Skagafjörður

Stjórn Landssambands hestamannafélaga sendi frá sér yfirlýsingu fyrr í dag þar sem lýst er yfir óánægju með tilnefningar Samtaka íþróttafréttamanna til íþróttamanns ársins. Finnst stjórninni jólakveðjur Samtaka íþróttafréttamanna til hestamanna heldur kaldar þar sem gengið er freklega fram hjá þreföldum heimsmeistara í hestaíþróttum, Skagfirðingnum Jóhanni Rúnari Skúlasyni, sem ætti að vera þess umkominn að komast á lista þeirra 10 íþróttamanna sem tilnefndir eru til íþróttamanns ársins, og tilkynnt var í morgun.

Þann 27. desember ætla vinkonur að koma saman, annars vegar í Sauðárkrókskirkju kl.16:30 og síðan í Blönduóskirkju kl. 20, og flytja tónlist og talað mál eftir konur eða sem hefur verið samin til kvenna. Vinkonurnar sem um ræðir eru á öllum aldri og eiga tengingu við Norðurland vestra og flestar búa þær í Skagafirði. „Hugljúf stund í skammdeginu og góð leið til að slaka á um jólin,“ segir í tilkynningu.

Öxnadalsheiði var opnuð á ný í kvöld eftir að hafa verið lokuð vegna veðurs í langan tíma. Róbert Daníel Jónsson, á Blönduósi, tók meðfylgjandi myndir er hann beið í um 40 mínútur í ansi langri biðröð er vegurinn yfir Öxnadalsheiði var við það að opna. Veginum hafði verið lokað á fimmta tímanum í fyrrinótt vegna veðurs og snjóþunga en opnaði síðan um kl. 21:00 í kvöld.

Úthlutun úr Menningarsjóði KS fór fram í Kjarnanum á Sauðárkróki föstudaginn 20. desember sl. og veitt til hinna ýmsu verkefna, flest skagfirskum en húnvetnsk voru einnig þar á meðal. „Ég vil þakka ykkur fyrir að líta til vesturs,“ sagði Elín S. Sigurðardóttir, forstöðumaður Heimilisiðnaðarsafnsins á Blönduósi í þakkarávarpi sínu. Menningarsjóðurinn hefur í gegnum tíðina verið með tvær úthlutanir á ári, annars vegar að vori og hins vegar um jól og er heildarupphæð styrkja nú um 20 milljónir.

Jólin eru í hugum margra tími gleði og samverustunda. Það er þó misjafnt hversu taumlaus gleðin hefur mátt vera í gegnum aldirnar. Margir af eldri kynslóðunum slá enn í dag varnagla við „óviðeigandi“ spilum og leikjum á aðfangadagskvöld og jóladag. Mun það vera arfur frá 17. og 18. öld, þegar kirkja og konungsvald leituðust við að koma böndum á skemmtanir sem ekki áttu tilvist sína í ritningunni, þá sérstaklega á hátíðisdögum.

Frá því er sagt á heimasíðu heilbrigðisráðuneytisins að komugjöld í heilsugæslu verði felld niður í áföngum, niðurgreiðslur sjúkratrygginga fyrir tannlæknisþjónustu og lyf verða auknar og sömuleiðis vegna tiltekinna hjálpartækja og reglur um ferðakostnað verða rýmkaðar. Svandís Svavarsdóttir heilbrigðisráðherra hefur kynnt áform um ráðstöfun 1,1 milljarðs króna á næstu tveimur árum til að lækka greiðsluþátttöku sjúklinga. Hluti aðgerðanna kemur til framkvæmda 1. janúar næstkomandi en í fjármálaáætlun stjórnvalda eru 3,5 milljarðar króna ætlaðir til að draga úr kostnaði sjúklinga vegna heilbrigðisþjónustu til ársins 2024.

Stjórn Samtaka sveitarfélaga á Norðurlandi vestra hefur sent frá sér yfirlýsingu í kjölfar óveðursins sem gekk yfir norðanvert landið og víðar í síðustu viku. Í yfirlýsingunni er lýst yfir stuðningi við bókanir sveitarfélaganna á svæðinu í tengslum við óveðrið og afleiðingar þess og ítrekað að ástand það sem skapaðist sé óviðunandi og nauðsynlegt að tryggja að slíkt endurtaki sig ekki.

Eins og undanfarin ár stendur Feykir fyrir kjöri á manni ársins. Gefst íbúum á svæðinu og öðrum lesendum Feykis kostur á að velja úr hópi þeirra sem tilnefndir voru af lesendum. Í þetta skiptið bárust sex tilnefningar sem teknar voru til greina. Hægt verður að greiða atkvæði hér á vefnum Feyki.is eða senda atkvæði í pósti á Feykir, Borgarflöt 1, 550 Sauðárkróki. Kosningin er þegar hafin og stendur til kl. 12 á hádegi á nýársdag, 1. janúar.

Háannatíminn í eldhúsum margra landsmanna er nú framundan og er þá að ýmsu að hyggja. Matvælastofnun hvetur landsmenn til að huga vel að hreinlæti, og tileinka sér rétta meðhöndlun og kælingu matvæla í eldhúsinu svo koma megi í veg fyrir að matarbornir sjúkdómar spilli gleðinni á hátíðinni sem framundan er.

Tindastóll og Grindavík mættust í Síkinu í gærkvöldi og er óhætt að fullyrða að um fyrirtaks skemmtun hafi verið að ræða. Stólarnir hittu sjálfsagt á einn sinn albesta leik í langan tíma, sóknarleikurinn var lengstum suddalega flottur og ekki skemmdi fyrir að Gerel Simmons var hreinlega unaðslegur. Lið Tindastóls náði góðu forskoti í byrjun annars leikhluta og þrátt fyrir stórleik Sigtryggs Arnars náðu gestirnir ekki að draga á heimamenn sem sigruðu að lokum 106-88.