Skagafjörður

Heilbrigðisráðuneytið vekur á vef sínum athygli á upplýsingamiðlun sóttvarnalæknis vegna kórónaveirunnar (2019-nCoV) á vef embættis landlæknis. Þar er að finna upplýsingar til heilbrigðisstarfsfólks, leiðbeiningar og fræðsla fyrir almenning, upplýsingar og fræðsla tengd alþjóðaflugi og fleira. Kórónaveiran á, eins og kunnugt er, upptök sín í Wuhan héraði í Kína og hafa nú nærr 6.000 tilfelli greinst af henni og um 130 manns hafa látist. Veiran hefur nú greinst í 15 löndum.

Hjá Heilbrigðisstofnun Vesturlands voru áhrif óveðursins í desember mest á Hvammstanga, en þar var rafmagnslaust í 40 klukkustundir. Fjarskipta- og símasamband gekk erfiðlega og mikil ófærð var á svæðinu. Þetta er meðal þess sem kemur fram í svari Svandísar Svavarsdóttur, heilbrigðisráðherra, við fyrirspurn Andrésar Inga Jónssonar, þingmanns Reykjavíkurkjördæmis norður, um varaafl heilbrigðisstofnana.

Samtök sveitarfélaga á Norðurlandi vestra, SSNV, auglýsa starf verkefnastjóra laust til umsóknar. Í auglýsingu á vef samtakanna segir að hér sé um að ræða nýtt og spennandi verkefni sem hafi það að markmiði að laða fjárfestingar í landshlutann í því skyni að fjölga þar störfum. Ráðið er í starfið til tveggja ára með möguleika á framlengingu.

Í dag á að gera þriðju tilraunina til að halda í Húnavallaskóla kynningarfund umhverfis- og auðlindaráðherra á frumvarpi um Hálendisþjóðgarð, sem byggir á skýrslu þverpólitískrar nefndar. Tvisvar hefur þurft að fresta fundi vegna veðurs. „Veðurspáin lofar góðu svo okkur er ekkert að vanbúnaði,“ segir í tilkynningu úr ráðuneytinu.

Það er búið að ganga frekar brösuglega hjá Stólastúlkum í körfunni að undanförnu. Liðið var lengstum í einu af tveimur efstu sætum 1. deildar fram að jólum en sex tapleikir í röð hafa heldur slegið á bjartsýninina og er liðið nú í fimmta sæti. Feykir hafði samband við Árn Eggert Harðarson, þjálfara Tindastóls, og bað hann að fara yfir ástæður fyrir erfiðu gengi liðsins. Það er engan bilbug að finna á Árna sem er ánægður með framlag stelpnanna við erfiðar aðstæður og er hann bjartsýnn á framhaldið.

Minjastofnun Íslands hefur sent inn umsagnir um drög að frumvörpum til laga um Þjóðgarðastofnun og þjóðgarða annars vegar og Hálendisþjóðgarð hins vegar en ljóst þykir stjórnendum að útgjöld Minjastofnunar og vinnuálag muni aukast verulega með stofnun þjóðgarðs. Þykir því nauðsynlegt að efla Minjastofnun Íslands eigi að vera hægt að uppfylla markmið þjóðgarðsins um verndun menningarminja.

Í síðustu viku náðist að koma 16 kinda hópi til byggða sem höfðust við í Stakkfellinu í Vesturfjöllum í Skagafirði. Það var Andrés Helgason, bóndi í Tungu í Gönguskörðum, sem gerði sér ferð í fjöllin og kom fénu heim.

Kvennalið Tindastóls í körfunni spilaði tvo leiki við Grindavík-b um helgina og fóru báðir leikirnir fram í Mustad-höll Grindvíkinga. Stólastúlkur unnu báða heimaleiki sína gegn Suðurnesjastúlkunum hér heima en nú fór á annan veg því stelpurnar töpuðu í tvígang og hafa nú tapað sex leikjum í röð í 1. deildinni. Það munaði talsvert um að reynsluboltinn Petrúnella Skúladóttir var í liði heimastúlkna en hún skoraði grimmt og hirti fjölda frákasta.

Á fundi byggðarráðs Svf. Skagafjarðar í síðustu viku voru lögð fram tilboð í verkið Leikskóli á Hofsósi. Alls bárust tvö tilboð í verkið en ákveðið var að ganga til samninga við Uppsteypu ehf. sem var með lægra boðið.

Tindastóll og Valur mættust í Síkinu í gærkvöldi í 15. umferð Dominos-deildarinnar. Valsmenn hafa verið Stólunum erfiðir upp á síðkastið, töpuðu ósanngjarnt fyrir ári í Síkinu eftir framlengingu en unnu Stólana svo í framlengingu í haust. Stuðningsmenn Stólanna voru engu að síður bjartsýnir fyrir leikinn í gær, enda nýr kani liðsins, Deremy Geiger, loks kominn með leikheimild. Það dugði þó ekki til því Valsmenn, með Austin Bracey óstöðvandi, unnu og þurftu ekki framlengingu til að þessu sinni. Lokatölur 89-91 og lið Tindastóls hefur nú tapað þremur af fjórum leikjum sínum í janúar.