A-Húnavatnssýsla

Í 46. tbl. Feykis sem kom út þann 4. desember sl. sáu þau Sigríður Skarphéðinsdóttir og Friðrik Þór Jónsson um matarþátt blaðsins. Þau búa í Skriðu í Akrahreppi ásamt dætrum sínum, Silju Rún og Sunnu Sif. Ekki var nóg plássí blaðinu til að birta allar uppskriftirnar sem þau sendu þannig að hér birtist sú uppskrift sem út af stóð, heimabakað brauð sem væri alveg tilvalið að skella í ofninn um helgina og njóta með góðu áleggi og kaffibolla eða heitri súpu en í blaðinu gáfu þau lesendum einmitt uppskrift að ljúffengri kjúklingasúpu.

Þar sem ekki er fært á AVIS skíðasvæðið í Tindastól þessa dagana verður áður auglýstum hittingi yngri skíðaiðkenda frestað til 28. desember klukkan 14:00. Áætlað er að þá verði búið að opna svæðið og þá tilvalið að skella sér á skíði líka.

Þó rafmagn sé komið á að megninu til á Norðurlandi vestra eru enn nokkur svæði án þess en rafmagnslaust er á tveimur spennistöðvum í Vestur Hópi. Bilun er á Glaumbæjarlínu í Skagafirði og straumlaust er á milli Gýgjarhóls og Reynisstaða og Melur og Holtsmúli eru straumlaus. Þá er Skaginn að austanverðu rafmagnslaus að hluta en unnið er að því að gera við línuna, töluvert er af brotnum staurum.

Það er að mörgu að hyggja eftir margra daga rafmagnsleysi þar sem annað hvort kólnar um of eða hitnar í kæliskápum. Meðal þess sem þarf að huga sérstaklega að eru lyf en sum þeirra þarf að geyma við ströng geymsluskilyrði til að tryggja virkni og gæði þeirra.

Lífið er nú smátt og smátt að færast í eðlilegt horf eftir óveðurshvellinn sem gekk yfir landið í gær og fyrradag. Rafmagn er nú komið á víðast hvar en þó er enn rafmagnslaust á Vatnsnesi, innst í Hrútafirði, á austanverðum Skaga og á einhverjum stöðum í Langadal og Svínadal samkvæmt upplýsingum á vef Rarik.

Nú þegar klukkuna vantar stundarfjórðung í ellefu eru flestar leiðir færar um sunnanvert landið en enn ófært á nokkrum fjallvegum á Norðurlandi en unnið að hreinsun. Holtavörðuheiðin er opin en Vatnsskarð, Þverárfjall og Öxnadalsheiði lokuð.

Eftir mikla vinnu í nótt við að hreinsa tengivirkið í Hrútatungu tókst að spennusetja virkið um klukkan fimm í morgun og rafmagn komst í kjölfarið á Vesturlínu til Mjólkár, notendur á norðanverðum Vestfjörðum fá enn rafmagn í gegnum varafl. Notendur á norðvesturlandi fá nú rafmagn frá flutningskerfinu, segir á Facebooksíðu Landsnets.

Allir vegir eru ófærir eða lokaðir á Norðurlandi samkvæmt heimasíðu Vegagerðarinnar og beðið er með mokstur þangað til í fyrramálið. Vegurinn um Vatnsskarð og Þverárfjall eru lokaður vegna veðurs líkt og Holtavörðu- og Öxnadalsheiði. Ekki verður farið í mokstur fyrr en í fyrramálið. Siglufjarðarvegur er lokaður vegna veðurs og snjóflóðahættu sem og Ólafsfjarðarmúli.

„Eflaust mesti snjór sem hefur komið á Blönduós frá því að við fjölskyldan fluttum hingað fyrir tæpum 15 árum síðan. Veðrið er að ganga niður núna en það var mjög slæmt í gær og fram á nótt. Rafmagnið fór nokkrum sinnum af en aldrei í langan tíma,“ skrifar Róbert Daníel Jónsson á Facebooksíðu sína fyrr í dag.

Aðgerðarstjórn almannavarnarnefndar Skagafjarðar vill benda íbúum og gestum svæðisins á að allir vegir á svæðinu eru lokaðir vegna ófærðar og slæms veðurs. Þá eru rafmagnslínur víða signar niður undir jörð vegna ísingar og dreifing raforku um svæðið ótrygg. Björgunarsveitafólk og viðbragðsaðilar hafa verið að störfum og unnið sleitulaust frá því í gærmorgun og hafa þurft að sinna fjölda aðstoðarbeiðna.