikunni var lagt fram til kynningar bréf frá atvinnuvega- og nýsköpunarráðuneyti, varðandi úthlutun byggðakvóta fiskveiðiárið 2018/2019. Sauðárkróki er úthlutað 70 þorskígildistonnum og Hofsós 15 þorskígildistonnum. Inga Katrín Magnúsdóttir fulltrúi Vg er ekki ánægð með þróun mála og hvetur sjávarútvegsráðuneytið að auka veiðiheimildir á Hofsósi og leyfi til dragnótaveiða verði endurskoðað.

Vegna óviðráðanlegra ástæðna hefur dreifing á JólaFeyki, sem kom út í gær, tafist en verið er að vinna í því að koma honum til lesenda. Fyrir þá sem ekki hafa þolinmæði að bíða eftir pappírnum geta nálgast JólaFeyki rafrænt HÉR.

Fyrirhuguðum íbúafundi sem vera átti í Höfðaborg á Hofsósi kl. 17 í dag, um fjárhagsáætlun sveitarfélagsins fyrir árið 2019, er frestað vegna veðurs til miðvikudagsins 5. desember kl. 17 að því er segir í tilkynningu á vef Sveitarfélagsins Skagafjarðar.

Á laugardaginn stendur Kvenfélagið Framtíðin fyrir fullveldishátíð í Fljótum, í tilefni af 100 ára fullveldisafmæli Íslands. Íris Jónsdóttir segir hugmyndina hafa kviknað þegar kvenfélagskonur fór að hugsa um þessi merku tímamót og að núverandi kynslóð myndi ekki upplifa önnur slík. Því hafi kvenfélagskonur ákveðið að bjóða sveitungum og öðrum áhugasömum til samkomu í Sólgarðaskóla næstkomandi laugardag.

Leiðinda veður er nú um allt land og leiðir víða lokaðar. Á Norðurlandi vestra er norðaustan hvassviðri þar sem vindhviður fara gjarna yfir 30 m/s og éljagangur víðast hvar. Í nótt náði 10 mínútna meðalvindhraði tæpum 34 m/s á Vegagerðarstöð við Blönduós að því er segir á vef Veðurstofunnar.

Kiwanisklúbburinn Freyja á Sauðárkróki lét hanna, prenta og troðfylla fallega jólakassa af dýrindis gotteríi frá sælgætisgerðinni Freyju og ætlar að selja hér og þar fyrir jólin en aðallega þó í gegnum Facebook. Fyrirtæki bæjarins hafa lagt verkefninu lið með því að kaupa auglýsingar á kassann og er þeim þakkaður stuðningurinn.

Nýverið barst Sauðárkrókshöfn fyrsta bókunin um skemmtiferðskip til Sauðárkróks og er áætlað að það komi 6. júlí 2020. Skipið ber nafnið Seabourn Quest og er 200 metrar að lengd, 32.477 brt og ristir 6,5 metra.

Lögreglan á Norðurlandi vestra bendir, á Facebooksíðu sinni, íbúum á slæma veðurspá eftir hádegi í dag og á morgun og bendir fólki á að huga að lausamunum og öðru smálegu. Þá er ekki ólíklegt að færð spillist á heiðum og er því þeim sem hyggja á ferðalög bent á að fylgjast með færð á vegum á upplýsingasíðu Vegagerðarinnar http://www.vegagerdin.is/…/faerd-og-…/nordurland-faerd-kort/ eða í upplýsingasíma Vegagerðarinnar 1777

Guðni Th. Jóhannesson, forseti Íslands, afhenti sl. sunnudag verðlaun í myndakeppni Forvarnardagsins. Verðlaunin hlutu þau Jóhanna Inga Elfarsdóttir, Leó Einarsson og Magnús Bjarki Jónsson. Jóhanna er nemandi við Seljaskóla í Reykjavík, Magnús í Álftamýrarskóla - Háaleitisskóla og Leó er í Varmahlíðarskóla.