Skagafjörður

Eins og fram hefur komið þá hefur loks verið gefið grænt ljós á íþróttaleiki eftir langa COVID-pásu. Feykir heyrði hljóðið í Árna Eggerti Harðarsyni, þjálfara kvennaliðs Tindastóls í körfubolta, en stelpurnar höfðu spilað þrjá leiki áður en íþróttamót voru sett á pásu í haust. Síðasti leikurinn fór fram 3. október og pásan því ríflega þriggja mánaða löng.

Körfuboltakappar stigu loks dans í gær eftir rúmlega þriggja mánaða stopp og í Vesturbænum tóku KR-ingar á móti liði Tindastóls í miklum hasarleik. Það var líkast því að hraðspólað væri yfir pásuna því bæði lið settu í fluggírinn en varnarleikur var einhver eftirþanki sem menn uppgötvuðu í hálfleik. Þrátt fyrir að lið Tindastóls væri yfir lengstum þá kom upp gamalkunnugt skrölt á lokakaflanum en Stólarnir voru seigir og náðu í stigin tvö í blálokin. Lokatölur 101-104.

Iða Marsibil Jónsdóttir býður sig fram í 2.-3. sæti á lista Framsóknar til alþingiskosninga í NV kjördæmi. Iða er fædd árið 1977 og uppalin á Bíldudal. Að loknum grunnskóla lá leið hennar á Laugarvatn þar sem hún sótti nám við Menntaskólann. Nokkru síðar á lífsleiðinni stundaði hún nám við Háskólann á Bifröst og útskrifaðist þaðan sem viðskiptafræðingur árið 2006. Árið 2014 flutti hún aftur heim til Bíldudals til að taka þátt í uppbyggingu sem orðið hefur á svæðinu síðustu ár sem hún segir hafa verið í senn krefjandi og skemmtilegt verkefni.

Kaupfélag Skagfirðinga svf. lauk í desember síðastliðnum innleiðingu á jafnlaunakerfi fyrir félagið og öðlaðist í framhaldinu jafnlaunavottun frá iCert vottunarstofu skv. Jafnlaunastaðli ÍST 85. Félagið hefur lagt mikla vinnu í að koma upp metnaðarfullu jafnlaunakerfi, með því meðal annars að móta verkferla, jafnlaunastefnu og jafnréttisáætlun. Er það gert í þeim tilgangi að innleiða verklag sem tryggir öllum starfsmönnum jöfn laun fyrir sömu og/eða jafnverðmæt störf. Ennfremur tryggir það að ákvarðnir um laun og önnur kjör byggi ávallt á málefnalegum sjónarmiðum og fyrirbyggi þannig beinan og óbeinan launamun kynjanna. Félagið hefur með þessu skuldbundið sig til að viðhalda jafnlaunakerfinu og ástunda stöðugt umbótastarf.

Enn á ný halda nokkrir hvalir sýningu fyrir Skagfirðinga og aðra sem um Strandgötuna fara með miklum blæstri og sporðaköstum. Hafa þeir löngum haldið sig við höfnina og meðfram strandlengjunni við botn fjarðarins og greinilegt að nóg er ætið. Skammt er að minnast þess er þeir léku listir sýnar á sömu slóðum síðasta sumar.

Tindastóll spilar annan leik sinn í Dominos-deildinni í körfubolta í kvöld en þá mæta strákarnir okkar liði KR í DHL-höllinni. Leikurinn verður sýndur á KRtv og hefst kl. 19:15. Af þessu tilefni fer af stað ný fjáröflun Körfuknattleiksdeiildar Tindastóls í samstarfi við Hard Wok Café en stuðningsmönnum Stólanna og öðrum svöngum gefst tækifæri á að panta sér Fyrirliðann – gómsætan hamborgara með fröllum – og renna 500 krónur af hverjum borgara beint í bauk Tindastóls.

Það er líf og fjör í framboðsmálum hjá framsóknarmönnum í Norðvesturkjördæmi eftir að Ásmundur Einar Daðason sem skipaði efsta sæti listans í síðustu kosningum, ákvað að taka slaginn í Reykjavík norður í vor. Nú hafa tveir framjóðendur bæst í hóp þeirra sem bjóða sig fram í fyrsta sætið, þær Guðveig Lind Eyglóardóttir í Borgarnesi sem hefur ákveðið að gefa kost á sér í 1. – 2. sæti og Önfirðingurinn Halla Signý Kristjánsdóttir, sem áður hafði boðið sig fram í annað sæti listans, en eins og fram kom í frétt á Feyki.is í gær hefur Stefán Vagn Stefánsson á Sauðárkróki ákveðið að taka stefnuna á fyrsta sætið.

Svandís Svavarsdóttir heilbrigðisráðherra hefur ákveðið að fresta um ótiltekinn tíma breytingum á neðri mörkum aldursviðmiða vegna lýðgrundaðra skimana fyrir brjóstakrabbameinum. Breyt­ing­arnar fólust í því að neðri aldursmörk skimana færðust úr 40 árum í 50 en hærri mörk úr 69 árum í 74. Áttu þær að ganga í gildi nú um ára­mót­in ásamt þeirri breyt­ingu að skim­an­ir fyr­ir brjósta- og leg­hálskrabba­meini færðust úr hönd­um Krabba­meins­fé­lags­ins til hins op­in­bera.

Stefán Vagn Stefánsson, yfirlögregluþjónn og formaður byggðarráðs Svf. Skagafjarðar, hefur ákveðið að gefa kost á sér til að leiða lista Framsóknarflokksins í Norðvesturkjördæmi fyrir næstu alþingiskosningar. Hann hafði áður gefið kost á sér í annað sæti listans en gírar sig nú upp í efsta sætið í kjölfar þess að Ásmundur Einar Daðason söðlar um og gefur kost á sér á lista Framsóknar í Reykjavíkurkjördæmi norður.

Það eru sviptingar hjá Framsóknarmönnum í Norðvesturkjördæmi. Um áramótin lá, að því er virtist, ljóst fyrir að Halla Signý Kristjánsdóttir frá Bolungarvík og Króksarinn Stefán Vagn Stefánsson myndu bítast um annað sæti á lista Framsóknar í komandi póstkosningum. Það var því ekki sótt að ráðherranum Ásmundi Einari Daðasyni sem skipaði efsta sæti listans í síðustu kosningum og því allt útlit fyrir að hann gengi að sætinu vísu. Nú hefur Ásmundur Einar hins vegar lýst því yfir að hann muni gefa kost á sér í Reykjavík norður sem sannarlega er óvænt flétta.