V-Húnavatnssýsla

Í gær lauk dómum í flokki sex vetra hryssna á Landsmóti hestamanna 2016 sem fram fer á Hólum í Hjaltadal. Yfirlitssýningar verða svo á fimmtudag. Efst í þessum flokki er Óðinsdóttirin Jörð frá Koltursey með 8.67 í aðaleinkunn. Sýnandi er Daníel Jónsson en ræktendur Pétur Jónsson og Þórhallur Dagur Pétursson.

Forkeppni í ungmennaflokki lauk í gærkvöldi og er mjótt á munum á toppnum. Gústaf Ásgeir og Póstur frá Litla - Dal leiða en strax á hæla þeim koma Dagmar Öder og Glóey frá Halakoti. Aðeins munar 0,05 í einkunn á efsta sæti og fimmta sæti. Því stefnir í spennandi keppni í þessum flokki eins og oft áður á Landsmóti.

Íslenska karlalandsliðið í fótbolta er ekki eina landslið Íslands sem er að standa sig vel þessa dagana en U18 ára landslið stúlkna í körfubolta vann stórsigra á frænkum sínum frá Danmörku og Noregi á Norðurlandamóti yngri landsliða í körfuknattleik sem haldið er í Finnlandi. Í liðinu er að finna tvo Skagfirðinga og eina frá Reykjum í Hrútafirði. Næst mæta þær Svíum.

Skagfirðingar og Húnvetningar verða með sínar eigin EM stofur á ýmsum stöðum á svæðinu í kvöld þegar leikur Íslands og Englands í 16 liða úrslitum á EM verður sýndur í beinni útsendingu á RÚV.

Fjárlaganefnd Alþingis óskaði eftir umsögn um tillögur til þingsályktana um fjármálaáætlun fyrir árin 2017-2021 og fjármálastefnu fyrir 2017-2021 en þær voru lagðar fram á alþingi í apríl síðastliðnum. Stjórn SSNV hefur nú skilað af sér umsögn en þar fagnar stjórnin tillögunum.

Mæðgurnar Guðný Hrund Karlsdóttir, sveitastjóri í Húnaþingi vestra, og Kristrún Ásta Arnfinnsdóttir eru staddar á Evrópumótinu í knattspyrnu í Frakklandi. Þær verða á leik Íslands og Englands á Riviera-vellinum í Nice í kvöld og munu hvetja liðið áfram ásamt ríflega 3000 öðrum Íslendingum. Feykir ræddi við Guðnýju sem var á leik Íslands og Austurríkis síðastliðinn miðvikudag.

Björgunarsveitin Húnar og Björgunarfélagið Blanda voru kallaðar út til leitar á erlendum vélhjólamanni að Arnarvatnsheiði á laugardagskvöld, ásamt Björgunarsveitinni Ok. Samkvæmt Facebook-síðu Húna hafði vélhjólamaðurinn óskað aðstoðar og var einnig búinn að festa hjól sitt, en gat ekki gefið greinargóða lýsingu á staðsetningu sinni.

Guðjón Loftsson og Ingibjörg Jónsdóttir frá Hvammstanga voru stödd fyrstu tveimur leikjum Íslands á Evrópumótinu í knattspyrnu í Frakklandi, þ.e. gegn Portúgal og Ungverjalandi. Þau segja leikinn á móti Ungverjalandi hafi verið skemmtilegur þó svo að úrslitin hafi verið svekkelsi. „Leikurinn á móti Portúgal skemmtilegri þar sem að stemningin var betri sem og úrslitin sætari. Leikvangurinn var auk þess minni og var maður því í meiri nánd við leikinn,“ sagði Guðjón í samtali við Feyki.

Leitað er að mjólkandi hryssu fyrir folald sem missti móður sína í nótt og vantar móðurást og umhyggju. Folaldið er Uppsölum í Austur-Húnavatnssýslu. „Ekki vill svo til að einhver viti um/eða sé með hryssu sem að hefur misst og gæti tekið það að sér?“ segir í tilkynningu frá Söru á Uppsölum.

Íslendingar kjósa sér nýjan forseta í dag. Alls eru níu í framboði. Þeir sem eru í framboði eru: