A-Húnavatnssýsla

Tuttugasta Unglingalandsmót UMFÍ var sett formlega á Vilhjálmsvelli í gærkvöldi að viðstöddu fjölmenni. Athöfnin fór fram með hefðbundnum hætti þar sem keppendur gengu fylktu liði inn á völlinn, hver með sínu félagi. Flutt voru ávörp, m.a. Kristján Þór Júlíusson mennta- og menningarmálaráðherra og forseti Íslands Guðni Th. Jóhannesson en hann fékk hjálp hjá ungri snót sem las með honum úr gömlum fréttum af frægum köppum, þeim Vilhjálmi Einarssyni og Hreini Halldórssyni.

Bókin Konan i dalnum og dæturnar sjö er í öðru sæti á metsölulista Eymundsson í dag og greinilegt að þessi merka ævisaga á enn fullt erindi við þjóðina. Bókin kom fyrst út árið 1954 en hér segir Guðmundur G. Hagalín magnaða hetjusögu Moniku Helgadóttur sem var ekkja og einstæð móðir 8 barna í skagfirskum afdal. Hún hafði á þessum tíma hlotið Fálkaorðu forseta Íslands fyrir dugnað sinn og þrautseigju.

Lögreglan á Norðurlandi vestra hefur haft í nógu að snúast það sem af er sumri og hafa fjölmargir ökumenn verið stöðvaðir fyrir of hraðan akstur. Í fyrradag tókst svo lögreglunni að hafa hendur í hári þremenninga sem farið höfðu með ránshendi um héraðið og brotist inn í að minnsta kosti sjö fyrirtæki, sumarhús og heimili ásamt því að stela í það minnsta fjórum bifreiðum. Í einhverjum tilvikanna stóðu lyklarnir í kveikjulásnum þannig að verknaðurinn hefur verið nokkkuð auðveldur fyrir afbrotamennina. Frá þessu er sagt á Facebook síðu Lögreglunnar á Norðurlandi vestra.

Mótsstjórn Unglingalandsmóts UMFÍ opnaði í Egilsstaðaskóla á Egilsstöðum klukkan 18 í gær (miðvikudag) og geta þar þátttakendur á mótinu náð í mótsgögn og annað nauðsynlegt fylgiefni, svo sem mótadagskrá og Skinfaxa, tímarit UMFÍ. Á meðal fylgigagna eru armbönd sem þátttakendur þurfa að setja á sig til að geta tekið þátt í keppnum á Unglingalandsmótinu um verslunarmannahelgina.

Náttúrubarnahátíð á Ströndum var haldin í fyrsta skipti um helgina af Náttúrubarnaskólanum sem starfar á Sauðfjársetrinu í Sævangi. Óteljandi uppákomur tengdar útivist og listum voru á dagskránni og fróðleik miðlað um ýmislegt tengt náttúrunni, bæði hvernig má nýta hana í skapandi og skemmtilegum verkefnum og einnig hvernig má vernda umhverfi og náttúru. Á hátíðina mættu alls hátt í 200 náttúrubörn víða af landinu og á öllum aldri, frá nokkurra mánaða aldri og upp í 80 ára.

Í gær, þriðjudaginn 1. ágúst, komu félagar í Veðurklúbbnum á Dalbæ saman til fundar, eftir sumarleyfi. Engin spá var gefin út fyrir júlímánuð en eins og flestir muna var einmuna veðurblíða síðari hluta þess mánaðar. Fundurinn hófst kl. 13:55 og voru fundarmenn 14 talsins. Fundi lauk kl. 14:20.

Unglingalandsmót UMFÍ fer fram á Egilsstöðum um verslunarmannahelgina og búast keppnishaldarar við um og yfir 1.000 keppendum á aldrinum 11-18 ára ásamt foreldrum og forráðamönnum þeirra. Alls er gert er ráð fyrir allt að 10.000 gestum í bænum frá öllu landinu á meðan mótið fer fram dagana 4.- 6. ágúst og spáir Veðurstofa Íslands úrvals keppnisveðri, þurrki og logni.

Prjónakonan Sandra Halldórsdóttir á Sauðárkróki deildi sýnishornum af verkum sínum í 21. tölublaði Feykis. Hún hefur alltaf haft gaman af hannyrðum og segist ekki geta slakað á nema hafa prjónana í höndunum.

Mikill ferðamannastraumur hefur verið á Norðurlandi í blíðunni undanfarna daga og greinilegt er að sundlaugarnar freista margra enda fátt betra en að skella sér í sund og skola af sér ferðarykið og sóla sig aðeins í leiðinni.

Þessar ágætu grilluppskriftir birtust í matarþætti Feykis fyrir tveimur árum síðan. Nú er nálgast ágúst og ekki líður á löngu áður en skólarnir byrja. Þá veit maður að haustið nálgast og því eins gott að njóta góðu sumardagana sem við fáum og á slíkum dögum er grillmatur ómissandi. Í sumar hefur Feykir deilt bæði uppskriftum af maineringum og grilluppskriftum en nú ætlar hann að deila með ykkur uppskriftum af grilluðum eftirréttum, því það er ekki síðra að grilla eftirréttinn. Eftirfarandi eru uppáhalds sumareftirréttir blaðamanns, en hann mælir eindregið með að skella þessu á grillið á eftir lærissneiðunum og hamborgurunum.