Skagafjörður

Enn er tekist á um talningu atkvæða í Norðvesturkjördæmi í kjölfar alþingiskosninganna sem fram fóru 25. september síðastliðinn. Nú hafa að minnsta kosti ellefu aðilar kært kosningarnar til Alþingis og þegar þessi frétt er skrifuð er undirbúningsnefnd fyrir rannsókn kjörbréfa að funda. Mjög skiptar skoðanir eru ríkjandi varðandi málið en í nýrri könnun Gallup sem RÚV segir frá kemur í ljós að flestir telji að seinni talning eigi að standa.

Það var boðið upp á allt (nema góða skotnýtingu) þegar gömlu erkifjendurnir, KR og Tindastóll, mættust á Meistaravöllum í Subway-deildinni í gærkvöldi. Stuðningsmenn Tindastóls fjölmenntu að sjálfsögðu og studdu sína menn af fítonskrafti og ekki veitti af því leikurinn var æsispennandi, liðin skiptust þrettán sinnum á um að hafa forystuna og það þurfti að framlengja. Sekúndubroti munaði að Vesturbæingar hefðu náð að sigra leikinn en sigurinn féll Stólamegin eftir magnaðan þrist frá Arnari þegar fimm sekúndur voru eftir. Lokatölur 82-83 fyrir Tindastól.

Sameiningarviðræður eru hafnar milli Akrahrepps og Sveitarfélagsins Skagafjarðar, með það fyrir augum að íbúar kjósi um tillöguna í lok janúar eða byrjun febrúar. Samstarfsnefnd sveitarfélaganna er skipuð tíu fulltrúum, fimm frá hvoru sveitarfélagi og er vinnuheiti verkefnisins, Skagfirðingar. Finna má upplýsingar um verkefnið og framgang þess á vefsíðunni skagfirdingar.is sem nýbúið er að opna.

„Ég er búin að fá mig fullsadda á þessari endalausu kræklingavitleysu,“ sagði Edda Daða þegar hún hafði samband við ritstjórn á dögunum. „Sauðkræklingar! Hverslags ónefni er þetta eiginlega!? Ég sat og horfði á beina útsendingu á Stöð2Sport með manninum mínum og þar eru einhver glaðhlakkaleg borgarbörn að lýsa leik Tindastóls og Vals og þau svoleiðis staggla á þessu kræklinga-kjaftæði endalaust að það endaði með því að ég fékk bara alveg upp í kok og skipti hérna yfir á hann Gísla Martein... já, þá er nú langt gengið skal ég segja þér!“

Fólki var brugðið í gærkvöldi þegar spurnir bárust af skelfilegum atburði í Kongsberg í Noregi, vinabæ Sveitarfélagsins Skagafjarðar, þar sem maður á fertugsaldri varð fimm manns að bana og særði tvo til viðbótar. Hann var handtekinn og hefur við yfirheyrslur játað sök að sögn lögreglunnar.

Það er ekki á hverjum degi sem von er á hasargrínmynd með sprungulausum Króksara í aðalhlutverki í bíó. Hljómar kannski eins og eitthvert bull en er engu að síður staðreynd því Króksbíó, líkt og fjölmörg kvikmyndahús um allan heim, tekur senn til sýningar kvikmyndina Leynilögga (Cop Secret) sem skartar Auðunni okkar Blöndal í aðalhlutverki. Myndin, sem er leikstýrt af Messi-víta-bananum Hannesi Þór Halldórssyni, er einnig byggð á hugmynd Audda.

Feykir sagði frá því um liðna helgi að lögreglan á Norðurlandi vestra biðlaði til almennings og verslunareigenda að vera á varðbergi gagnvart fölsuðum peningaseðlum sem væru í umferð. Í fréttum RÚV í hádeginu kom fram að málið virðist ekki umfangsmikið, enn hefur aðeins einn falsaður 5000 krónu seðill uppgötvast, en öll peningarfölsunarmál tekur lögreglan af fullri alvöru.

Næstkomandi laugardag verður haldin heilmikil dagskrá um Sturlunga í Skagafirði á vegum Kakalaskála Sigurðar Hansen á Kringlumýri. Þar munu m.a. koma fram tveir miklir Sturlungasöguritarar, þeir Einar Kárason, sem m.a. fékk Íslensku bókmenntaverðlaunin fyrir aðra Sturlungabókina sína, Ofsa, árið 2008, og Óttar Guðmundsson, sem velti fyrir sér geðrænum vandamálum á þrettándu öld og skoðaði róstusamt líf Sturlunga í bók sem kom út fyrir síðustu jól.

46. Sambandsþing SUF (Samband ungra Framsóknarmanna) var haldið um helgina á Hótel Sel í Mývatnssveit. Hópur ungmenna sótti þingið og tók þátt í málefnavinnu. Mikið var rætt um velgengni Framsóknar í Alþingiskosningunum ásamt aðdraganda næstu kosninga, sveitarstjórnarkosningar. Hæst bar til tíðinda að nýr formaður tók við af Lilju Rannveigu Sigurgeirsdóttur, sem nú er orðin Þingmaður Framsóknar.

Eins og lesendur geta séð í aðalefnis Feykis þessa vikuna er endalaust hægt að gera sér mat úr mesta ófriðartíma Íslandssögunnar, Sturlungaöldinni. Hún er yfirfull af valdabaráttu, svikum, auðsöfnun, misskiptingu og gríðarlegu ofbeldi. Menn eru drepnir hægri vinstri, ýmist felldir í bardögum, brenndir inni eða hálshöggnir, aflimaðir, blindaðir og geltir svo eitthvað sé nefnt.