Skagafjörður

Söngskemmtunin Manstu gamla daga stendur yfir í Skagafirði þessa dagana og þetta í sjötta sinn sem hún er sett upp. Um er að ræða skemmtun í tali og tónum og að þessu sinni er sögusviðið Skagafjörður kringum 1970.

Vísnakeppni Safnahúss Skagfirðinga er fastur liður í aðdraganda Sæluviku Skagfirðinga og nýtur mikilla vinsælda. Margir glíma við fyrripartana og senda inn botna sem og semja vísur um fyrirfram gefið efni. Safnahús Skagfirðinga stendur enn vaktina og sendir út fyrriparta til hagyrðinga sem fyrr og verður hún með sama sniði og undanfarin ár.

Undirbúningsfundur fyrir stofnun Kvennaklúbbs Kiwanis í Skagafirði verður haldinn á Gott í gogginn á Sauðárkróki í dag kl. 17:00. „Áhugi hefur vaknað til að stofna Kvennaklúbb Kiwanis hér í Skagafirði. Það eru einungis fjórir Kiwanis kvennaklúbbar starfandi á Íslandi og einn í Færeyjum. Ísland-Færeyjar er sama umdæmið,“ útskýrir Sigurlaug Vordís Eysteinsdóttir í samtali við Feyki.

Haukar komu í heimsókn í Síkið í kvöld á afmælisdaginn sinn og stefndu að sigri gegn liði Tindastóls í fjögurra liða úrslitum Dominos-deildarinnar. Leikurinn var jafn og æsispennandi allan tímann og úrslitin ekki ljós fyrr en eftir að leik lauk. Þá kom í ljós að Helgi Margeirs hleypti af byssunni sekúndubroti of seint og leiktíminn úti þegar þristurinn þaut af stað í átt að körfunni. Haukar fögnuðu því sæti í úrslitarimmunni gegn KR eða Njarðvík og verður að segjast eins og er að þeir voru sterkara liðið í einvíginu. Lokatölur urðu 68-70.

Vorhátíð Vélavals verður haldin föstudaginn 15. apríl. Boðið verður upp á grillaðar pylsur í hádeginu. Í fréttatilkynningu frá versluninni segir að vorvörurnar séu farnar að streyma inn, m.a. fullt af nýjum leiktækjum fyrir landbúnað.

Við setningu Sæluviku Skagfirðinga 2016 verða Samfélagsverðlaun Skagafjarðar veitt í fyrsta sinn. Verðlaunin verða veitt árlega þeim einstaklingi, fyrirtæki, stofnun eða félagasamtökum í Sveitarfélaginu Skagafirði sem þykir standa sig afburðavel í að efla skagfirskt samfélag, að því er fram kemur á vefsíðu Sveitarfélagsins Skagafjarðar.

Áætlað er að Landsmót Ungmennafélags Íslands (UMFÍ) verði haldið á Sauðárkróki sumarið 2018. Til stendur að undirrita samning þessa efnis við forsvarsmenn sveitarfélagsins og Ungmennasambands Skagafjarðar (UMSS).

Alls voru 54 ökumenn verið stöðvaðir vegna hraðaksturs í umdæmi lögreglunnar á Norðurlandi vestra í síðustu viku, þar af voru tólf erlendir ferðamenn. Þá er einn ökumaður, stöðvaður í Skagafirði, grunaður um ölvun við akstur en hann mældist á 113 km/klst. „Verkefni síðastliðinnar viku eru af ýmsum toga en þar spila umferðarmálin stærstu rulluna samkvæmt venju. Veður og aðstæður hafa verið mjög góðar og þá hættir mönnum til að aka of hratt,“ segir í færslu lögreglunnar á Facebook.

Sögulegt samkomulag hefur náðst á milli 14 stéttarfélaga sem eru starfandi í Eyjafirði og á Norðurlandi vestra um stóraukið vinnustaðaeftirlit með því að ráða einn sameiginlegan verkefnastjóra fyrir vinnustaðaeftirlit á svæðinu, eins og greint er frá á vef Stéttarfélagsins Samstöðu.

Ríkisstjórnin hefur að tillögu mennta- og menningarmálaráðherra samþykkt að settur verði á laggirnar framhaldsskóli sem býður upp á sérhæfingu í tónlist. Skólanum er ætlað að bjóða upp á framhaldsskólanám með áherslu á hljóðfæraleik og söng samkvæmt aðalnámskrá tónlistarskóla, þannig að nemendur ljúki stúdentsprófi af tónlistarbraut.