V-Húnavatnssýsla

Vorið er tími tónleika hjá hinum ýmsu kórum og sönghópum. Kór eldri borgara í Húnaþingi vestra er þar engin undantekning og hélt hann sína árlegu vortónleika í Nestúni á Hvammstanga í síðustu viku. „Það var margt um manninn á tónleikunum á efri hæðinni og gnótt veitinga fyrir tónleikagesti,“ segir í frétt á Norðanátt.is. Stjórnandi kórsins, Ólafur Einar Rúnarsson, hóf tónleikana með einsöng við undirleik Elinborgar Sigurgeirsdóttur. Kórinn söng svo við undirleik Elinborgar og síðar sungu Ólafur og Kristín Kristjánsdóttir einsöng með kórnum og sérlegir gestir tónleikanna brugðu sér í kórinn í lokalaginu. Nokkrir nemendur Ólafs í söng við Tónlistarskóla Húnaþings vestra sungu einsöng við undirleik Elinborgar. Það voru þau Friðrik Már Sigurðsson, Hallfríður Ósk Ólafsdóttir, Ingi Hjörtur Bjarnason og Skúli Einarsson.

Nú á vorönn hefur Farskólinn – Miðstöð símenntunar á Norðurlandi vestra staðið fyrir tveimur íslenskunámskeiðum á Hvammstanga. Annað námskeiðið var fyrir byrjendur,, íslenska fyrir útlendinga 1, þar sem sex nemendur stunduðu nám. Hitt var fyrir lengra komna, íslenska fyrir útlendinga 3, þar sem tíu nemendur luku námi.

Þann 10. apríl síðastliðinn voru liðin 35 ár síðan fyrsta tölublað Feykis leit dagsins ljós. Í tilefni þessa hefur nú verið gefið út sérstakt afmælisblað sem dreift er frítt til allra íbúa á Norðurlandi vestra, auk þess sem það er aðgengilegt hér á vefnum.

Eldsmiðja Fjölbrautaskóla Norðurlands vestra, sem staðsett er í Hátæknimenntasetri skólans, verður vígð við hátíðlega athöfn í dag, miðvikudaginn 20. apríl kl. 16:00. Á vefsíðu skólans kemur fram að í tilefni vígslunnar mætir Beate Stormo, Norðurlandameistari í eldsmíði, á staðinn og vígir aðstöðuna.

Ég las viðtal við fyrrverandi Alþingismann þann 4. apríl sl. og það setti að mér óhugnað. Þar talar þessi fyrrverandi ráðamaður okkar Íslendinga um að venjulega, vinnandi fjölskyldufólkið sé ánægt með þann stöðugleika sem er í samfélaginu í dag. Þegar hann var spurður út í mótmæli um 20.000 Íslendinga, gerði hann lítið úr þeim, kenndi góðu veðri um að fólk hefði verið að flækjast á Austurvelli. Hann átti þá sennilega við að þetta venjulega, vinnustritandi fjölskyldufólk sem óvart hefði villst inn í mótmæli „jaðarins“, því svo sagði hann „Það eru til öryrkjar og veikt fólk, sem alltaf er að verða minna af, en þarf samt að laga“. Þá taldi hann sig hafa sagt nóg um þann þjóðfélagshóp og sagði: „Ef við hættum að tala um jaðarinn og tölum bara um massann“.

Framundan eru vortónleikar Karlakórsins Lóuþræla í Húnaþing vestra, en þeir verða í Félagsheimilinu á Hvammstanga laugardagskvöldið 23. apríl kl. 21 og einnig verður söngdagskrá í Blönduóskirkju þriðjudagskvöldið 26 apríl kl. 21.

Á ársfundi Byggðastofnunar sem haldinn var í Miðgarði í Varmahlíð föstudaginn þann 15. apríl, var Landstólpinn, samfélagsviðurkenning Byggðastofnunar, afhentur í sjötta sinn. Að þessu sinni hlutu söngbræðurnir fjórir frá Álftagerði í Skagafirði ásamt Stefáni Gíslasyni listrænum stjórnanda þeirra viðurkenninguna.

Björgunarsveitarmenn og Vegagerðarmenn hjálpuðu fjölda vegfarenda í ófærð og illviðri um norðan og vestanvert landið fram á nótt, að því er fram kemur í frétt á Vísi.is.

Í fyrrakvöld fór fram í Sprettshöllinni keppnin Meistari Meistaranna en þar er sigurvegurum í deildum vetrarins vítt og breitt um landið boðið þátttaka. Þeirra á meðal voru fulltrúar úr KS Deildinni og Húnvetnsku mótaröðinni sem náðu góðum árangri í þessari keppni.

Stærðfræðikeppni Fjölbrautaskóla Norðurlands vestra, Menntaskólans á Tröllaskaga og 9. bekkjar fór fram í FNV í gær en keppnin hefur nú verið haldin árlega í 19 ár. Í fyrsta sæti var Friðrik Snær Björnsson, Varmahlíðarskóla, í öðru sæti var Þorri Þórarinsson, Árskóla og í þriðja sæti var Jón Örn Eiríksson, Grunnskólanum austan Vatna.